Read De Bibel JHF Lukas 3 Bible Online

Lukas 3 - De Bibel JHF bible

Lukas 3

¹Oba aum 15-den Joa de Rejierunk vom Kjeisa Tiberius, aus Pontius Pilatus Launtfläaja en Judäa wia, un Herodes, Veaferscht von Galiläa, un sien Brooda Filippus, Veaferscht von Ituräa un de Launtschoft Trachonitis, un Liesanias Veaferscht von Abileen,

²unja däm Huagepriestatum von Anas un Kaifas, kjeem daut Wuat Gottes no Johanes, däm Sän (von) Zacharias, enne Wieste.

³Un hee kjeem en de gaunze Jordan Jäajent un prädijd daut Deepen de Busse to Vejäwunk de Sinden;

⁴soo aus et jeschräwen steit em Buak Jesaja, däm Profeet: «Dee Stemm von eenem Roopenden enne Wieste: Moakt däm Har sien Wajch reed, moakt jlikj sienen Stich!

⁵Jiedre Läacht (Schlucht) woat erhowen (voll woat, utjefelt) un jieda Boajch un Aunboajch rauf jesat woaren, daut Kromme woat toom jlikjen Wajch un de humpelje (puckelje) to jlikje Wäaj woaren;

⁶un aulet Fleesch woat daut Heil Gottes seenen». {Jes.40,3-5}

⁷Hee säd toom Volkj, dee rutjinjen, om von am jedeept to woaren: Schlangen Broodsel! Wäa haft junt jewäsen (jelieet), vom däm komenden Oaja (Wutt) wajchtoranen?

⁸Aulsoo brinjt Frucht, dee de Busse wieet sent; un fangt nich aun, bie junt selfst to sajen: Wie ha Abraham toom Voda; dan ekj saj junt, daut Gott däm Abraham ut dise Steena Kjinja erwakjen kaun.

⁹Oba, aul es uk de Akjs (daut Biel) aun de Wartlen de Beem jelajchtt; aulsoo jieda Boom, dee nich goode Frucht brinjt, woat aufjehakt un em Fia jeschmäten.

¹⁰Un de Menschen fruagen am un säden: Waut sell wie dan doonen?

¹¹Oba hee auntwuad un säd to an: Wäa twee Hamden haft, jeff däm, dee kjeent haft; un wäa Äten haft, doo krakjt soo.

¹²Oba doa kaumen uk Zollmana, om jedeept to woaren; un see säden to am: Liera, waut sell wie doonen?

¹³Oba hee säd to an: Foddat nich mea, aus junt befoolen es.

¹⁴Oba am fruagen uk Kjrichsdeena un säden: Un wie, waut sell wie doonen? Un hee säd to an: Doot kjeenem Jewault aun, un kloacht kjeenem faulsch aun, un bejnieecht junt met junem Loon.

¹⁵Oba aus daut Volkj aum luaren wia, un aula en äare Hoaten wäajen Johanes äwaläden, auf hee nich doch de Jesaulwda (Christus) es,

¹⁶auntwuad Johanes aulem un säd: Ekj zwoa deep junt met Wota; oba doa kjemt, dee stoakja es aus ekj, däm ekj nich wieet sie, am de Reemes aun siene Schoo to leesen; hee woat junt met Heiljen Jeist un Fia deepen;

¹⁷en siene Haunt es de Scheffel (Jeträajd Scheffel), un hee woat siene Draschdäl derch un derch reinjen un dän Weit en siene Schien (Spikja) saumlen; oba de Sprie woat hee vebrennen met eewich brennenden Fia.

¹⁸Endäm hee uk met välem aundren vemond, vekjindijd hee däm Volkj goode Bootschoft.

¹⁹Oba Herodes, de Veaferscht, wiels hee wäajen de Herodias, sienem Brooda siene Fru, un wäajen aulem Beesen, daut Herodes jedonen haud, von am (Johanes) vemond (jestroft) wort,

²⁰deed aulem uk dit doatoo, daut hee Johanes leet em Jefenkjnis enschluten.

²¹Oba daut passieed, aus daut gaunze Volkj jedeept wort, un Jesus jedeept wia un bäd, daut de Himmel opjemoakt wort,

²²un de Heilja Jeist en kjarpaliche Jestault, aus eene Duw, opp am rauf kjeem, un eene Stemm utem Himmel kjeem: Du best mien leefsta Sän, aun die ha ekj Wooljefaulen jefungen.

²³Un hee selfst, Jesus, wia onjefäa 30 Joa oolt, aus hee oppstunt, un wia, aus maun meent, een Sän von Josef, von Eli,

²⁴von Matat, von Levi, von Melchi, von Jannai, von Josef,

²⁵von Matitja, von Amos, von Nahum, von Esli, von Nagai,

²⁶von Mahat, von Matitja, von Schimi, von Josef, von Juda,

²⁷von Johanan, von Resa, von Serubabel, von Schealtiel, von Neri,

²⁸von Melchi, von Addi, von Kosam, von Elmadam, von Er,

²⁹von Joses, von Elieser, von Jorem, von Matat, von Levi,

³⁰von Simeon, von Juda, von Josef, von Jonan, von Eljakim,

³¹von Melea, von Menna, von Matata, von Natan, von David,

³²von Isai von Obed, von Boas, von Salma, von Nachschon,

³³von Aminadab, von Ram, von Hezron, von Perez, von Juda,

³⁴von Jakob, von Isaak, von Abraham, von Tarach, von Nahor,

³⁵von Serug, von Regu, von Peleg, von Eber, von Sala,

³⁶von Kenan, von Arpachschad, von Sem, von Noah, von Lamech,

³⁷von Metuschelach, von Henoch, von Jared, von Mahalalel, von Kenan,

³⁸von Enosch, von Set, von Adam, von Gott.