Read De Bibel JHF 5. Mose 20 Bible Online

5. Mose 20 - De Bibel JHF bible

5. Mose 20

¹Wan du jäajen diene Fiend toom Kjrich utjeist un Pieed un Woages sitst, een Volkj, jrata aus du, soo saust du die nich ver an enjsten; dan de Har, dien Gott, es met die, dee die ut däm Ägiptenlaunt noppjefieet haft.

²Un daut saul passieren, wan daut to ne Schlacht kjemt, soo saul de Priesta doatoo komen un toom Volkj räden,

³un to an sajen: Hea, Israel! Jie gonen vondoag em Kaumf jäajen june Fiend; jun Hoat vezoag nich, habt nich Angst un siet nich enjstlich un grult junt nich fa an;

⁴dan de Har, jun Gott, es daut, dee met junt jeit, om fa junt too strieden met june Fiend, om junt to raden.

⁵Un de Väastona sellen toom Volkj räden un sajen: Wäa es de Maun, dee een nieet Hus jebut haft un daut nich enjeweit haft? Hee go han un jeit no sienem Hus trigj, doamet hee nich enne Schlacht stoaft, un een aundra Maun daut enweit.

⁶Un wäa es de Maun, dee eenen Wienboajch jeplaunt un am noch nich benutzt haft? Hee saul gonen un go trigj no sienem Hus, doamet hee nich enne Schlacht stoaft, un een aundra Maun am benutzt.

⁷Un wäa es de Maun, dee sikj met eene Fru (Mejal) oppjeboden haft un hee ar noch nich jenomen haft? Hee go han un jeit no sienem Hus trigj, doamet hee nich enne Schlacht stoaft, un een aundra Maun ar nemt.

⁸Un de Väastona sellen wieda toom Volkj räden un sajen: Wäa es de Maun, dee Angst haft un vezoagdet Hoat haft? Hee go han un jeit no sienem Hus trigj, doamet nich daut Hoat siene Breeda vezoagt woat aus sien Hoat.

⁹Un daut saul passieren, wan de Väastona oppjehieet ha, toom Volkj to räden, soo sellen see de Häabowaschte aune Spetz vom Volkj stalen.

¹⁰Wan du aun eene Staut noda kjeemst, jäajen ar too strieden, soo saust du ar Fräd aunbeeden.

¹¹Un daut saul passieren, wan see die en Fräd opmoakt, soo saul aulet Volkj, daut sikj doa befinjt, die unjadon sennen un die deenen.

¹²Un wan see nich Fräd met die moaken, sonda met die Kjrich fieren, soo saust du an beloagren;

¹³un jeft de Har, dien Gott, an en diene Haunt, soo schlo aul äare Menliche met däm schoapen Schwieet.

¹⁴Doch de Frues un de Kjinja, un daut Vee un aules, waut enne Staut sennen woat, aul äa Raup, saust du fa die nämen; un du saust däm Raup diene Fiend Äten, dee de Har, dien Gott, die jejäft haft.

¹⁵Aulsoo saust du aule Städa doonen, dee sea wiet von die sent, dee nich von de Städa dise Nazionen hia sent.

¹⁶Oba von de Städa dise Velkja, dee de Har, dien Gott, die aus Oawdeel jeft, saust du nich läwen loten, waut Odem haft;

¹⁷sonda du saust an vebaunen; de Hetita un de Amorita, de Kanaanita un de Perisita, de Hewita un de Jebusita, aus de Har, dien Gott, die befoolen haft;

¹⁸om daut see die nich lieren, to doonen no aul äare Aufschu, dee see äare Jetta jedonen ha, un jie nich sindjen jäajen däm Harn, junem Gott.

¹⁹Wan du eene Staut väl Doag beloagren woascht, endäm du Kjrich jäajen an fiescht, om an entonämen, soo saust du äare Beem nich vedoawen, endäm du daut Biel jäajen an opphäwst, (dan du kaust doavon äten), un saust an nich aufhaken; dan es de Boom oppe Stap een Mensch, daut hee ver die en Beloagrunk komen sull?

²⁰Blooss dee Beem, von dee du weetst, daut see kjeene Beem sent, von de maun at, dee doafst du aufhaken un vedoawen; un du doafst Beloagrungswalle doavon jäajen de Staut buen, dee Kjrich met die fieet, bat see jefollen es.