Read De Bibel JHF 5. Mose 33 Bible Online

5. Mose 33 - De Bibel JHF bible

5. Mose 33

¹Un dit sent de Säajen, met waut Moses de Maun Gottes, de Kjinja Israel ver sienem Doot jesäajent haft. Un hee säd:

²De Har es vom Sinai jekomen un es an von Seir oppjegonen; hee es strohlend vom Boajch Paran väajekomen un es von 1000 heilje jekomen. Ut siene Rajchte jinkj Jesazesfia fa an ut.

³Jo, hee leeft de Velkja; aul siene Heilje sent en diene Haunt; un see loagren aun diene Feet, een jiedra kjrieech von diene Wieed.

⁴Een Jesaz haft ons Moses befoolen, een Oawgoot de Jemeent Jakob.

⁵Un hee woat Kjennich en Jeschurun, aus sikj de Heipta vom Volkj vesaumelden, aule Stam Israels.

⁶Ruben läw un stoaw nich, un siene Mana sellen too talen sennen!

⁷Un dit von Juda; un hee säd: Hea, de Har, de Stam Juda un brinj am no sienem Volkj; siene Henj sent fa am machtvoll, un halp am von siene Bedrenja!

⁸Un von Levi säd hee: Diene Thummim un diene Urim sent fa diene Fromme, däm du aun Massa oppe Proow jestalt hast, met däm du biem Wota von Meriba streedst;

⁹dee von sienem Voda un von siene Mutta räd: Ekj kaun am nich seenen; un dee siene Breeda nich kjand un von siene Säns nich wist. Dan see ha dien Wuat jehoolen, un dienen Bunt bewoaden see.

¹⁰See woaren Jakob diene Rajchte lieren, un Israel dien Jesaz, see woaren Rieekjastoff (Weiruak, seeta Ruak) ver diene Näs lajen un gaunze Opfa opp dienem Aultoa.

¹¹Säajen, Gott, sien Vemäajen, un daut Woakj von siene Henj lot die jefaulen; veschmata de Lenden von dän, dee sikj jäajen am opphäwen, un siene Haussa, daut see nich mea oppstonen!

¹²Von Benjamin säd hee: De Jeleewda Gottes! En Sechaheit woat hee bie am wonen; hee bewoat am däm gaunzen Dach, un tweschen siene Schulren wont hee.

¹³Un von Josef säd hee: Jesäajent vom Harn saul sien Launt sennen - met himlische Scheenheite, vom Deiw un von däm Deepen, dee unjen loagat;

¹⁴un von wundavollen Frucht de Sonn un von scheene Plaunten de Mon;

¹⁵un vom basten de Boaj de oole Tieden un vom basten de eewje Aunboaj;

¹⁶un vom basten de Ieed un äare Menj; - un daut goot jefaulen von däm, dee em Hachelbosch wont; daut kjemt opp Josef sien Haupt un opp däm Kjriesel de Aufjesondade unja siene Breeda!

¹⁷Sien es de Majestät vom Ieeschtjebuarnen siene Bolles; un Hieena vom willen Os sent siene Hieena. Doamet woat hee aule Velkja steeten bat aune Enj de Ieed. Un daut sent de 10 000 Efraim, un daut de 1000 Manasse.

¹⁸Un von Sebulon säd hee: Frei die, Sebulon, äwa dienem Utgank, un du, Isachar, äwa diene Zelten!

¹⁹See woaren Velkja nom Boajch roopen; doawäajen woaren see Jerajchtichkjeits Opfa opfren; dan see woaren de Menj de Mäasch suen un däm vestoaknen Schauz vom Saunt.

²⁰Un von Gad säd hee: Jesäajent es, dee fa Gad Rum moakt! Aus eene Muttaleiw loagat hee un veritt Oarm un Kjriesel.

²¹Un hee haft daut Ieeschte vom Launt fa sikj jenomen, dan doa wia daut Aundeel vom Jesazjäwa oppbewoat; un hee es aune Spetz vom Volkj jegonen, haft de Jerajchtichkjeit Gottes un siene Jerechten met Israel utjefieet.

²²Un von Dan säd hee: Dan es een junga Leiw, dee ut Baschan väasprinjt.

²³Un von Naftali säd hee: Naftali, woat met Jnod saut jemoakt un voll vom Säajen Gottes! Wasten un Sieden nemm aus Ieejentum!

²⁴Un von Aser säd hee: Jesäajent aun Säns es Aser; hee es siene Breeda goot jefaulent, un hee duckt en Eelj sienen Foot!

²⁵Iesa un Koppa sent siene Rijel, un aus diene Doag, soo diene Krauft!

²⁶Kjeena es aus Jeschurun sien Gott, dee em Himmel om die too halpen omhäa foat, un oppe Wolkjen en siene Majestät.

²⁷Diene Wonunk es dee Gott de oole Tieden, un unja die sent eewje Oarms; un hee vedrift ver die däm Fiend un sajcht: Vetilj!

²⁸Un Israel wont secha, Jakob siene Kjwal aufjesondat, en eenem Launt von Jeträajd un jungen Wien; un sien Himmel drepplt Deiw.

²⁹Jlekjseelich best du, Israel! Wäa es aus du, een Volkj, jerat derch däm Harn, däm Schild - diene Help, un dee daut Schwieet von diene Huagheit es? Un daut woaren diene Fiend schmeichlen, un du, du woascht omhäa gonen opp äare Hechten.