Read De Bibel JHF 5. Mose 28 Bible Online

5. Mose 28 - De Bibel JHF bible

5. Mose 28

¹Un daut woat passieren, wan du de Stemm Gottes, von dienem Gott, hieren woascht un doaropp acht jeefst, aul siene Jebooten to doonen, dee ekj die vondoag befäl, soo woat de Har, dien Gott, die toom hechsten äwa aule Nazionen moaken;

²un aul dise Säajnungen woaren äwa die komen un woaren die trafen, wan du de Stemm Gottes, von dienem Gott, horchen woascht.

³Jesäajent woascht du sennen enne Staut, un jesäajent woascht du sennen oppem Flekj.

⁴Jesäajent woat de Frucht von dienem Lief un de Frucht von dienem Launt un de Frucht von dienem Vee, de Frucht von diene Rinda un de Zucht von dienem Kjlienvee.

⁵Jesäajent woat dien Korf un dien Baktroch.

⁶Jesäajent woascht du sennen bie dienem Engank, un jesäajent woascht du sennen bie dienem Utgank.

⁷De Har, woat diene Fiend, dee jäajen die oppstonen, ver die schlonen; opp eenem Wajch woaren see ver die wajchgonen un opp 7 Wäaj woaren see ver die ranen.

⁸De Har woat die däm Säajen jäwen en diene Spikjasch un to aulem Jeschaft diene Henj, un hee woat die säajnen en däm Launt, daut de Har, dien Gott, die jeft.

⁹De Har woat die aus een heiljet Volkj opprechten, aus hee die jeschwuaren haft, wan du de Jebooten Gottes, dienem Gott, helst un opp siene Wäaj waundelst;

¹⁰un aule Velkja de Ieed woaren seenen, daut du nom Nomen Gottes jenant best, un woaren sikj ver die enjsten.

¹¹Un de Har woat die Äwafluss jäwen aun de Frucht von dienem Lief un aun de Frucht von dienem Vee un aun de Frucht von dienem Aka, oppem Launt, daut de Har diene Vodasch jeschwuaren haft, die to jäwen.

¹²De Har woat die sienen gooden schaz, däm Himmel, opmoaken, om dienem Launt däm Räajen to siene Tiet to jäwen, un om aulet Woakj von diene Henj too säajnen; un du woascht väl Nazionen lieen, oba du woascht von kjeenem lieen.

¹³Un de Har woat die toom Haupt moaken un nich toom Zoagel, un du woascht blooss emma hecha komen un nich trigj gonen, wan du de Jebooten Gottes, dienem Gott, hieren woascht, dee ekj die vondoag too hoolen un to doonen befäl.

¹⁴Un nich aufjeist von aul de Wieed, dee ekj die vondoag befäl, noch no rajchtsch noch no linkjsch, om aundre Jetta notogonen, an to deenen.

¹⁵Oba daut woat passieren, wan du de Stemm Gottes, von dienem Gott, nich hieescht, daut du doaropp nich acht jeefst, aul siene Jebooten un siene Sazungen to doonen, dee ekj die vondoag befäl, soo woat aul dis Fluch äwa die komen un die trafen.

¹⁶Veflucht woascht du sennen en de Staut, un veflucht woascht du oppem Flekj sennen.

¹⁷Veflucht woat dien Korf un dien Baktroch sennen.

¹⁸Veflucht woat de Frucht von dienem Lief sennen un de Frucht von dienem Launt, de Frucht von diene Rinda un de Frucht von dienem Kjlienvee.

¹⁹Veflucht woascht du bie dienem Engank sennen, un veflucht woascht du bie dienem Utgank sennen.

²⁰De Har woat dien Fluch, Vewerrunk un Onsäajen en aulem Jeschaft diene Henj jäajen die schekjen, daut du deist, bat du vetilcht best, un du omkjemst wäajen de Boosheit diene Haundlungen, daut du mie veloten hast.

²¹De Har woat de Past aun die baken loten, bat hee die ut däm Launt oppjeräwen haft, wuahan du kjeemst, om daut entonämen.

²²De Har woat die schlonen met Schwindel un met Feeba un met Hett un met Braunt un met drieeje Tieden un met Jeträajdbraunt un met Gaulsucht, un dee woaren die vefoljen, bat du omkjemst.

²³Un dien Himmel, dee äwa dienem Haupt es, woat Koppa sennen, un de Ieed, dee unja die es, Iesa.

²⁴De Har woat aus Räajen äwa dienem Launt Stoff un Saunt jäwen; vom Himmel woat hee opp die raufkomen, bat du vetilcht best.

²⁵De Har woat die ver diene Fiend schlonen; opp eenem Wajch woascht du jäajen an uttrakjen, un opp 7 Wäaj woascht du fa an ranen, un du woascht omhäa jejoach woaren en aule Kjennichrikjs de Ieed toom Entsaten [Spott] sennen.

