Read De Bibel JHF 5. Mose 34 Bible Online

5. Mose 34 - De Bibel JHF bible

5. Mose 34

¹Un Moses jinkj vonne Läacht Moab oppem Boajch Nebo, de Spetz von Pisga, dee jäajenäwa Jericho es. Un de Har leet am daut gaunze Launt seenen; von Gilead bat Dan,

²un daut gaunze Naftali un daut Launt Efraim un Manasse, un daut gaunze Launt Juda bat nom hinjaschten Mäa;

³un däm Sieden un de Jordan Jäajent, de Läacht von Jericho, de Paulmstaut, bat Zoar.

⁴Un de Har säd to am: Daut es daut Launt, daut ekj Abraham, Isaak un Jakob jeschwuaren ha, endäm ekj säd: Dienem Somen well ekj daut jäwen. Ekj ha die daut met diene Uagen seenen loten, oba du saust nich äwagonen.

⁵Un Moses, de Kjnajcht Gottes, storf doa selfst em Launt Moab, nom Wuat Gottes.

⁶Un hee begroow am enne Tol, em Launt Moab, Bat-Peor jäajenäwa; un kjeena weet, bat opp disem Dach, woa sien Grauf es.

⁷Un Moses wia 120 Joa oolt, aus hee storf; sien Uag wia nich schwak jeworden, un siene Krauft nich veschwungen.

⁸Un de Kjinja Israel hilden wäajen Moses enne Läacht Moab 30 Doag lank; un de Hiel- un Trua Doag om Moses wieren toenj.

⁹Un Josua, de Sän Nuns, wia met däm Jeist de Weisheit erfelt; dan Moses haud siene Henj opp am jelajcht; un de Kjinja Israel hieeden opp am un deeden, soo aus de Har däm Moses befoolen haud.

¹⁰Un daut stunt en Israel kjeen Profeet aus Moses mea opp, dee de Har jekjant haud von Aunjesecht too Aunjesecht,

¹¹no aul de Tieekjen un Wunda, dee de Har an jeschekjt haud to doonen em Ägiptenlaunt, aun däm Farao un aun aul siene Kjnajchts un aun sienem gaunzen Launt;

¹²un no aulem dee stoakje Haunt un no aul däm Grooten un Schrakjlichen, daut Moses ver de Uagen von gaunz Israel jedonen haft.