Read De Bibel JHF Lukas 17 Bible Online

Lukas 17 - De Bibel JHF bible

Lukas 17

¹Oba hee säd to siene Jinja: Daut es ommäajlich, daut de Vefierungen (Oajanis) nich komen; oba wee däm derch dän see komen.

²Daut es nitzlich (bäta) fa am, wan een Molsteen omjehongen wia om sienen Hauls un hee em Mäa jeschmäten wort, aus daut hee eenen eensjen von dise Kjliene vefieet.

³Jäft acht opp junt selfst: Wan dien Brooda sindicht, soo räd Iernst (strenj) to am, un wan hee omdenkjt (daut bekjant), dan vezei am.

⁴Un wan säwen Mol aum Dach hee jäajen die sindicht un säwen Mol no die trigjkjemt un sajcht: Ekj denkj om (mie deit daut leet), dan saust du am vezeien.

⁵Un de Apostel säden toom Har: Vemia en ons däm Gloowen.

⁶Oba de Har säd: Wan jie Gloowen ha aus een Sampkuarn, dan wudd jie to disem Mulbäaboom sajen: Woa met Wartlen utjeräten un veplaunt die em Mäa! Un dee wudd junt jehorchen.

⁷Oba wäa von junt, dee een Kjnajcht haft, de doa plieecht ooda heeden deit, woat to am, wan hee vonne Stap nenn kjemt, sajen: Komm un laj (sat) die fuaz aum Desch?

⁸Woat hee nich välmea to am sajen: Moak reed, waut ekj äten woa, un binj die daut Schalduak om un deen mie, bot ekj jejäten un jedrunken ha; un dan woascht du äten un drinkjen?

⁹Dankt hee dän Kjnajcht, wiels hee jedonen haft waut am befoolen wia? [Ekj jleew nich!]

¹⁰Aulsoo uk jie, wan jie aules jedonen ha, waut junt befoolen es, soo sajcht: Wie sent onnitzelje Kjnajchts; wie ha jedonen, waut wie to doonen schuldich wieren.

¹¹Un daut passieed, aus hee no Jerusalem jinkj, un hee jinkj medden derch Samaria un Galiläa.

¹²Un aus hee en een Darp nenkjeem, bejäajenden am 10 Utsauzje Mana, dee wiet auf stonen bleewen.

¹³Un see schrieejen met ne lude Stemm un säden: Jesus, Meista, erboarm die äwa ons.

¹⁴Un aus hee an sach, säd hee to an: Got han wiest junt de Priesta. Un daut passieed, aus see hanjinjen, worden see rein.

¹⁵Oba eena von an, aus hee sach, daut hee jeheelt wia, kjeem trigj, endäm hee met ne lude Stemm Gott veharlicht;

¹⁶un foll oppem Jesecht ver (to) siene Feet un dankt am; un hee wia een Samarita.

¹⁷Oba Jesus auntwuad un säd: Sent nich dee 10 rein jeworden? [Oba] wua sent dee näajen?

¹⁸Sent kjeene jefungen worden, dee trigj kjeemen, Gott de Iea to jäwen, buta disem Framden?

¹⁹Un hee säd to am: Sto opp un go; dien Gloowen haft die jerat.

²⁰Un aus hee von de Farisäa jefroacht wort, wanea kjemt daut Rikj Gottes, auntwuad hee an un säd: Daut Rikj Gottes kjemt nich soo, daut maun daut beoobachten kaun;

²¹see woaren uk nich sajen: Kjikj hia! ooda: Doa! Dan see, daut Rikj Gottes es medden unja junt.

²²Oba hee säd to de Jinja: Doa woaren Doag komen, doa jie junt wenschen woaren, eenen de Doag vom Menschensän to seenen, un jie woaren am nich seenen.

²³Un maun woat to junt sajen: Kjikj dort! ooda: Kjikj hia! Got nich han, un folcht uk nich.

²⁴Dan aus de Blitz oppblitzt von eenem Enj unjrem Himmel bot däm aundren Enj unjrem Himmel un schient, soo woat de Menschensän sennen aun sienem Dach.

²⁵Oba ieescht es daut needich, daut hee väl lieden un veschmäten woat von disem Jeschlajcht.

²⁶Un soo aus et passieed aun de Doag Noah, soo woatet uk sennen en däm Menschensän siene Doag:

²⁷See auten, see drunken, see befrieden sikj, see leeten sikj frieen, bot däm Dach, aun däm Noah nenjinkj enne Arche, un de Sindflut (Wota Stroom) kjeem un aule ombrocht.

²⁸Krakjt soo aus et passieed en Loot siene Doag: See auten, see drunken, see koften, see vekoften, see plaunten, see buden;

²⁹oba aun däm Dach, aun däm Loot ut Sodom rutjinkj, räajend et Fia un Schwäwel vom Himmel un brocht aule om.

³⁰Opp dise Oat woatet sennen aun däm Dach, aun däm de Menschensän sikj openboat (ooda sikj openboaren woat).

³¹Aun janem Dach, wäa oppem Dak sennen woat un siene Habe (Sachen) em Hus haft, go nich rauf, dee to holen; un dee oppe Stap es, go krakjt soo nich trigj.

³²Denkjt aun Loot siene Fru!

³³Wäa sien Läwen sieekjt fa sikj to behoolen, woatet velieren; oba wäa daut velist, woatet aum Läwen erhoolen.

³⁴Ekj saj junt, en dise (jane) Nacht woaren twee opp eenem Bad sennen; eena woat metjenomen woaren un de aundra woat trigj jeloten woaren.

³⁵twee Frues woaren aun eenem Uat molen, de eene woat metjenomen woaren, [un] de aundre woat trigj jeloten woaren.

³⁶[twee woaren oppe Stap sennen; eena woat jenomen un de aundra woat trigj jeloten woaren.]

³⁷Un see auntwuaden un säden to am: Wua, Har? Oba hee säd to an: Wua daut Os es, doa woaren sikj uk de Odla vesaumlen.