Read De Bibel JHF 5. Mose 3 Bible Online

5. Mose 3 - De Bibel JHF bible

5. Mose 3

¹Un wie dreiden ons un jinjen oppem Wajch no Baschan nopp; un Og, de Kjennich von Baschan, jinkj ut, ons entjäajen, hee un aul sien Volkj, om bie Edrei too kjamfen.

²Un de Har säd to mie: Ha nich Angst! Dan en diene Haunt ha ekj am un aul sien Volkj un sien Launt jejäft; un doo am, aus du Sihon, däm Kjennich äwa de Amorita, jedonen hast, dee en Hesbon wond.

³Un de Har, ons Gott, jeef uk Og, däm Kjennich von Baschan, un aul sien Volkj en onse Haunt; un wie schluagen am, bat am kjeen Wajchjeranda äwableef.

⁴Un to dee selje Tiet neem wie aul siene Städa en; daut wia kjeene Staut, dee wie an nich neemen; 60 Städa, de gaunze Jäajent Argob, daut Kjennichrikj Og en Baschan;

⁵aul dise Städa wieren met Miaren faust jemoakt, Dooasch un Rijel; buta de sea väle opne Städa.

⁶Un wie vebaunde an, aus wie Sihon, däm Kjennich von Hesbon, jedonen hauden; wie vebaunde äa gaunzet Volkj; Mana, Frues un Kjinja.

⁷Oba aulet Vee un däm Raup de Städa neem wie fa ons.

⁸Un wie neemen en dee selje Tiet ut de Haunt de twee Kjennichs de Amorita daut Launt, daut aun dise Sied vom Jordan es, vom Fluss Arnon bat aun däm Boajch Hermon,

⁹(de Sidonita nanen däm Hermon Sirjon, un de Amorita nanen am Senir),

¹⁰aule Städa de Läacht un von gaunz Gilead, un gaunz Baschan bat Salka un Edrei, de Städa vom Kjennichrikj Og en Baschan.

¹¹Dan blooss Og, de Kjennich von Baschan, wia von de Äwajebläwne de Riesen äwajebläwen. Kjikj, sien Bad von Iesa, es daut nich Rabba de Kjinja Amon? Siene Lenj es näajen Ellen un siene Breed vea Ellen, nom Alboagen von eenem Maun.

¹²Un dit Launt neem wie en dee selje Tiet en. Von Aroer aun, daut aum Fluss Arnon es, un de Halft vom Boajlaunt Gilead un siene Städa jeef ekj de Rubenita un de Gadita;

¹³un daut Äwaje von Gilead un gaunz Baschan, däm Kjennichrikj Og, jeef ekj däm haulwen Staum Manasse. (De gaunze Jäajent Argob, daut gaunze Baschan, dit woat daut Launt de Riesen jenant.

¹⁴Jair, Manasse sien Sän, neem de gaunze Jäajent Argob bat aun de Jrens de Gesurita un de Maakatita un nand an, daut Baschan, no sienem Nomen; Darpa Jair, bat opp disem Dach).

¹⁵Un Makir jeef ekj Gilead.

¹⁶Un de Rubenita un de Gadita jeef ekj von Gilead bat nom Fluss Arnon, bat de Medd vom Fluss un daut Aunjrensende, un bat nom Fluss Jabbok, de Jrens de Kjinja Amon;

¹⁷un de Läacht un däm Jordan un daut Eewalaunt, von Kinnereth bat nom Mäa enne Läacht, däm Soltmäa, bat aum Pisga jäajen Sonnenoppgank.

¹⁸Un ekj befool junt aun dee selje Tiet un säd: De Har, jun Gott, haft junt dit Launt jejäft, daut entonämen. Reed sell jie sennen, aule Mana dee toom kjamfen reed sent, ver june Breeda, de Kjinja Israel, äwatogonen.

¹⁹Blooss june Frues un june Kjinja un jun Vee, ekj weet, daut jie väl Vee ha, - dee sellen enne Städa bliewen, dee ekj junt jejäft ha,

²⁰bat de Har june Breeda too Ru brinjt, aus junt, un uk see daut Launt ennämen, daut de Har, jun Gott, an jansied vom Jordan jeft; dan sell jie trigjgonen, een jiedra no sienem Ieejentum, daut ekj junt jejäft ha.

²¹Un dän Josua befool ekj aun dee selje Tiet un säd: Diene Uagen ha aules jeseenen, waut de Har, jun Gott, dise twee Kjennichs jedonen haft; aulsoo woat de Har aule Kjennichrikjs doonen, wuahan du äwagonen woascht.

²²Habt nich Angst fa an! Dan de Har, jun Gott, hee es daut, dee fa junt kjamft.

²³Un ekj bedd däm Harn en dee selje Tiet un säd:

²⁴Har, de Har! Du hast aunjefongen, dienem Kjnajcht diene Groote un diene stoakje Haunt to wiesen; dan waut fa een Gott es em Himmel un oppe Ieed, dee aus du - diene Woakjen un diene Machtdoten doonen kunn?

²⁵Lot mie doch äwagonen un daut goode Launt seenen, daut jansied vom Jordan es, dise goode Boaj un däm libanon.

²⁶Oba de Har wia äwa mie oajalich om junthaulwen un hieed nich opp mie; un de Har räd to mie: Lot daut jenuach sennen; räd wiedahan nich mea von dise Sach!

²⁷Go oppe Spetz von Pisga, un häw diene Uagen opp jäajen Wasten un jäajen Nuaden un jäajen Sieden un jäajen Oosten, un kjikj met diene Uagen; dan du woascht nich äwa disem Jordan gonen.

²⁸Un befäl däm Josua un stoakj am un moak am faust; dan hee saul ver disem Volkj häa äwagonen, un hee saul an daut Launt, daut du seenen woascht, aus Oawgoot utdeelen.

²⁹Un wie bleewen enne Läacht, Bat-Peor jäajenäwa.