Read De Bibel JHF 5. Mose 30 Bible Online

5. Mose 30 - De Bibel JHF bible

5. Mose 30

¹Un daut woat passieren, wan aul dise Wieed äwa die komen, dee Säajen un dee Fluch, dee ekj die väajelajcht ha, un du daut unja aul de Nazionen too Hoaten nämst, wuahan de Har, dien Gott, die vestat haft,

²un dreist du om nodäm Harn, dienem Gott, un no aulem opp siene Stemm hieescht, waut ekj die vondoag befäl, du un diene Kjinja, met dienem gaunzen Hoaten un met diene gaunze Seel;

³soo woat de Har, dien Gott, diene Jefangenschoft dreien un sikj äwa die erboarmen; un hee woat die wada ut aule Velkja saumlen, wuahan de Har, dien Gott, die vestreit haft.

⁴Wan diene Vestade aum Enj vom Himmel wieren, soo woat de Har, dien Gott, von doa die saumlen un von doa die holen;

⁵un de Har, dien Gott, woat die en daut Launt brinjen, daut diene Vodasch enjenomen hauden, un du woascht daut nämen; un hee woat die Goodet doonen un die vemieren, mea aus diene Vodasch.

⁶Un de Har, dien Gott, woat dien Hoat un daut Hoat von diene Kjinja beschnieden, doamet du däm Harn, dienem Gott, leefst met dienem gaunzen Hoaten un met diene gaunze Seel, om daut du aum Läwen blifst.

⁷Un de Har, dien Gott, woat aul disem Fluch opp diene Fiend un opp diene Haussa lajen, dee die vefolcht ha.

⁸Un du, du woascht trigjdreien un de Stemm Gottes jehorchen, un woascht aul siene Jebooten doonen, dee ekj die vondoag Befäl.

⁹Un de Har, dien Gott, woat die Äwafluss jäwen bie aul dienem Woakj de Henj, aun de Frucht von dienem Lief un aune Frucht von dienem Vee un aune Frucht von dienem Launt, too dienem Basten; dan de Har woat sikj wada toom Gooden äwa die freien, soo aus hee sikj äwa diene Vodasch jefreit haft;

¹⁰wan du de Stemm Gottes, von dienem Gott, jehorchst, om siene Jebooten un siene Sazungen too hoolen, dee en disen Jesazbuak jeschräwen sent, wan du nodäm Harn, dienem Gott, trigjdreist, met dienem gaunzen Hoaten un met diene gaunze Seel.

¹¹Dan dit Jeboot, daut ekj die vondoag Befäl, es fa die nich too wundaboa un es nich wiet auf.

¹²Daut es nich em Himmel, daut du sajen kust: Wäa woat fa ons em Himmel foaren un ons daut holen un ons daut hieren loten, daut wie daut doonen?

¹³Un daut es nich jantsied vom Mäa, daut du sajen kust: Wäa woat fa ons jantsied vom Mäa äwafoaren un ons daut holen un ons daut hieren loten, daut wie daut doonen?

¹⁴Sonda sea dicht bie die es daut Wuat, en dienem Mul un en dienem Hoaten, om daut to doonen.

¹⁵Kjikj, ekj ha die vondoag daut Läwen un daut Jlekj, un däm Doot un daut Onjlekj väajelajcht,

¹⁶doa ekj die vondoag Befäl, däm Harn, dienem Gott, too leewen, opp siene Wäaj too waundlen un siene Jebooten un siene Sazungen un siene Rajchte too hoolen, doamet du läfst un die vemeascht, un de Har, dien Gott, die en däm Launt säajent, wuahan du kjeemst, om daut entonämen.

¹⁷Oba wan dien Hoat sikj aufdreit, un du nich hieescht, un du die veleiden latst un ver aundre Jetta die bekjst un an deenst,

¹⁸soo vekjindj ekj junt vondoag, daut jie jewess omkomen woaren; jie woaren june Doag en däm Launt nich velenjren, wuahan du äwa däm Jordan gonen woascht, om daut entonämen.

¹⁹Ekj näm vondoag däm Himmel un de Ieed aus Zeij jäajen junt: Daut Läwen un däm Doot ha ekj junt väajelajcht, däm Säajen un däm Fluch! Soo wäl daut Läwen, om daut du läfst, du un dien Somen,

²⁰endäm du däm Harn, dienem Gott, leefst un siene Stemm jehorchst un am aunhenjst; dan daut es dien Läwen un de Lenj von diene Doag, daut du em Launt wonst, daut de Har diene Vodasch, Abraham, Isaak un Jakob, jeschwuaren haft, an to jäwen.