Read De Bibel JHF Lukas 15 Bible Online

Lukas 15 - De Bibel JHF bible

Lukas 15

¹Oba doa kjeemen noda no am aule Zollbeaumta un Sinda, am to hieren;

²un de Farisäa aus uk de Schreftjelieede grunsten un säden: Disa nemt Sinda aun un at met an.

³Oba hee räd to an dit Jlikjnis un säd:

⁴Woon Maun von junt, dee 100 Schop haft un eent von an veloaren haft, lat nich de 99 enne Wiltnis un jeit däm veloarnen no (hinjaraun), bot hee daut finjt?

⁵Un wan hee daut jefungen haft, lajcht hee daut met Freid opp siene Schulren;

⁶un wan hee nehus kjemt, roopt hee de Frind un de Nobasch toop, un sajcht to an: Freit junt met mie, dan ekj ha mien veloarnet Schop jefungen.

⁷Ekj saj junt: Sooväl mea Freid woat em Himmel sennen äwa eenen omdenkjenden (bekjieeden) Sinda, dee Busse deit, mea aus äwa 99 Jerajchte, dee daut omdenkjen (de Busse) nich brucken.

⁸Ooda waut vere Fru, dee 10 Drachma haft, wan see eene Drachma veloaren haft, stekjt nich eene Laump aun en fäacht daut Hus un sieekjt sorjfeltich, bot see dee finjt?

⁹Un wan see dee jefungen haft, roopt see de Frind un Nobasch toop un sajcht: Freit junt met mie, dan ekj ha de Drachma jefungen, dee ekj veloaren haud.

¹⁰Soo saj uk ekj junt, es Freid ver de Enjel Gottes äwa eenen omdenkjenden (bekjieeden) Sinda (ooda de Busse deit).

¹¹Oba hee säd: Een Maun haud twee Säns;

¹²un de jinjsta von an säd toom Voda: Voda, jeff mie daut Deel daut mie jehieet, vom Habungoot. Un hee deeld an daut Habungoot.

¹³Un no een poa Doag neem de jinjsta Sän aules toop un reisd wajch en een wiedet (framdet) Launt, un doa vekwosd hee sien Goot, endäm hee wilt läwd.

¹⁴Oba aus hee aules vebrukt haud, kjeem eene jewaultje Hungaschnoot äwa jan Launt, un hee funk aun Mangel to lieden.

¹⁵Un hee jinkj han un schloot sikj eenem de Birja von janem Launt aun, un dee schekjt am opp siene Akasch, Schwien to heeden.

¹⁶Un am velangd, sikj saut to äten von (met) de Schooten, dee de Schwien frauten; un kjeena jeef am dee.

¹⁷Oba en sikj jegonen, säd hee: Wooväl Doagesleena bie mienem Voda ha Äwafluss aun Broot, oba ekj kom hia om derch (fa) Hunga.

¹⁸Ekj well mie oppmoaken un no mien Voda gonen, un well to am sajen: Voda, ekj ha jesindicht jäajen dän Himmel un ver die,

¹⁹ekj sie nich mea wieet, dien Sän jenant to woaren; moak mie aus eenen von diene Doagesleena.

²⁰Un hee muak sikj opp un jinkj no sienem Voda. Oba aus hee noch wiet auf wia, sach am sien Voda un späad (ennalich) Erboarmen, un rand, foll am om sienen Hauls un kust am.

²¹Oba de Sän säd to am: Voda, ekj ha jesindicht jäajen dän Himmel un ver die, ekj sie nich mea wieet, dien Sän jenant to woaren.

²²Oba de Voda säd to siene Kjnajchts: Brinjt schwind daut baste Kjleet rut un trakjt am daut aun un jeft eenen Rinkj aun siene Haunt un Schoo aune Feet;

²³un brinjt daut jemaste Kaulf un schlacht daut, un lot ons äten un froo sennen,

²⁴dan disa mien Sän wia doot un es wada toom Läwen jekomen, hee wia veloaren un es jefungen worden. Un see fungen aun froo to sennen.

²⁵Oba sien elsta Sän wia oppem Flekj; un aus hee kaum un dichta nom Hus kjeem, hieed hee Musikj un Daunzen.

²⁶Un hee roopt eenen vonne Kjnajchts no sikj un fruach, waut es daut.

²⁷Oba dee säd to am: Dien Brooda es jekomen, un dien Voda haft daut jemaste Kaulf jeschlacht, wiels hee am jesunt trigj jekjräajen haft.

²⁸Oba hee wort doll un wull nich nengonen. Oba sien Voda kjeem rut un bedd am.

²⁹Oba hee auntwuad un säd to sien Voda: Kjikj! Soo väle Joaren deen ekj die, un ekj ha niemols een Jeboot äwagonen; un mie hast du niemols een Bockje jejäft, doamet ekj met miene Frind lostich wia;

³⁰oba aus disa dien Sän, dien Habungoot met Huaren oppjefräten haft, jekomen es, hast du am daut jemaste Kaulf jeschlacht.

³¹Oba hee (de Voda) säd to am: Kjint, du best emma bie mie, un aules daut Mienje es dient.

³²Oba maun mott froo sennen un sikj freien; dan disa dien Brooda wia doot un es toom Läwen jekomen un veloaren un es jefungen worden.