Read De Bibel JHF Markus 5 Bible Online

Markus 5 - De Bibel JHF bible

Markus 5

¹Un see kjeemen nom aundren Eewa vom See, enne Gadarena Jäajent.

²Un aus hee utem Schepp jestäajen wia, kjeem am een Mensch ute Jräwa met eenem orreinen Jeist entjäajen,

³dee enne Jräwa wond; un kjeena kunn am binjen uk nich met Kjäden,

⁴aul foaken wia hee met Feet Spaunsel un met Kjäden jebungen jewast, oba hee reet de Kjäden twei un daut Feet Spaunsel wort twei jeräwen; un kjeena kunn am bandjen.

⁵Un emma, Nacht un Dach, wia hee enne Jräwa un oppe Boaj un schrieech un schluach sikj met Steena.

⁶Oba aus hee Jesus von wiet auf sach, rand hee un schmeet sikj ver am han;

⁷un schrieech met ne lude Stemm, un säd: Waut ha ekj met die to doonen, Jesus, Sän Gottes, däm Hechsten? Ekj beschwia die bie Gott, kjwäl mie nich!

⁸Donn säd hee (Jesus) to am: Foa rut, du orreina Jeist, ut däm Mensch.

⁹Un hee fruach am: Woo es dien Nomen? Un hee säd to am: Mien Nomen es Legion (Dusende), dan wie sent väl.

¹⁰Un hee bedd am sea, daut hee an nich ut de Jäajent wajch schekjt.

¹¹Oba doa aum Boajch wia eene groote Häad Schwien, dee doa grosden (weiden deeden).

¹²Un see (Jeista) bedden am un säden: Schekj ons enne Schwien, daut wie en an foaren.

¹³Un hee (Jesus) erlaubd an daut. Un de orreine Jeista foaren rut un fuaren enne Schwien, un de Häad schmeet sikj vom Eewa em See nenn, (bie 2 000), un dee vesopen em See.

¹⁴Un de Hoads randen un vetalden daut enne Staut un oppem Launt; un see kjeemen [han], om to seenen, waut passieet wia.

¹⁵Un see kjeemen no Jesus un seenen däm Besätnen setten, aunjetrocken un veninftich, däm, dee de Legion (Dusende) haud; un see enjsten sikj.

¹⁶Un dee daut jeseenen hauden, vetalden an, woo daut met däm Besätnen passieet wia, un daut vonne Schwien.

¹⁷Un see fungen aun, am to bedden, ut äare Jäajent wajchtogonen.

¹⁸Un aus hee em Schepp stieech, bedd am de Besätna, daut hee bie am sennen (bliewen) kunn.

¹⁹Un hee leet daut nich too, oba säd to am: Go no dien Hus no de Dienje (diene Famielje) un vetal an, waut de Har aun die jedonen haft, un woo hee sikj äwa die erboarmd haft.

²⁰Un hee jinkj han un funk aun, en de 10-Städa Jäajent to vetalen, wooväl Jesus aun am jedonen haud, un aula wundaden sikj.

²¹Un aus Jesus em Schepp wada aun daut aundre Eewa jefoaren wia, vesaumelden sikj väl Menschen bie (no) am, un hee wia aum See.

²²Un doa kjeem eena de Väaschta enne Sienagog, met Nomen Jairus, un aus hee am sach, foll hee am to (vere) Feet;

²³un hee bedd am sea un säd: Miene kjliene Dochta licht em Stoawen; ekj bedd, daut du kjeemst un ar de Henj opplajchst, daut see jeheelt woat, un läft.

²⁴Un hee jinkj met am, un väl Menschen foljden (jinjen met) am, un drenjden am.

²⁵Un eene Fru, dee aul 12 Joa eenen Moonatfluss haud,

²⁶un haud väl jeläden von väl Doktasch un aul äa Hab un Goot hanjejäft un aules Nutzloos jewast, (oba daut wia noch schlemma jeworden),

²⁷aus see von Jesus jehieet haud, kjeem see derch daut väle Volkj von hinjen, un schied sien Kjleet aun;

²⁸dan see säd: Wan ekj blooss siene Kjleeda aunschia, dan woa ekj jesunt woaren.

²⁹Un plazlich drieejd de Blootkjwal, un see späad aun äarem Kjarpa, daut see jeheelt wia von de Ploag.

³⁰Un Jesus erkjand fuaz en sikj selfst de Krauft, dee von am utjegonen wia, dreid sikj om mank däm Volkj un säd: Wäa haft miene Kjleeda aunjeschieet?

³¹Un siene Jinja säden to am: Du sitst, daut et Volkj die drenjt, un du sajchst: Wäa haft mie aunjeschieet?

³²Un hee kjikjt sikj rom, om ar to seenen, dee dit jedonen haud.

³³Oba de Fru, haud Angst un zettad, wist, waut äa passieet wia, kjeem un foll ver am dol un säd am de gaunze Woarheit.

³⁴Oba hee säd to ar: Dochta, dien Gloowen haft die jeheelt, go en Fräd un sie jesunt von diene Ploag.

³⁵Aus hee noch räd, kjeemen see vom Väaschta vonne Sienagog un sajen: Diene Dochta es jestorwen; waut beorruichst du däm Liera noch?

³⁶Oba aus Jesus daut Wuat räden hieed, sajcht hee toom Sienagog Väastona: Ha nich Angst; jleew blooss!

³⁷Un hee leet kjeenem, met am to gonen, buta Petrus un Jakobus un Johanes, däm Jakobus sien Brooda.

³⁸Un see kjeemen em Sienagog Väastona sien Hus, un hee sach doa een jaumarieren un ludet hielen.

³⁹Un aus hee nenn jekomen wia, sajcht hee to an: Waut jaumaria un hiel jie? Daut Kjint es nich jestorwen, oba daut schlapt.

⁴⁰Un see lachten am ut. Oba aus hee dee aula rutjejoacht haud, nemt hee daut Kjint äa Voda un de Mutta un dee bie am wieren met un jeit nenn, wua daut Kjint lach.

⁴¹Un aus hee daut Kjint bie de Haunt neem sajcht hee to am: Talieta kumie! Daut es äwasat: Mejalkje, ekj saj die, sto opp!

⁴²Un plazlich stunt daut Mejalkje opp un jinkj omhäa, daut wia 12 Joa oolt. Un see wundaden sikj sea (see wieren utasich).

⁴³Un hee befool an oppiernst, daut dit kjeena weeten sull, un leet ar to äten jäwen.