Read De Bibel JHF Markus 7 Bible Online

Markus 7 - De Bibel JHF bible

Markus 7

¹Un donn vesaumelden sikj om am de Farisäa un atelje Schreftjelieede, dee von Jerusalem jekomen wieren;

²un aus see eenje von siene Jinja sagen, met orreine, daut heet met nich jewoschne Henj Broot äten,

³[dan de Farisäa un aule Juden äten nich, bot see sikj ieescht jrintlich de Henj jewoschen ha, endäm see de Eltestasch äare Väaschreften hoolen;

⁴un wan see vom Moakjtplauz komen, äten see nich, bot see sikj ieescht jewoschen ha; un väl aundret es, waut see hoolen motten: Daut wauschen von Kuffels un Krucken (Jefässa) un Messinkj Jefässa un Descha (Deschloaga)],

⁵un de Farisäa un Schreftjelieede fruagen am: Wuarom waundlen diene Jinja nich no de Eltestasch äare Väaschreften, oba äten daut Broot met orreine Henj?

⁶Oba hee auntwuad un säd to an: To rajcht haft Jesaja äwa junt Heichla jeprofezeit, soo aus et jeschräwen steit: «Dit Volkj ieet mie met äare Leppen, oba äa Hoat es wiet auf von mie.

⁷Oba vejäfs ieren see mie, endäm see Menschenjebooten lieren». {Jes.29,13}

⁸Jie ha Gottes Jebooten veloten, jie hoolen Menschen äare Väaschreften faust, (daut wauschen von Krucken un Kuffels, un väl aundret doo jie).

⁹Un hee säd to an: Jeschekjt ha jie daut Jeboot Gottes oppjehowen, doamet jie june Väaschreften hoolen kjennen.

¹⁰Dan Moses haft jesajcht: «Iea dien Voda un diene Mutta!» {2Mo.20,12} un: «Wäa äwa Voda ooda Mutta flieekjt (veacht), saul dootjemoakt woaren». {2Mo.21,17}

¹¹Oba jie sajen: Wan een Mensch to Voda ooda to de Mutta sajcht: Korban (daut es Gow, ooda Opfagow) es daut, wautemma die von mie to goot komen kunn;

¹²un jie loten am nuscht mea fa sienem Voda ooda siene Mutta doonen,

¹³endäm jie daut Wuat Gottes to nuscht jemoakt haben derch june Väaschreften, dee jie wieda jejäft (äwaleewat) ha; un väl däm Änlichet (väl aundret) doo jie.

¹⁴Un aus hee daut Volkj wada no sikj jeroopt haud, säd hee to an: Horcht mie aula un vestot!

¹⁵Doa es nuscht, waut von buten em Mensch nenjeit, daut am veonreinjen kaun, oba waut von am utjeit, daut es daut, waut däm Mensch veonreinicht.

¹⁶Wan wäa Uaren haft toom hieren, dee hia!

¹⁷Un aus hee vom Volkj wajch jinkj un en een Hus nenn kjeem, fruagen siene Jinja am wäajen daut Jlikjnis.

¹⁸Un hee säd to an: Se jie uk soo onvestendich? Bejriep jie nich, daut aules, waut von buten em Mensch nenjeit, kaun am nich veonreinjen?

¹⁹Dan daut jeit nich en sien Hoat nenn, oba em Buck, un dan utem Kjarpa rut, endäm soo aulet Äten rein woat.

²⁰Oba hee säd: Waut utem Mensch rutjeit, daut veonreinicht däm Mensch.

²¹Dan von bennen utem Menschenhoat komen schlajchte (beese) Jedanken, Ehebruch, Huararie, Mort,

²²Stälsucht, Jiez, Booshauft, Lest, lostje Jedanken, een beeset Uag, Lastren, Stoltheit, Dommheit;

²³aul dise beese Dinj komen von bennen rut un veonreinjen dän Mensch.

²⁴Un hee stunt von doa opp un jinkj no de Jäajent von Tierus un Sidon; un aus hee en een Hus nenn jekomen wia, wull hee, dautet kjeena weeten sull; un hee kunn nich vestoaken sennen (bliewen).

²⁵Oba sooboolt hieed eene Fru von am, äare kjliene Dochta haud eenen orreinen Jeist, see kjeem un foll am vere Feet;

²⁶oba de Fru wia eene griechische Fru, ut Sierien - Feenizia von Jeburt; un see bedd am, daut hee dän Dämon ut (von) äare Dochta rutdreef.

²⁷Oba [Jesus] säd to ar: Lot de Kjinja ieescht saut woaren, dan daut es nich goot, daut Broot vonne Kjinja to nämen un daut de Hunj hanschmieten.

²⁸Oba see auntwuad un säd to am: Jo, Har, un doch äten de Hunj unjrem Desch vonne Kjinja äare Kjreemels.

²⁹Un hee säd to ar: Om dien Wuat haulwen go han; de Dämon es ut (von) diene Dochta rutjefoaren.

³⁰Un see jinkj nohus un funk däm Dämon utjefoaren un de Dochta oppem Bad ligjen.

³¹Un wada jinkj hee wajch ut de Tierus Jäajent un hee kjeem derch Sidon aum galiläischen See, medden derch de Jäajent Dekapolis.

³²Un see brinjen no am eenen Doofen (Maun), dee schwoa räd, un bedden am, daut hee am de Haunt oppläd.

³³Un hee neem am auntsied vom Volkj, läd siene Finja en siene Uaren; un spieech, un rieed siene Tung aun;

³⁴un kjikjt nom Himmel, hee veseft un säd to am: Hefata! Daut es: Moak die op!

³⁵Un plazlich wieren siene Uaren opjemoakt, un daut Jespaun von siene Tung wia jeleest, un hee kunn rechtich räden.

³⁶Un hee befool an, daut see dit kjeenem sajen sullen. Oba om soomea hee an daut veboot, soo väl mea muaken see daut bekaunt;

³⁷un äwa aule Mot wieren see erstaunt un säden: Hee haft aules goot jemoakt; hee moakt uk daut de Doowe hieren, uk de Stomme räden kjennen.