Read De Bibel JHF 5. Mose 13 Bible Online

5. Mose 13 - De Bibel JHF bible

5. Mose 13

¹Daut gaunze Wuat, daut ekj junt befäl, daut sell jie hoolen, daut to doonen; du saust nuscht doatoo un nuscht doavon doonen.

²Wan en diene Medd een Profeet oppsteit, ooda eena, dee Dreem haft, un hee jeft die een Tieekjen ooda een Wunda;

³un daut Tieekjen ooda daut Wunda traft en, von däm hee to die jerät haft, endäm hee sajcht: Lot ons aundre Jetta nogonen, (dee du nich jekjant hast), un an deenen!

⁴Soo saust du nich opp disem Profeet siene Wieed hieren ooda opp däm, dee de Dreem haft; dan de Har, jun Gott, prooft junt, om to erkjanen, auf jie däm Harn, junem Gott, leewen met junem gaunzen Hoaten un met june gaunze Seel.

⁵Däm Harn, junem Gott, sell jie nofoljen un am ferchten; un jie sellen siene Jebooten hoolen un siene Stemm jehorchen un am deenen un am aunhenjen.

⁶Un jan Profeet ooda jana, dee de Dreem haud, saul dootjemoakt woaren; dan hee haft Auffaul jäajen däm Harn, junem Gott, jerät, dee junt ut däm Ägiptenlaunt rutjefieet un die erleest haft - ut däm Hus de Kjnajchtschoft, - om die von däm Wajch auftobrinjen, opp däm too waundlen de Har, dien Gott, die befoolen haft. Un du saust daut Beese ut diene Medd wajchschaufen.

⁷Wan dien Brooda, de Sän von diene Mutta, ooda dien Sän, ooda diene Dochta, ooda diene Fru aun dienem Bossem, ooda dien Frint, dee die aus eene Seel es, die heimlich äwaräd un sajcht: Lot ons gonen un aundre Jetta deenen, (dee du nich jekjant hast, du noch diene Vodasch,

⁸von de Jetta de Velkja, dee runtom junt sent, dicht bie die ooda wiet von die, von eenem Enj de Ieed bat nom aundren Enj de Ieed),

⁹soo saust du nich ennwellje un nich opp am hieren; un dien Uag saul an nich schoonen, un du saust die äwa am nich erboarmen noch am vestäakjen;

¹⁰sonda du saust am dootmoaken. Diene Haunt saul aus ieeschte aun am sennen, am doottomoaken, un doano de Haunt vom gaunzen Volkj;

¹¹un du saust am steenjen, daut hee stoaft; dan hee haft vesocht, die auftoleiden von däm Harn, dienem Gott, dee die rutjefieet haft ut däm Ägiptenlaunt, ut däm Hus de Kjnajchtschoft.

¹²Un gaunz Israel saul daut hieren un sikj enjsten, doamet maun nich mea soo eene Iebeldot en diene Medd bejeit.

¹³Wan du von eene diene Städa, dee de Har, dien Gott, die jeft, om doatoo wonen, sajen hieescht:

¹⁴Daut sent Mana, Säns Belial, ut diene Medd utjegonen un ha de Bewona äare Staut veleit un jesajcht: Lot ons gonen un aundre Jetta deenen, - (dee jie nich jekjant ha),

¹⁵soo saust du jeneiw unjasäkjen un noforsche un froagen; un kjikj, es daut de Woarheit, steit de Sach faust, daut Aufschu en diene Medd veeewt wort,

¹⁶soo saust du de Bewona jane Staut jewess met eenem schoapen Schwieet schlonen; du saust an vebaunen un aules, waut en ar es, un äa Vee, met däm schoapen Schwieet schlonen.

¹⁷Un aul äa Raup saust du medden enne Staut opp eenem Plauz toopdroagen un aul äa Raup däm Harn, dienem Gott, gaunz met Fia vebrennen; un see saul een Mellhupe eewich sennen, see saul nich wada oppjebut woaren.

¹⁸Un lot nuscht von däm Vebaunten aun diene Haunt henjen, om daut de Har sikj von Zorngloot dreit un die Erboarmunk jeft un sikj äwa die erboarmt un die vemieet, soo aus hee diene Vodasch jeschwuaren haft,

¹⁹wan du de Stemm Gottes, dienem Gott, jehorchst, aul siene Jebooten too hoolen, dee ekj die vondoag befäl, daut du deist, waut enne Uagen Gottes, dienem Gott, rajcht es.