Read De Bibel JHF Markus 9 Bible Online

Markus 9 - De Bibel JHF bible

Markus 9

¹Un hee säd to an: Woarhauft, saj ekj junt: Doa sent eenje von dee, dee hia stonen, dee dän Doot nich schmakjen woaren, bot see daut Rikj Gottes, en Krauft ha komen seenen.

²Un no sas Doag nemt Jesus dän Petrus un däm Jakobus un Johanes met un leit se opp eenen huagen Boajch besonda (fa sikj) auleen. Un hee wort ver an vewaundelt;

³un siene Kjleeda worden jlenzend, sea witt [aus Schnee], soo aus kjeen Wauscha oppe Ieed witt moaken kaun.

⁴Un doa kjeem no an Elia met Moses, un see unjahilden sikj met Jesus.

⁵Un Petrus funk aun un säd to Jesus: Rabi, dit es goot, daut wie hia sent; un lot ons 3 Boden (Zelten) moaken, die eene un Moses eene un Elia eene.

⁶Dan hee wist nich, waut hee sajen sull, dan see hauden [wieren voll] Angst.

⁷Un doa kjeem eene Wolkj, dee an bedakjt {Mat.17,5} (aus een Schauten); un eene Stemm kjeem ute Wolkj: Disa es mien leefsta Sän, am horcht.

⁸Un plazlich, aus see sikj romkjikjten, sagen see kjeenem mea, blooss Jesus auleen bie an (sikj).

⁹Oba aus see vom Boajch rauf kjeemen, befool hee an, daut see kjeenem vetalen sullen, waut see jeseenen hauden, bot de Menschensän von de Doodes oppjestonen es.

¹⁰Un see behilden daut Wuat, endäm see sikj unjarenaunda fruagen: Waut es daut: Utem Doot oppstonen?

¹¹Un see fruagen am un säden: Wuarom sajen de Schreftjelieede, daut Elia ieescht komen mott?

¹²Oba hee auntwuad un säd to an: Ieescht kjemt zwoa Elia un stalt aule Dinj wada häa; un soo aus äwa däm Menschensän jeschräwen steit, daut hee väl lieden un fa nuscht jeacht saul woaren.

¹³Oba ekj saj junt, daut uk Elia jekomen es, un see ha am jedonen, wautemma see wullen, soo aus et äwa am jeschräwen steit.

¹⁴Un aus hee no de Jinja kjeem, sach hee väl Volkj om an, un Schreftjelieede, dee sikj met an streeden.

¹⁵Un sooboolt, aus daut Volkj am sach, vewundaden see sikj sea; un see randen no am un bejreesten am.

¹⁶Un hee fruach an: Äwa waut streed jie junt met an?

¹⁷Un eena utem Volkj auntwuad am: Liera, ekj ha mien Sän no die jebrocht, dee eenen stommen Jeist haft;

¹⁸un wuaemma hee am toohoolen kjricht, schmitt hee am han, un hee schumt un kjnirscht met siene Tänen, un woat stiew. Un ekj säd to diene Jinja, daut see am ut driewen sullen, un see kunnen daut nich.

¹⁹Oba hee auntwuad an un säd: Oo onjleewendet Jeschlajcht! Bot wan saul ekj bie junt sennen? Bot wan saul ekj junt vedroagen? Brinjt am no mie.

²⁰Un see brochten am no am [Jesus]. Un aus hee am sach, schmeet de Jeist am han; un hee foll oppe Ieed un kjreld sikj un schumt utem Mul.

²¹Un hee fruach sien Voda: Woo lange Tiet es daut, dautet met am soo es? Oba hee säd: Von Kjint aun;

²²un foaken haft hee am em Fia jeschmäten un em Wota, om am omtobrinjen; oba wan du irjentwaut doonen kaust, soo erboarm die äwa ons un halp ons!

²³Oba Jesus säd to am: Daut «wan du kaust» es, wan du jleewen kaust; däm Jleewenden es aules mäajlich.

²⁴Un plazlich schrieech däm Kjint sien Voda un säd [unja Tronen]: Ekj jleew; halp mienen Ongloowen!

²⁵Oba aus Jesus sach, dautet Volkj toop rand, bedwunk hee dän orreinen Jeist, endäm hee am säd: Du stomma un doowa Jeist, ekj befäl die; foa von am ut un foa niemols mea en am.

