Read De Bibel JHF 5. Mose 29 Bible Online

5. Mose 29 - De Bibel JHF bible

5. Mose 29

¹Un Moses roopt gaunz Israel un säd to an: Jie ha aules jeseenen, waut de Har ver june Uagen em Ägiptenlaunt jedonen haft, aun däm Farao un aun aul siene Kjnajchts un aun sienem gaunzen Launt;

²de groote Vesieekjungen, dee diene Uagen jeseenen ha, jane groote Tieekjen un Wunda.

³Oba de Har haft junt nich een Hoat jejäft, om to erkjanen, un Uagen, toom kjikjen, un Uaren, to hieren, bat opp disem Dach.

⁴Un ekj ha junt 40 Joa enne Wieste jefieet; june Kjleeda sent nich aun junt vefollen, un diene Schoo sent aun dienem Foot nich aufjenutzt;

⁵Broot ha jie nich jejäten, un Wien un stoakjet Jedrenkj ha jie nich jedrunken; om daut jie erkjanen, daut ekj de Har, jun Gott, sie.

⁶Un aus jie aun disem Uat kaumen, doa jinkj Sihon, de Kjennich von Hesbon, un Og, de Kjennich von Baschan, ut, ons toom Kaumf entjäajen, un wie schluagen an;

⁷un wie neemen äa Launt en un jäwen daut de Rubenita un de Gadita un däm haulwen Staum de Manassita toom Oawdeel.

⁸Soo hoolt dan de Wieed von disem Bunt un doot doano, om daut jie jelinjen en aulem ha, waut jie doonen.

⁹Jie stonen vondoag aula ver däm Harn, junem Gott; june Heipta, june Stam, june Eltestasch un june Väastona,

¹⁰aule Mana von Israel, june Kjinja, june Frues un dien Framda, dee en dienem Loaga es, von dienem Holthacka bat dienem Wotaschapa,

¹¹doamet du em Bunt Gottes, dienem Gott, nennjeist un en sienem Eit, däm de Har, dien Gott, vondoag met die moakt;

¹²om daut hee die vondoag aus sien Volkj ennsat, un hee dien Gott es, aus hee to die jerät haft, un aus hee diene Vodasch, Abraham, Isaak un Jakob, jeschwuaren haft.

¹³Un ekj moak disen Bunt un disem Eit nich met junt aulen,

¹⁴sonda met däm, dee vondoag hia es, dee met ons ver däm Harn, onsem Gott, steit, un met däm, dee vondoag nich met ons hia es.

¹⁵Dan jie weeten, woo wie em Ägiptenlaunt jewont ha, un woo wie medden derch de Nazionen jegonen sent, derch dee jie jegonen sent;

¹⁶un jie ha äa Aufschu jeseenen, un äare Jetta von Holt un Steen, Selwa un Golt, dee bie an sent,

¹⁷daut kjeen Maun ooda Fru, ooda Jeschlajcht ooda Staum unja junt es, däm sien Hoat sikj vondoag von däm Harn, onsem Gott, aufdreit, om hantogonen, de Jetta jane Nazionen to deenen; daut nich eene Wartel unja junt es, dee Jeft un Warmät droagen,

¹⁸un daut passieet, wan hee de Wieed von disem Eit hieet, daut hee sikj en sienem Hoaten säajent un sajcht: Ekj woa Fräd haben, wan ekj uk met Vestockunk en mienem Hoaten waundel! Doamet daut Jedrenkj met däm Darschtjen too Grunt jeit.

¹⁹De Har woat am nich vezeien wellen, sonda dan woat de Oaja Gottes un de Iewa jäajen däm Maun rieekjren loten; un de gaunze Fluch, dee en disem Buak jeschräwen es, woat opp am ruen, un de Har woat sienen Nomen unja däm Himmel uttilje;

²⁰un de Har woat am ut aule Stam Israel toom Onjlekj aufsondren, no aul däm Fluch vom Bunt, dee en disem Jesazbuak jeschräwen es.

²¹Un daut komenden Jeschlajcht, june Kjinja, dee no junt komen woaren, un de Utlenda, dee ut däm wieden Launt komen woat, woaren sajen, wan see de Ploag von disem Launt seenen un siene Krankheiten, met waut de Har daut jeschloagen haft,

²²daut sien gaunzet Launt Schwäwel un Solt, een Braunt es, daut et nich beseit woat un nuscht oppkomen lat, un kjeen Krut doa väakjemt, aus de Vewustunk von Sodom un Gomorra, Adama un Zebojim, dee de Har en sienem Oaja un en sienem Jrim omdreid, -

²³un aule Nazionen woaren sajen: Wuarom haft de Har disem Launt aulsoo jedonen? Wuarom dise groote Zorngloot?

²⁴Un maun woat sajen: Doarom daut see däm Bunt Gottes, däm Gott äare Vodasch, veloten ha, däm hee met an jemoakt haud, aus hee an ut däm Ägiptenlaunt rutfieed,

²⁵un hanjinjen un aundre Jetta deenden un buagen sikj ver an, Jetta, dee see nich kjanen, un dee hee an nich toojedeelt haud;

²⁶doa flaumd de Oaja Gottes äwa dit Launt opp, soo daut hee däm gaunzen Fluch äwa an jebrocht haft, dee en disem Buak jeschräwen steit;

²⁷un de Har haft an ut äaren Launt rutjeräten, - em Oaja un em Jrim un en Onjnod, un haft an en een aundret Launt jeschmäten, aus daut aun disem Dach es.

²⁸Daut Veborjne es däm Harn, onsem Gott; oba daut Openboade es onst un onse Kjinja eewichlich, doamet wie aul dise Jesazeswieed doonen.