Read De Bibel JHF 5. Mose 27 Bible Online

5. Mose 27 - De Bibel JHF bible

5. Mose 27

¹Un Moses un de Eltestasch von Israel befoolen däm Volkj un säden: Hoolt daut gaunze Jeboot, daut ekj junt vondoag befäl!

²Un daut saul passieren, aun däm Dach, doa jie äwa däm Jordan en daut Launt äwagonen, daut de Har, dien Gott, die jeft, saust du die groote Steena opprechten un dee met Kaulkj aunpenslen;

³un wan du äwajegonen best, saust du aul de Wieed von disem Jesaz doanopp schriewen, doamet du en daut Launt kjeemst, daut de Har, dien Gott, die jeft, een Launt, daut von Malkj un Honnich rant, soo aus de Har, de Gott diene Vodasch, to die jerät haft.

⁴Un daut saul passieren, wan jie äwa däm Jordan jegonen sent, soo sell jie dise Steena, aus ekj junt befäl, oppem Boajch Ebal opprechten; un du saust dee met Kaulkj aunpenslen.

⁵Un du saust doa selfst däm Harn, dienem Gott, eenen Aultoa buen, eenen Aultoa von Steen; du saust kjeen Iesa doa aunlajen;

⁶von gaunze Steena saust du däm Aultoa Gottes, dienem Gott, buen. Un du saust däm Harn, dienem Gott, Brauntopfa doabowen opfren,

⁷un du saust Dankopfa opfren, un doa selfst äten un die ver däm Harn, dienem Gott freien.

⁸Un opp dee Steena saust du aule Wieed von disem Jesaz schriewen, endäm du dee dietlich enngraviere saust.

⁹Un Moses un de Priesta, de Leviten, räden too gaunz Israel un säden: Sie stell un hia, Israel! Aun disem Dach best du däm Harn, dienem Gott, toom Volkj jeworden.

¹⁰Soo jehorch de Stemm Gottes, dienem Gott, un doo siene Jebooten un siene Sazungen, dee ekj die vondoag befäl.

¹¹Un Moses befool däm Volkj aun däm seljen Dach un säd:

¹²Wan jie äwa däm Jordan jegonen sent, sellen dise opp däm Boajch Gerisim stonen, om daut Volkj too säajnen: Simeon un Levi un Juda un Isachar un Josef un Benjamin;

¹³un dise sellen opp däm Boajch Ebal stonen toom Fluchen: Ruben, Gad un Aser un Sebulon, Dan un Naftali.

¹⁴Un de Leviten sellen auntwuaden un to aule Mana von Israel met ne lude Stemm sajen:

¹⁵Veflucht es dee Maun, dee een jeschnitztet ooda een jegotnet Bilt moakt, een Aufschu ver däm Harn, een jemoaktet Konstwoakj un daut em jeheimen oppstallt! Un daut gaunze Volkj auntwuad un saj: Amen!

¹⁶Veflucht es, wäa sienen Voda ooda siene Mutta veacht! Un daut gaunze Volkj saj: Amen!

¹⁷Veflucht es, wäa de Jrens von sienem Näakjsten veschift! Un daut gaunze Volkj saj: Amen!

¹⁸Veflucht es, wäa eenen Blinjen oppem Wajch err fieet! Un daut gaunze Volkj saj: Amen!

¹⁹Veflucht es, wäa daut Rajcht vom Framden, de Weis un de Wätfru bicht! Un daut gaunze Volkj saj: Amen!

²⁰Veflucht es, wäa bie de Fru von sienem Voda licht, dan hee haft de Dakj von sienem Voda opjedakjt! Un daut gaunze Volkj saj: Amen!

²¹Veflucht es, wäa bie irjent eenem Vee licht! Un daut gaunze Volkj saj: Amen!

²²Veflucht es, wäa bie siene Sesta licht, de Dochta von sienem Voda ooda de Dochta von siene Mutta! Un daut gaunze Volkj saj: Amen!

²³Veflucht es, wäa bie siene Schwiamutta licht! Un daut gaunze Volkj saj: Amen!

²⁴Veflucht es, wäa sienem Näakjsten em jeheemen ombrinjt! Un daut gaunze Volkj saj: Amen!

²⁵Veflucht es, wäa een Jeschenkj nemt, om irjent eenem omtobrinjen, onschuldjet Bloot too vejeeten! Un daut gaunze Volkj saj: Amen!

²⁶Veflucht es, wäa de Wieed von disem Jesaz nich helt un dee nich deit! Un daut gaunze Volkj saj: Amen!