²⁶Un dien Doodeskjarpa woat aule Himmelsväajel un de Tieren oppe Ieed toom Fross woaren, un kjeena woat an wajchjoagen.

²⁷De Har woat die met de ägiptische Schwäaren schlonen, un met Bule un met Schorf un met Gnauts, daut du nich jesunt woaren kaust.

²⁸De Har woat die met Wonsenn un met Blintheit un met Vewerrunk em Hoaten schlonen;

²⁹un du woascht opp Meddach omhäa feelen, un du woascht kjeen Jelinje opp dienem Wajch haben; un du woascht blooss bedrekjt un aule Doag beraupt sennen, un kjeena woat die raden.

³⁰Met eene Fru woascht du die oppbeeden loten, un een aundra Maun woat met ar schlopen; een Hus woascht du buen un nich doabennen wonen; eenen Wienboajch woascht du plaunten un am nich benutzen.

³¹Dien Rind woat ver diene Uagen jeschlacht woaren, un du woascht nich doavon äten; dien Äsel woat ver dienem Aunjesecht jestolen woaren un nich no die trigjkomen; dien Kjlienvee woat diene Fiend jejäft woaren, un du woascht kjeenem haben, dee die halpen woat.

³²Diene Säns un diene Dajchta woaren eenem aundren Volkj jejäft woaren, un diene Uagen woaren daut seenen un woaren no an däm gaunzen Dach schmachten; oba daut woat nich enne Macht von diene Henj sennen.

³³De Frucht von dienem Launt un aul diene Oabeit woat een Volkj oppfräten, daut du nich kjanst; un du woascht blooss bedrekjt un jeploagt aule Doag sennen.

³⁴Un du woascht Wonsennich woaren von däm waut diene Uagen seenen motten.

³⁵De Har woat die schlonen met beese Schwäaren aune Kjnee un aune Schinkjes, von diene Footsohl bat dienem Kjriesel, daut du nich woascht jesunt woaren kjennen.

³⁶De Har woat die un dienem Kjennich, däm du äwa die saten woascht, no eene Nazion fieren, dee du nich jekjant hast, du noch diene Vodasch; un du woascht doa aundre Jetta deenen, Holt un Steen.

³⁷Un du woascht toom Entsaten woaren, toom Sprechwuat un toom Spott unja aule Velkja, wuahan de Har die wajchjoagen woat.

³⁸Väl Sot woascht du oppem Flekj utseien; oba weinich woascht du ensaumlen, dan de Heischrakjen woaren daut auffräten.

³⁹Wienboajch woascht du plaunten un buen; oba Wien woascht du nich drinkjen noch ensaumlen, dan de Worm woat daut fräten.

⁴⁰Eeljbeem woascht du haben en aul diene Jrensen; oba met Eelj woascht du die nich saulwen, dan dien Eeljboom woat de Frucht von sikj schmieten.

⁴¹Säns un Dajchta woascht du jebäaren; oba see woaren die nich jehieren, dan see woaren enne Jefangenschoft gonen.

⁴²Aul diene Beem un de Laundesfrucht woat daut Onjezeffa nämen.

⁴³De Framda, dee en diene Medd es, woat hecha un hecha äwa die komen, un du, du woascht deepa un deepa rauffoaren.

⁴⁴Hee woat die lieen, oba du woascht am nich lieen; hee woat toom Haupt, oba du woascht toom Zoagel woaren.

⁴⁵Un aul dis Fluch woat äwa die komen un die vefoljen un die trafen, bat du vetilcht best; wiels du de Stemm Gottes, dienem Gott, nich jehieet hast, siene Jebooten un siene Sazungen too hoolen, dee hee die befoolen haft.

⁴⁶Un see woaren toom Tieekjen un toom Wunda aun die sennen un aun dienem Somen bat enne Eewichkjeit.

⁴⁷Doafäa daut du däm Harn, dienem Gott, nich met Freid un met een schaftjet Hoat jedeent hast wäajen däm Äwafluss aun aulem,

⁴⁸woascht du diene Fiend deenen, dee de Har jäajen die schekjen woat, en Hunga un en Darscht un en Noaktheit un en Mangel aun aulem; un hee woat een iesanet Joch opp dienem Hauls lajen, bat hee die vetilcht haft.

⁴⁹De Har woat von wiet auf, vom Enj de Ieed häa, eene Nazion jäajen die häa fieren, aus de Odla flicht, eene Nazion, dee äare Sproak du nich vesteist;

⁵⁰eene Nazion met eenem hoaden Aunjesecht, dee de Jreise Persoon nich aunsitt un däm Jung sikj nich erboarmt;

⁵¹un dee de Frucht von dienem Vee un de Frucht von dienem Launt fräten woat, bat du vetilcht best; dee die noch Jeträajd, noch jungen Wien, noch Eelj, noch de Frucht von diene Rinda, noch de Frucht von dienem Kjlienvee äwaloten woat, bat see die too Grunt jerecht ha.

