Read De Bibel JHF Markus 8 Bible Online

Markus 8 - De Bibel JHF bible

Markus 8

¹En jane Doag, aus wada väl Volkj doa wia un nuscht to äten hauden, roopt hee siene Jinja no sikj un säd to an:

²Ekj sie ennalich truarich äwa dit Volkj, dan aul dree Doag sent dee bie mie un ha nuscht to äten;

³un wan ekj dee soo nohus gonen lot, onen daut see jejäten ha, soo woaren see hinjawäajes veschmachten; dan atelje von an sent von wiet jekomen.

⁴Un siene Jinja auntwuaden am: Wua häa woat (kaun) irjent wäa dise hia enne Wieste kjennen met Broot saut moaken?

⁵Un hee fruach an: Wooväl Brood ha jie? Oba see säden: säwen.

⁶Un hee befool daut Volkj, sikj oppe Ieed doltosaten. Un hee naum de säwen Brood, dankt un bruak dee twei un gauf dee de Jinja, om daut see väaläden (utdeelden); un see läden daut däm Volkj väa (han).

⁷Un see hauden een poa kjliene Fesch; un aus hee dee jesäajent haud, leet hee uk dise väalajen.

⁸Oba see auten un worden saut; un see hoowen de äwajebläwne Brocken opp, säwen Kjarw voll.

⁹Oba doa wieren [dee, jejäten hauden] bie 4000; un hee leet an gonen.

¹⁰Un sooboolt stieech hee met siene Jinja em Schepp un kjeem en de Jäajent von Dalmanuta.

¹¹Un de Farisäa kjeemen rut un fungen aun, met am to strieden, doamet see, om am to vesieekjen sochten, velangden von am een Tieekjen vom Himmel.

¹²Un hee seft en sienem Jeist un säd: Waut sieekjt dit Jeschlajcht een Tieekjen? Woarhauft, saj ekj junt: Wan disem Jeschlajcht een Tieekjen jejäft woat!

¹³Un hee veleet an, stieech wada en daut Schepp un fua aun daut aundre Eewa.

¹⁴Un see vegauten Brood mettoonämen, un hauden nuscht bie sikj oppem Schepp aus blooss een Broot.

¹⁵Un hee befool an un säd: Paust opp, heet junt fa de Farisäa äa Suadieech un Herodes sien Suadieech.

¹⁶Un see äwaläden unjarenaunda [un säden]: Wiels wie kjeene Brood ha.

¹⁷Un aus Jesus daut erkjand, säd hee to an: Waut äwalaj jie, wiels jie kjeene Brood haben? Bejriep jie noch nich un vesto jie uk nich? Ha jie jun Hoat [noch] soo vehoat?

¹⁸Jie ha Uagen un seenen nich? Un jie ha Uaren un hieren nich? Un jie bedenkjen uk nich?

¹⁹Aus ekj de fief Brood mank de 5000 bruak, wooväl Hauntkjarw met Kjreemels saumeld jie toop? See säden to am: 12.

²⁰Ooda aus dee säwen mank dee 4 000, wooväl Kjarw voll met Kjreemels, ha jie toop jesaumelt? Oba see säden: säwen.

²¹Un hee säd to an: Woo, vesto jie [noch] nich?

²²Un hee kjemt no Betsaida; un see brinjen am eenen Blinjen un bedden am, daut hee am sull aunrieren.

²³Un hee fot däm Blinjen aune Haunt un leid am utem Darp rut, un aus hee en siene Uagen jespäajen haud, läd hee am de Henj opp un fruach am, auf hee waut seenen kunn.

²⁴Un hee kjikjt opp un säd: Ekj see de Menschen, dee aus Beem romgonen.

²⁵Donn läd hee wada de Henj opp siene Uagen, un hee sach dietlich (kloa), un hee wia wada gaunz jeheelt, un sach aules kloa.

²⁶Un hee schekjt am no sien Hus un säd: Go nich en daut Darp nenn, [saj daut uk kjeenem em Darp].

²⁷Un Jesus jinkj met siene Jinja rut enne Darpa bie Cäsarea Filippi. Un hinjawäajes fruach hee siene Jinja un säd to an: Wäa sajen de Menschen, dee ekj sie?

²⁸Oba see auntwuaden am un säden: Johanes de Deepa; un aundre: Elia; oba aundre: Eena vonne Profeeten.

²⁹Un hee fruach an: Oba jie, wäa saj jie, daut ekj sie? Oba Petrus auntwuad un säd to am: Du best de Christus.

³⁰Un hee woarnd an, daut see kjeenem von am sajen sullen.

³¹Un hee funk aun, an to lieren, daut de Menschensän väl lieden un mott vonne Eltestasch un Huagapriesta un Schreftjelieede veschmäten woaren, un daut hee dootjemoakt woat un no dree Doag oppstonen mott.

³²Un hee räd daut Wuat openboa. Un Petrus naum am besied un funk aun am to strofen (schellen).

³³Oba hee dreid sikj om, un aus hee siene Jinja sach, stroft hee Petrus, un säd: Go hinja mie, Soton! Dan du denkjst nich jeistlich (soo aus Gott), oba menschlich.

³⁴Un aus hee daut Volkj met siene Jinja no sikj jeroopt haud, säd hee to an: Wäa emma mie nofoljen well, saj (velieej) sikj von sikj selfst auf un nemt sien Kjriez opp sikj un folcht mie no.

³⁵Dan wäa emma sien Läwen raden well, woatet velieren; oba wäa sien Läwen velieren woat om mient- un daut Evangelium wäajen, woatet raden.

³⁶Dan waut woatet eenem Mensch nutzen, wan hee de gaunze Welt jewent un am daut wudd siene Seel kosten?

³⁷Dan waut woat een Mensch aus Tuschjeld jäwen fa siene Seel?

³⁸Dan wäa emma sikj fa mie un miene Wieed schämen woat mank (unja) disem ehebräakjarische un sintelje Jeschlajcht, fa däm woat sikj uk de Menschensän schämen, wan hee komen woat en sienem Voda siene Harlichkjeit met siene heilje Enjel.