Read De Bibel JHF 5. Mose 12 Bible Online

5. Mose 12 - De Bibel JHF bible

5. Mose 12

¹Dit sent de Sazungen un de Rajchte dee jie hoolen sellen, dee en däm Launt to doonen, daut de Har, dee Gott june Vodasch, die jejäft haft, daut aus Ieejentum entonämen aule Doag, dee jie oppem Ieedboddem läwen:

²Jie sellen aule Uaten gaunz venichten, woa de Nazionen, dee jie vejoagen woaren, äare Jetta jedeent ha; oppe huage Boaj un oppe Aunboaj un unja jiedrem jreenen Boom;

³un jie sellen äare Aultoaren dolrieten un äare Biltstendasch vebräakjen un äare Ascherim met Fia vebrennen un de jeschnizte Bilda von äare Jetta veschlonen; un jie sellen äare Nomes ut däm seljen Uat vetiljen.

⁴Däm Harn, junem Gott, sell jie nich aulsoo doonen;

⁵sonda däm Uat sell jie oppsäkjen, däm de Har, jun Gott, ut aul june Stam erwälen woat, om sienen Nomen doahan to saten, daut hee doa wont, un doahan saust du komen.

⁶Un jie sell june Brauntopfa doahan brinjen un june Schlachtopfa, un jun 10-det, un daut Häwopfa en june Haunt, un jun Vespräakjen un june friewelje Gowen, un de Ieeschtjebuarne von june Rinda un junem Kjlienvee;

⁷un doa sell jie ver däm Harn, junem Gott, äten un junt freien, jie un june Hiesa, aun aulem waut june Henj jeschauft ha, wuaraun de Har, dien Gott, die jesäajent haft.

⁸Jie sellen nich aulsoo doonen, waut wie vondoag hia doonen, een jiedra, waut rajcht es en siene Uagen;

⁹dan jie sent bat nu noch nich too Ru un to däm Oawdeel jekomen, daut de Har, dien Gott, die jeft.

¹⁰Oba jie sent äwa däm Jordan jegonen un jie wonen em Launt, daut de Har, jun Gott, junt oawen lat, un hee schauft junt Ru ver aul june Fiend runtom, un jie wonen secha,

¹¹soo saul daut passieren; de Uat, däm de Har, jun Gott, erwälen woat, sienem Nomen doa selfst wonen to loten, doahan sell jie aules brinjen, waut ekj junt befäl; june Brauntopfa un june Schlachtopfa, jun 10-det un daut Häwopfa june Henj, un aule Utwol von junem Vespräakjen, dee jie däm Harn Vespräakjen woaren.

¹²Un jie sellen junt ver däm Harn, junem Gott, freien, jie un june Säns un june Dajchta un june Kjnajchts un june Deenstmejales, un de Levit, dee en june Dooasch es, dan hee haft kjeen Deel noch Oawdeel met junt.

¹³Heed die, daut du nich diene Brauntopfa aun jiedrem Uat opfascht, däm du sitst!

¹⁴Sonda aun däm Uat, däm de Har en eenem diene Stam erwälen woat, doa selfst saust du diene Brauntopfa opfren un doa selfst aules doonen, waut ekj die befäl.

¹⁵Doch muchst du schlachten un Fleesch äten en aul diene Dooasch, no aule Lost diene Seel, nom Säajen Gottes, dienem Gott, däm hee die jejäft haft; de Orreina un de Reina muchten daut äten, aus daut Ree un aus däm Hersch.

¹⁶Blooss daut Bloot sell jie nich äten, jie sellen daut oppe Ieed jeeten aus Wota.

¹⁷Du doafst en diene Dooasch nich äten - daut 10-de von dienem Jeträajd un dienem jungen Wien un dien Eelj, noch de Ieeschtjebuarne von dienem Rind un dienem Kjlienvee, noch aul dien Vespräakjen, dee du deist, noch diene friewelje Gow, noch daut Häwopfa diene Henj;

¹⁸sonda ver däm Harn, dienem Gott, aun däm Uat, däm de Har, dien Gott, erwälen woat, saust du daut äten, du un dien Sän un diene Dochta, un dien Kjnajcht un diene Deenstmejal, un de Levit, dee un diene Dooasch es; un du saust die ver däm Harn, dienem Gott, freien aun aulem waut diene Henj jeschaufen ha.

¹⁹Heed die, daut du de Leviten nich velazst, aul diene Doag en dienem Launt.

²⁰Wan de Har, dien Gott, dien Launt wieda moaken woat, soo aus hee to die jerät haft, un du sajchst: Ekj well Fleesch äten, wiels diene Seel Fleesch äten well, soo muchst du Fleesch äten no aule Lost diene Seel.

²¹Wan de Uat, däm de Har, dien Gott, erwälen woat, om sienen Nomen doahan too saten, too wiet von die, soo schlacht von diene Rinda un von dienem Kjlienvee, daut de Har die jejäft haft, soo aus ekj die befoolen ha, un en diene Dooasch äten no aul diene Seelen-Lost;

²²krakjt soo aus daut Ree un de Hersch jejäten woaren, aulsoo muchst du daut äten; de Orreina un de Reina derwen daut äten.

²³Blooss hool doaraun faust, kjeen Bloot to äten, dan daut Bloot es de Seel; un du saust nich de Seel met däm Fleesch äten;

²⁴du saust daut nich äten, du saust daut oppe Ieed jeeten aus Wota;

²⁵du saust daut nich äten, om daut et die un diene Kjinja no die gootjeit, wiels du deist, waut rajcht enne Uagen Gottes es.

²⁶Doch diene heilje Dinj, dee du haben woascht, un dien vesproaknet saust du nämen un aun däm Uat komen, däm de Har erwälen woat;

²⁷un dien Brauntopfa, daut Fleesch un daut Bloot, saust du oppem Aultoa Gottes, dienem Gott, opfren; un daut Bloot von diene Schlachtopfa saul opp däm Aultoa Gottes, dienem Gott, jegoten woaren, un daut Fleesch doafst du äten.

²⁸Ha acht un hia opp aul dise Wieed, dee ekj die befäl, om daut et die un diene Kjinja no die eewich gootjeit, wiels du deist, waut goot un rajcht enne Uagen Gottes, dienem Gott, es.

²⁹Wan de Har, dien Gott, de Nazionen ver die rutjajcht, no dee du kjeemst, om an ruttojoagen, un du vejajchst dee un wonst en äarem Launt,

³⁰soo heed die, daut du nich von an jefangen woascht, nodäm see ver die vetilcht sent, un daut du nich no äare Jetta frajchst un sajchst: Woo deenden dise Nazionen äare Jetta? Soo well uk ekj aulsoo doonen.

³¹Däm Harn, dienem Gott, saust du nich aulsoo doonen; dan aules, waut fa däm Harn een Aufschu es, waut hee haust, ha see äare Jetta jedonen; dan soogoa äare Säns un äare Dajchta ha see äare Jetta met Fia vebrent.