Read De Bibel JHF Lukas 4 Bible Online

Lukas 4 - De Bibel JHF bible

Lukas 4

¹Oba Jesus, voll Heiljen Jeist, kjeem vom Jordan trigj un wort derch dän Jeist enne Wieste 40 Doag omhäa jefieet,

²endäm hee vom Diewel vesocht wort. Un hee aut aul (aun) de Doag nuscht; un aus dee toenj wieren, hungad am.

³Un de Diewel säd to am: Wan du Gottes Sän best, soo saj to disem Steen, daut hee Broot woat.

⁴Un Jesus auntwuad am [en säd]: Daut steit jeschräwen: «Nich von Broot auleen saul de Mensch läwen, oba von jiedrem Wuat Gottes». {5Mo.8,3}

⁵Un [de Diewel] fieed am opp eenen huagen Boajch un wees am en eenem Uagenblekj aule Rikjs (Kjennichrikjs) oppe Ieed (Welt).

⁶Un de Diewel säd to am: Ekj well die aul dise Jewault un äare Harlichkjeit jäwen; dan mie es see äwajäft, un wäm ekj well, jäw ekj dee.

⁷Wan du nu ver mie aunbäden west, saul dit aules dient sennen.

⁸Un Jesus auntwuad am un säd: Daut steit jeschräwen: «Du saust däm Har, dienen Gott, aunbäden un am auleen deenen». {5Mo.6,13}

⁹Un hee fieed am no Jerusalem un stald am oppe Tempelspetz un säd to am: Wan du Gottes Sän best, soo schmiet die von hia rauf;

¹⁰dan daut steit jeschräwen: «Hee woat siene Enjel äwa die befälen, daut see die bewoaren;

¹¹un see woaren die oppe Henj droagen, doamet du nich dienen Foot aun eenen Steen statst». {Ps.91,11.12}

¹²Un Jesus auntwuad un säd to am: Daut es jesajcht: «Du saust däm Har, dienen Gott, nich vesieekjen». {5Mo.6,16}

¹³Un aus de Diewel aule Vesieekjungen beendicht haud, jinkj hee (de Diewel) von am fa eene Tiet.

¹⁴Un Jesus kjeem enne Krauft vom Jeist trigj no Galiläa, un daut Jeräd äwa am jinkj ut derch de gaunze Omjäajent.

¹⁵Un hee lieed en äare Sienagogen, jeieet (veharlicht) von aule.

¹⁶Un hee kjeem no Nazaret, wua hee oppjewossen wia; un hee jinkj no siene Jewanheit aum Sabat enne Sienagog un stunt opp, om väatoläsen.

¹⁷Un doa wort am daut Buak vom Profeet Jesaja hanjerieekjt; un aus hee daut Buak opjerolt haud, funk hee de Städ, wua jeschräwen wia:

¹⁸«Dem Harn sien Jeist es opp mie, wiels hee mie jesaulft haft, de Oame de frooe Bootschoft to vekjindjen; hee haft mie jeschekjt, de Jefangne Frielotunk uttoroopen (to prädjen) un de Blinje, wada seenent woaren, de Mootloose en Frieheit to schekjen,

¹⁹uttoroopen daut aunjenäme Harn Joa». {Jes.61,1.2}

²⁰Un aus hee daut Buak toopjerolt haud, jeef hee daut däm Deena trigj un sad sikj dol; un aule Uagen enne Sienagog wieren opp am jerecht.

²¹Oba hee funk aun, to an to sajen: Vondoag es dise Schreft ver june Uaren erfelt.

²²Un aule jeewen am Zeichnis un wundaden sikj äwa de Wieed vonne Jnod, dee ut sienem Mul jinjen (kjeemen); un see säden: Es disa nich Josef sien Sän?

²³Un hee säd to an: Jie woaren aulemol dit Sprechwuat to mie sajen: Dokta, heel die selfst; aules, waut wie jehieet ha, daut en Kapernaum passieet es, doo uk hia en diene Vodastaut.

²⁴Oba hee säd: Woarhauft, ekj saj junt, daut kjeen Profeet en siene Vodastaut aunjenäm es.

²⁵Oba en Woarheit saj ekj junt: Väl Wätfrues wieren en de Doag Elia en Israel, aus de Himmel dree Joa un sas Moonat veschloten wia, soo daut eene groote Hungaschnoot äwa daut gaunze Launt kjeem;

²⁶un to kjeene von an wort Elia jeschekjt, buta no Sarepta en Sidon, no eene Fru, eene Wätfru.

²⁷Un väl Utsauzje wieren en Israel toom Profeet Elisa siene Tiet, un kjeena von an wort jereinicht, buta Naaman, de Siera.

²⁸Un aula worden met Oaja erfelt, enne Sienagog, aus see dit hieeden.

²⁹Un see stunden opp un schupsten am ute Staut rut un leiden am aun däm Raunt vom Boajch, opp dän äare Staut jebut wia, om am soo rauftoschmieten.

³⁰Oba hee, jinkj derch äare Medd derch, un jinkj wajch.

³¹Un hee kjeem rauf no Kapernaum, eene Staut en Galiläa, un lieed an aune Sabaten.

³²Un see erstaunden sea äwa siene Lia, dan siene Räd (Wuat) wia met Vollmacht.

³³Un doa wia en de Sienagog een Maun, dee eenen orreinen Demonenjeist haud, un hee schrieech opp met ne lude Stemm

³⁴un säd: Ha, waut ha wie met die to doonen, Jesus, Nazarena? Best du jekomen, ons to venichten? Ekj kjan die, wäa du best: De Heilja Gottes.

³⁵Un Jesus beschwicht am un säd: Sie stell un foa rut von am! Un aus de Dämon am, meddel unja an, hanjeschmäten haud, fua hee von am rut, onen am to beschädjen.

³⁶Un Erstaunen kjeem äwa aule, un see räden unjarenaunda un säden: Waut es daut fa een Wuat? Dan met Vollmacht un Krauft jeboot hee de orreine Jeista, un see foaren rut.

³⁷Un de Kund (Norecht) äwa am jinkj ut en jiedrem Uat de Omjäajent.

³⁸Oba hee muak sikj opp von de Sienagog un kjeem en Simon sienem Hus. Oba däm Simon siene Schwiamutta wia von eenem huagen Feeba befoolen; un see bedden am fa ar.

³⁹Un äwa ar stonent (aum Koppenenj), befool hee daut Feeba, un daut veleet ar; oba see stunt plazlich opp un deend an.

⁴⁰Oba aus de Sonn unjajinkj, brochten aule, dee doa aun veschiedne Krankheiten Liedende hauden, dee no am; oba hee läd eenem jiedrem von an de Henj opp un heeld an (dee).

⁴¹Un uk Dämonen fuaren von väle rut, endäm see schrieejen un säden: Du best de Sän Gottes. Un hee bedrood an un leet an nich räden, wiels see wisten, daut hee de Christus wia.

⁴²Oba aus et nu Dach jeworden wia, jinkj hee rut, aun eenem eensomen Uat; un daut Volkj socht am opp un kjeemen bat no am, un see hilden am opp, daut hee nich von an wajch gonen sull.

⁴³Oba hee säd to an: Ekj mott uk de aundre Städa de frooe Bootschoft von Gott sien Rikj vekjindjen (prädjen), dan doatoo sie ekj jeschekjt worden.

⁴⁴Un hee prädijd en de Sienagogen von Judäa (Galiläa).