Read De Bibel JHF 5. Mose 22 Bible Online

5. Mose 22 - De Bibel JHF bible

5. Mose 22

¹Du saust nich daut Rind von dienem Brooda ooda daut Kjlienvee omhäa erren seenen un die von an trigjtrakjen; du saust dee dienem Brooda trigjbrinjen.

²Oba wan dien Brooda nich dicht bie die es, un du kjanst am nich, soo saust du an en dienem Hus oppnämen, daut see bie die sent, bat dien Brooda an sieekjt; dan jeff am dee trigj.

³Un krakjt soo saust du daut met sienem Äsel doonen, un krakjt soo met sienem Kjleet, un krakjt soo saust du met aulem Veloarnem von dienem Brooda doonen, daut am veloaren jeit un daut du finjst; du kaust die nich trigjtrakjen.

⁴Du saust nich däm Äsel von dienem Brooda ooda sien Rind oppem Wajch faulen seenen un die an nich aunnämen; du saust an opphalpen.

⁵Daut sellen nich Maunskjleeda opp eene Fru sennen, un een Maun saul nich Frueskjleeda auntrakjen, dan wäa soowaut deit, es een Aufschu ver däm Harn, dienem Gott.

⁶Wan du hinjawäajes een Voagelnast finjst, opp irjent eenem Boom ooda oppe Ieed, met Junge ooda Eia, un de Mutta sett opp de Junge ooda oppe Eia, soo saust du nich de Mutta met de Junge nämen;

⁷du saust de Mutta flieejen loten, un de Junge kaust du nämen; om daut et die gootjeit un du diene Doag velenjascht.

⁸Wan du een nieet Hus bust, soo saust du eenen Tun om dien Dak moaken, doamet du nich eene Blootschult opp dien Hus brinjst, wan irjent wäa von däm seljen rauffelt.

⁹Du saust dienen Wienboajch nich met 2 Sorte beseien, doamet nich daut Gaunze däm Heilichtum vefelt: daut Sot, daut du jeseit hast, un de Wienarnte.

¹⁰Du saust nich met eenem Rind un eenem Äsel toop plieejen.

¹¹Du saust nich Kjleeda auntrakjen von veschiednem Zeich, Woll un Leiwent toop.

¹²Du saust die Tollen aun dienem Mauntel moaken, doamet du die bedakjst.

¹³Wan een Maun eene Fru nemt un no ar ennjeit, un hee haust ar,

¹⁴un lajcht ar Dinj toom Jeräd opp un brinjt äwa ar eenen beesen Nomen un sajcht: Dise Fru ha ekj jenomen un sie ar noda jekomen un ha aun ar de Tieekjen von eene Junkfru nich jefungen;

¹⁵soo sellen de Voda un de Mutta (de Elre) von de junge Fru de Jungfrutieekjen von de junge Fru nämen un no de Eltestasch de Staut en daut Dooa rutbrinjen;

¹⁶un de Voda von junge Fru saul to de Eltestasch de Staut räden: Ekj ha disem Maun miene Dochta to Fru jejäft, un hee haust ar;

¹⁷un kjikj, hee lajcht ar Dinj toom Jeräd opp un sajcht: Ekj ha aun diene Dochta de Jungfrutieekjen nich jefungen. Un hia sent de Jungfrutieekjen von miene Dochta. Un see sellen daut Duak ver de Eltestasch de Staut utbreeden.

¹⁸Un de Eltestasch von jane Staut sellen däm Maun nämen un am strofen;

¹⁹un see sellen am om 100 Schekel Selwa strofen un daut däm Voda von de junge Fru jäwen, wiels hee eenen beesen Nomen äwa eene Junkfru en Israel utjebreet haft. Un see saul siene Fru sennen; hee kaun ar aul siene Doag nich veloten.

²⁰Oba wan jane Sach Woarheit jewast es, daut de Jungfrutieekjen aun de junge Fru nich jefungen worden,

²¹soo sellen see de junge Fru rutfieren aum Engank vom Vodahus, un de Mana äare Staut sellen ar steenjen, daut see stoaft, wiels see eene Schaunddot en Israel begonen haft, en äarem Vodahus too huaren. Un du saust daut Beese ut diene Medd wajchschaufen.

²²Wan een Maun bie eene Fru ligjen - jefungen woat, daut eenem Maun sien Ehefru es, soo sellen see beid stoawen, de Maun, dee bie de Fru jeläajen haft, un de Fru. Un du saust daut Beese ut Israel wajchdoonen.

²³Wan eene Mejal, eene Junkfru, met eenem Maun oppjeboden es, un daut finjt sikj een Maun enne Staut un licht bie ar,

²⁴soo sell jie an beid nom Dooa jane Staut rutfieren un an steenjen, daut see stoawen: De Mejal doarom, daut see nich enne Staut jeschräajen haft, un de Maun doawäajen, wiels hee de Fru von sienem Näakjsten schwak jemoakt haft. Un du saust daut Beese ut diene Medd wajchschaufen.

²⁵Oba wan een Maun de oppjebodne Mejal oppe Stap finjt, un de Maun jript ar un licht bie ar, soo saul de Maun, dee bie ar jeläajen haft, auleen stoawen.

²⁶Oba de Mejal saust du nuscht doonen, aun de Mejal es kjeene Sind toom Doot; dan soo aus een Maun sikj erhäft jäajen sienem Näakjsten un am dootschleit, aulsoo es dise Sach.

²⁷Dan hee haft ar oppe Stap jefungen; de oppjeboddne schrieech, oba kjeena rad ar.

²⁸Wan een Maun eene Mejal finjt, eene Junkfru, dee nich oppjeboden es, un jript ar un licht bie ar, un see woaren jefungen;

²⁹soo saul de Maun, dee bie ar jeläajen haft, däm Voda von de Mejal 50 Schekel Selwa jäwen; un see saul siene Fru sennen, doarom daut hee ar schwak jemoakt haft, hee kaun ar aul siene Doag nich entloten.