²⁶Un hee schrieech un reet am sea han un häa un fua rut; un hee (daut Kjint) wia aus Doot, soo daut de mieeschte säden: Hee es jestorwen.

²⁷Oba Jesus naum am aune Haunt un recht am opp; un hee stunt opp.

²⁸Un aus hee en een Hus jegonen wia, fruagen am siene Jinja oppoat: Wuarom kunn wie am nich rutdriewen?

²⁹Un hee säd to an: Dise Oat kaun derch nuscht utfoaren, aus blooss derch Jebäd un Fausten.

³⁰Un see jinjen von doa wajch un jinjen derch Galiläa; un hee wull nich, dautet irjent wäa weeten sull.

³¹Dan hee lieed siene Jinja un säd to an: De Menschensän woat en Menschenhenj utjeleewat woaren, un see woaren am doot moaken; un nodäm hee omjebrocht worden es, woat hee no dree Doag oppstonen.

³²Oba see vestunden de Räd nich un enjsten sikj, am to froagen.

³³Un hee kjeem no Kapernaum, un aus hee em Hus wia, fruach hee an: Waut ha jie oppem Wajch behaundelt?

³⁴Oba see wieren stell, dan see hauden sikj hinjawäajes unjarenaunda beräd, wäa de Jratsta es.

³⁵Un nodäm hee sikj dol jesat haud, roopt hee de 12; un hee säd to an: Wan wäa de Ieeschta sennen well, soo saul hee de Latsta von aule (sennen) un aula (äa) Deena sennen.

³⁶Un hee naum een Kjint un stald daut en äare Medd; un aus hee daut en siene Oarms jenomen haud, säd hee to an:

³⁷Wäa emma eent von soone Kjinja oppnämen woat en mienem Nomen, nemt mie opp; un wäa emma mie oppnämen woat, nemt nich mie opp, oba däm, dee mie jeschekjt haft.

³⁸Oba Johanes auntwuad am un säd: Liera, wie sagen eenem, dee nich met ons jeit, en dienen Nomen Dämonen utdriewen; un wie veboden am, wiels hee nich met ons jeit.

³⁹Oba Jesus säd: Hindat (vebeed) am nich, dan doa es kjeena, dee een Wundawoakj en mienem Nomen deit un boolt doaropp von mie beeset räden woat;

⁴⁰dan wäa nich jäajen ons es, es fa ons.

⁴¹Dan wäa emma junt een Kuffel Wota to drinkjen jeft en mienem Nomen, wiels jie Christus siene sent, woarhauft, ekj saj junt: Hee woat sien Loon nich velieren.

⁴²Un wäa emma eenem dise Kjliene (Jerinje), dee [aun mie] jleewen, oajren {Mat.18,6} woat, fa däm wiaret bäta, wan een Molsteen aun sien Hauls jelajcht (jehongen wort), un hee em See jeschmäten wort.

⁴³Un wan diene Haunt die oajat (veuasoakt to sindjen), dan schnied de auf. Daut es bäta, aus Kjräpel em Läwen nenn too gonen, aus met 2 Henj enne Hal rauf to foaren, en daut eewje Fia,

⁴⁴[wua de Worm nich stoaft un daut Fia niemols ut jeit].

⁴⁵Un wan dien Foot die oajat, dan schnied am auf. Daut es bäta, lom em Läwen nenn to gonen, aus met twee Feet enne Hal jeschmäten woaren, [en daut eewje Fia,

⁴⁶wua äa Worm nich stoaft un daut Fia nich utjeit].

⁴⁷Un wan dien Uag die oajat, dan rietet ut. Daut es fa die bäta, met eenem Uag en Gott sien Rikj nenn too gonen, aus met 2 Uagen em Halenfia jeschmäten to woaren,

⁴⁸wua de Worm nich stoaft un daut Fia niemols utjeit.

⁴⁹Dan jieda eena woat met Fia jesolten woaren, un jieda Schlachtopfa woat met Solt jesolten woaren.

⁵⁰Daut Solt es goot; oba wan daut Solt sien Jeschmak veloaren haft (nich mea soltich es), met waut well jie daut solten (Jeschmak biebrinjen)? Habt Solt en junt selfst un siet en Fräd unjarenaunda.