Read De Bibel JHF 5. Mose 18 Bible Online

5. Mose 18 - De Bibel JHF bible

5. Mose 18

¹De Priesta, de Levit, de gaunza Staum Levi, sellen kjeen Deel noch Oaw met Israel ha; de Fiaopfa Gottes un sien Oawdeel sellen see äten.

²Oba hee saul kjeen Oawdeel enne Medd siene Breeda ha; de Har es sien Oawdeel, soo aus hee to am jerät haft.

³Un dit saul daut Rajcht de Priesta sennen, waut an vom Volkj tosteit, von dän, dee een Schlachtopfa opfren, daut es een Rind- ooda Kjlienvee: Maun saul däm Priesta de Schulla jäwen un de Kjennbaken un de Moag.

⁴Daut Ieeschte von dienem Jeträajd, von dienem jungen Wien un dienem Eelj, un daut Ieeschte vom Schop schäaren saust du am jäwen;

⁵dan am haft de Har, dien Gott, erwält ut aul diene Stam, doamet hee doa steit, om däm Deenst em Nomen Gottes to doonen, hee un siene Säns, aule Doag.

⁶Un wan de Levit komen woat ut eenem diene Dooasch, ut gaunz Israel, wua hee sikj opphelt, un hee kjemt met aule Lost - siene Seel aun däm Uat, däm de Har erwälen woat,

⁷un deit däm Deenst em Nomen Gottes, sienem Gott, aus aule siene Breeda, de Leviten, dee doa selfst ver däm Harn stonen:

⁸Soo sellen see dee selje Deele äten, buta däm, waut hee von sienem Voda sienem Ieejentum vekoft haft.

⁹Wan du en daut Launt kjeemst, daut de Har, dien Gott, die jeft, soo saust du nich lieren, nodäm Aufschu de Nazionen to doonen.

¹⁰Daut saul kjeena unja die jefungen woaren, dee sienen Sän ooda siene Dochta derch daut Fia gonen lat, kjeena, de Woasajarie drift, kjeen Zaubra ooda Beschwäara ooda Magie drift,

¹¹ooda eena de met Baun belajcht ooda Doodes-Beschwäara ooda Woasaja ooda dee Doodes befrajcht.

¹²Dan een Aufschu fa däm Harn es een jiedra, dee dise Dinj deit; un om dise Aufschu wellen jajcht de Har, dien Gott, an ver die rut.

¹³Du saust jäajenäwa däm Harn, dienem Gott, vollkomen sennen.

¹⁴dan dise Nazionen, dee du rutjoagen woascht, hieren opp Zaubra un opp Woasaja; oba du - nich aulsoo haft de Har, dien Gott, die erlaubt.

¹⁵Eenem Profeet ut diene Medd, ut diene Breeda, aus mie, woat de Har, dien Gott, die erwakjen; opp am sell jie hieren;

¹⁶no aulem, waut du von däm Harn, dienem Gott, aum Horeb jewenscht hast aum vesaumlungs Dach, endäm du sädst: Ekj mucht nich wiedahan dee Stemm Gottes, mienem Gott, hieren, un dit groote Fia mucht ekj nich mea seenen, daut ekj nich stoaw!

¹⁷Un de Har räd to mie: Goot es, waut see jesajcht ha.

¹⁸Eenen Profeet, aus die, well ekj an ut de Medd äare Breeda erwakjen; un ekj well miene Wieed en sienem Mul lajen, un hee woat aules to an räden, waut ekj am befälen woa.

¹⁹Un daut woat passieren, dee Maun, dee nich opp miene Wieed hieet, dee hee en mienem Nomen räden woat, von däm woa ekj daut fodren.

²⁰Doch de Profeet, dee sikj true woat, en mienem Nomen een Wuat to räden, daut ekj am nich befoolen ha to räden, ooda dee em Nomen von aundre Jetta räden woat; dee selje Profeet saul stoawen.

²¹Un wan du en dienem Hoaten sajchst: Woo sell wie daut Wuat erkjanen, daut de Har nich jerät haft?

²²Wan de Profeet em Nomen Gottes räd, un daut Wuat passieet nich un nich en traft, soo es daut een Wuat, daut de Har nich jerät haft; met Veachtunk haft de Profeet daut jerät; du saust die nich fa am ferchten.