Read De Bibel JHF 5. Mose 21 Bible Online

5. Mose 21 - De Bibel JHF bible

5. Mose 21

¹Wan en däm Launt, daut de Har, dien Gott, die jeft, daut ennämst, een Doodja oppem Flekj lidjent jefungen woat, onen daut hee bekaunt es, wäa am omjebrocht haft,

²soo sellen diene Eltestasch un diene Rechta rutgonen un vom Doodjen bat aun de Städa mäten, dee runtom sent.

³Un daut passieet; de Staut, dee däm Omjebrochten aum dichtsten es - dee Eltestasch von jane Staut sellen eene junge Koo von de Rinda nämen, met dee noch nich jeoabeit wort, dee noch nich aum Joch jetrocken haft;

⁴un de Eltestasch sellen de junge Koo no eenem ranendem Wota raufleiden, en däm nich jeoabeit woat, un sellen de junge Koo daut Jenekj bräakjen.

⁵Un de Priesta, de Säns Levi, sellen nodakomen; om to deenen un em Nomen Gottes too säajnen; un no äarem utspruch saul bie jiedrem Rajchtstriet un bie jiedre Velazung daut passieren.

⁶Un aule Eltestasch ut jane Staut, dee däm Omjebrochten aum dichtsten sent, sellen äare Henj äwa de junge Koo wauschen, däa daut Jenekj aum Wota es jebroaken worden,

⁷un sellen auntwuaden un sajen: Onse Henj ha dit Bloot nich vegoten, un onse Uagen ha daut nich jeseenen;

⁸vezei, Har, dienem Volkj Israel, daut du erleest hast, un laj nich onschuldjet Bloot enne Medd von dienem Volkj Israel. Un de Blootschult woat an vezeit woaren.

⁹Un du, du saust daut oschuldje Bloot ut diene Medd wajchschaufen; dan du saust doonen, waut rajcht enne Uagen Gottes es.

¹⁰Wan du jäajen diene Fiend em Kjrich jeist, un de Har, dien Gott, an en diene Henj jeft, un du äare Jefangne wajchfieescht,

¹¹un du sitst unjre Jefangne eene Fru, scheen von Jestault, un hast no ar Lost un nämst ar die to Fru,

¹²soo saust du ar en dien Hus brinjen; un see saul äa Haupt schäaren un äare Näajel beschnieden,

¹³un de Kjleeda äare Jefangenschoft von sikj auflajen; un see saul en dienem Hus bliewen un äarem Voda un äare Mutta eenen Moonat lank behielen; un nodäm doafst du no ar engonen, daut see diene Fru es.

¹⁴Un daut saul passieren, wan du kjeen jefaulen mea aun ar hast, soo saust du ar no äarem Wensch entloten; oba du doafst ar nich fa Jelt vekjeepen; du saust ar nich aus eene Sklowin behaundlen, doawäajen daut du ar schwak jemoakt hast.

¹⁵Wan een Maun twee Frues haft, eene jeleewde un eene jehausste, un see jebäaren am Säns, de jeleewde un de jehausste, un de ieeschtjebuarna Sän es von de jehausste;

¹⁶soo saul daut passieren, aun däm Dach, doa hee siene Säns oawen lat waut sient es; hee kaun nich däm Sän de jeleewde toom Ieeschtjebuarnen moaken ver däm Sän de jehausste, däm Ieeschtjebuarnen;

¹⁷sonda däm Ieeschtjebuarnen, däm Sän de jehausste, saul hee aunerkjanen, daut hee am 2 Deel von aulem jeft, waut en sienem Ieejentum jefungen woat; dan hee es de Ieeschta siene Krauft, am jehieet daut Rajcht de Ieeschtjeburt.

¹⁸Wan een Maun eenen wadaspanstjen un äjenwelljen Sän haft, dee oppe Stemm von sienem Voda un siene Mutta nich hieet, un see strofen am, oba hee hieet nich opp an;

¹⁹soo saul sien Voda un siene Mutta am nämen un am no de Eltestasch en siene Staut un nom Uatsdooa rutfieren,

²⁰un sellen to de Eltestasch de Staut sajen: Disa, ons Sän es wadaspanstich un äjenwellich, hee hieet nich opp onse Stemm, hee es een Jewault doonenda un Drinkja!

²¹Un aule Lied de Staut sellen am steenjen, daut hee stoaft; un du saust daut Beese ut diene Medd wajchschaufen. Un gaunz Israel saul daut hieren un sikj enjsten.

²²Un wan aun eenem Maun eene doodes Sind es, un hee woat dootjemoakt, un du henjst am aun een Holt,

²³soo saul sien Kjarpa nich äwa Nacht aum Holt bliewen, sonda du saust am aun däm seljen Dach begrowen; dan een fluch Gottes es een Jehenjda; un du saust dien Launt nich veonreinjen, daut de Har, dien Gott, die aus Oawdeel jeft.