⁵²Un see woaren die en aule Dooasch beloagren, bat diene Mia, de huage un fauste, opp dee du vetrust, en dienem gaunzen Launt jefollen sent; un see woaren en aul diene Dooasch die beloagren, en dienem gaunzen Launt, daut de Har, dien Gott, die jejäft haft.

⁵³Un en de Beloagrunk un en de Bedrenjung, met waut dien Fiend die bedrenjen woat, woascht du de Frucht von dienem Lief äten, daut Fleesch von diene Säns un diene Dajchta, dee de Har, dien Gott, die jejäft haft.

⁵⁴De wäkja un vewanda Maun unja die, däm sien Uag woat scheef opp sienem Brooda kjikjen un opp de Fru aun siene Brost un opp de äwaje siene Kjinja, dee hee äwajehoolen haft,

⁵⁵daut hee kjeenem von an von däm Fleesch siene Kjinja jäwen woat, daut hee at; wiels am nuscht äwajebläwen es en de Beloagrunk un en däm Bedrenkjnis, met waut dien Fiend die en aul diene Dooasch bedrenjen woat.

⁵⁶De Natte unja die un de Vewahnda, dee soo wieekj un vewahnt wia, daut see niemols vesocht ha, äare Footsole oppe Ieed too saten, dee äa Uag woat kjikjen opp däm Maun aun äarem Bossem un opp äarem Sän un opp äare Dochta,

⁵⁷wäajen äare Nojeburt, dee tweschen äare Been väakjemt, un wäajen äare Kjinja, dee see jebäat; dan see woat dee em jeheimen oppäten ut Mangel aun aulem, enne Beloagrunk un enne Bedrenkjnis, met waut dien Fiend die bedrenjen woat en diene Dooasch.

⁵⁸Wan du nich doaropp acht jeefst, aule Wieed von disem Jesaz to doonen, dee en disem Buak jeschräwen sent, daut du disem harlichen un schrakjlichen Nomen, Gottes, dienem Gott, ferchst,

⁵⁹soo woat de Har diene Ploagen un de Ploagen von dienem Somen schrakjlich moaken; groote un bestendje Ploagen, un beese un bestendje Krankheiten.

⁶⁰Un hee woat de Ploagen Ägiptens äwa die brinjen, ver dee du die enjst; un see woaren aun die henjen.

⁶¹Uk de Krankheiten un aule Ploagen, dee nich en disem Jesazbuak jeschräwen sent, - de Har woat dee äwa die komen loten, bat du vetilcht best.

⁶²Un jie woaren äwabliewen aus een jerinjet Hupkje, enne Städ daut jie wieren soo väl aus de Stierns aum Himmel; wiels du de Stemm Gottes, dienem Gott, nich jehieet hast.

⁶³Un daut saul passieren; soo aus de Har sikj äwa junt freid, junt goots to doonen un junt too vemieren, aulsoo woat de Har sikj äwa junt freien, junt too Grunt to brinjen un junt too vetiljen; un jie woaren rutjeräten woaren ut däm Launt, wuahan du kjeemst, om daut entonämen.

⁶⁴Un de Har woat junt unja de Velkja vestreien, von eenem Enj de Ieed bat nom aundren Enj de Ieed; un du woascht doa aundre Jetta deenen, dee du nich jekjant hast, du noch diene Vodasch, - Holt un Steen.

⁶⁵Un unja jane Nazionen woascht du kjeene Ru haben, un diene Footsol woat kjeene Rustäd finjen; un de Har woat die doa selfst een frädlooset Hoat jäwen, un veschmachten Uagen un eene veschmachte Seel.

⁶⁶Un dien Läwen woat schwäwend ver die henjen, un du woascht die enjsten Dach un Nacht un die dienem Läwen nich secha sennen.

⁶⁷Zemorjes woascht du sajen: Wan daut doch Owent wia! Un Oppenowent woascht du sajen: Wan daut doch Zemorjes wia! wäajen de Angst en dienem Hoaten, met waut du die enjst, un wäajen daut aunseenen von diene Uagen, waut du seenen woascht.

⁶⁸Un de Har woat die opp Schäp no Ägipten trigjbrinjen, opp däm Wajch, von däm ekj die jesajcht ha; du saust am niemols wadaseene! Un jie woaren doa selfst june Fiend too Kjnajchts un to Deenstmejales vekoft woaren, oba kjeena woat kjeepen.

⁶⁹Daut sent de Bundeswieed, dee de Har em Launt Moab däm Moses befoolen haft, met de Kjinja Israel too moaken, buta däm Bunt, däm hee aum Horeb met an jemoakt haud.