Read De Bibel JHF Lukas 16 Bible Online

Lukas 16 - De Bibel JHF bible

Lukas 16

¹Oba hee säd uk to [siene] Jinja: Een rikja Maun haud eenen Vewaulta; un disa wort bie am aunjekloacht, daut hee sien Habungoot veschwent (nich rajcht brukt).

²Un hee roopt am un säd to am: Waut hia ekj doa von (äwa) die? Jeff Räakjenschoft von diene Vewaultunk, dan du kaust nich mea Vewaulta sennen.

³Oba de Vewaulta säd bie sikj: Waut saul ekj doonen? Dan mien Har nemt mie de Vewaultunk auf. Growen kaun ekj nich, to prachren schäm ekj mie.

⁴Ekj weet, waut ekj doonen saul, doamet see mie, wan ekj de Vewaultunk loos sie, oppnämen en äare Hiesa.

⁵Un hee roopt eenen jiedrem von sienem Har siene Schildna no sikj un säd toom ieeschten: Wooväl best du mienem Har schuldich?

⁶Oba hee säd: 100 Mot Eelj. Un hee säd to am: Nemm dienen Schultschien, un sat die schwind dol un schriew 50.

⁷Dan to eenem aundren säd hee: Oba du, wooväl best du Schuldich? Hee oba säd: 100 Sakj Weit. Hee säd to am: Nemm dienen Schultschien un schriew 80.

⁸Un de Har lowd dän ojjerajchten Vewaulta, wiels hee kluak jehaundelt haud; dan de Säns dise Welt sent kjlieekja aus de Säns vom Licht jäajenäwa äarem Jeschlajcht.

⁹Un ekj saj junt: Moakt junt Frind met däm ojjerajchten Mamon, om daut, wan hee utjeit, see junt oppnämen en de eewje Woninj.

¹⁰Dee em Jerinjsten tru es, es uk em Grooten tru; un dee em Jerinjsten ojjerajcht es, es uk em Grooten ojjerajcht.

¹¹Wan jie met däm ojjerajchten Mamon nich tru jewast sent, wäa woat junt daut Woarhauftje [Goot] aunvetruen.

¹²Un wan jie met däm framden Goot nich tru jewast sent, wäa woat junt daut Junje jäwen?

¹³Kjeen Deena kaun 2 Haren deenen; dan entwäda woat hee däm eenen haussen un däm aundren leewen, ooda hee woat sikj aun eenem aunhenjen un däm aundren veachten. Jie kjennen nich Gott deenen uk däm Mamon.

¹⁴Oba dit aules hieeden de Farisäa, dee jeltjierich wieren, un dee vespotten am.

¹⁵Un hee säd to an: Jie sent dee sikj selfst aus jerajchte ver de Menschen hanstalen (utjäwen), oba Gott kjant june Hoaten; dan waut bie Menschen huach es, es een Aufschu (Äakjel) bie Gott.

¹⁶Daut Jesaz un de Profeeten wieren bot opp Johanes; von doa aun woat daut Rikj Gottes aus Frooe Bootschoft vekjindicht, un jiedra drenjt sikj doa nenn (to komen).

¹⁷Oba leichta es, daut de Himmel un de Ieed vegonen, aus daut vom Jesaz een Strich (Tieekjen) wajchfellt.

¹⁸Jiedra, dee siene Fru entlat (wajchschekjt) un eene aundre friet bejeit Ehebruch; un de eene von äarem Maun Entlotne friet, bejeit Ehebruch (brakjt de Ehe).

¹⁹Oba doa wia een rikja Maun, un hee kjleed sikj en Purpur un fiene Leiwent vejnieejd sikj jlenzend jieda Dach.

²⁰[Daut wia] oba een Oama met Nomen Lazarus, [dee] ver sienem Dooa lach, met Schwäaren bedakjt,

²¹un hee velangd, saut to woaren von de raufjefolne Brocken vom Rikjen sien Desch; jo, soogoa de Hunj kjeemen un belekjten siene Schwäaren.

²²Oba daut passieed, daut de Oama storf un hee wort vonne Enjel wajch jedroacht en Abraham siene Schoot. Oba uk de Rikja storf un wort begroft.

²³Un em Doodenrikj (griechisch: Hades) hoof hee siene Uagen opp, aus hee enne Kwol wia, sitt hee Abraham von wiet un Lazarus en sienem Schoot.

²⁴Un hee roopt un säd: Voda Abraham, erboarm die äwa mie un schekj Lazarus, daut hee sien Finjaspetz em Wota endukt un miene Tung kjeelt, wiels ekj Kwol lied en dise Flaum.

²⁵Oba Abraham säd: Kjint, jedenkj, daut du aul dien Goodet jekjräajen hast en dienem Läwen un Lazarus krakjt soo daut Beese; oba nu woat hee hia jetreest, oba du litst Kwol.

²⁶Un bie aul däm es tweschen ons un die eene groote Kluft faust aunjebrocht, doamet dee, dee von hia no junt äwagonen wellen, nich kjennen, uk nich dee, dee von dort no ons äwakomen wellen.

²⁷Oba hee säd: Aulsoo ekj bedd die, Voda, daut du am no mienem Voda sien Hus schekjst,

²⁸dan ekj ha 5 Breeda, doamet hee an drinjent toorät, om daut see nich uk komen aun disem Uat de Kwol.

²⁹Oba Abraham säd: See ha Moses un de Profeeten; see sellen opp an hieren.

³⁰Oba hee säd: Nä, Voda Abraham, oba wan eena vonne Doodes no an kjemt, woaren see omdenkjen (Busse doonen).

³¹Oba hee säd to am: Wan see nich opp Moses un de Profeeten hieren, woaren see sikj uk nich äwazeijen loten, wan wäa vonne Doodes oppsteit.