Read De Bibel JHF 5. Mose 5 Bible Online

5. Mose 5 - De Bibel JHF bible

5. Mose 5

¹Un Moses roopt daut gaunze Israel un säd to an: Horch, Israel, de Sazungen un de Rajchte, dee ekj vondoag ver june Uaren räd; un lieet dee, un acht doaropp, dee to doonen.

²De Har, ons Gott, haft aum Horeb eenen Bunt met ons jemoakt.

³Nich met onse Vodasch haft de Har disem Bunt jemoakt, sonda met ons, dee wie vondoag hia aula aum Läwen sent.

⁴Von Aunjesecht too Aunjesecht haft de Har oppem Boajch, medden ut däm Fia, met junt jerät, -

⁵ekj stunt tweschen däm Harn un junt, aun dee selje Tiet, om junt daut Wuat Gottes too vekjindjen; dan jie hauden fa daut Fia Angst un jinjen nich oppem Boajch, - endäm hee räd:

⁶Ekj sie de Har, dien Gott, dee ekj die ha rutjefieet ut däm Ägiptenlaunt, ut däm Sklowenhus.

⁷Du saust kjeene aundre Jetta buta mie haben.

⁸Du saust die kjeen jeschnitztet Bilt moaken, irjent een Jlikjnis von däm, waut bowen em Himmel, un waut unjen oppe Ieed, un waut em Wota unja de Ieed es.

⁹Du saust die nich ver an bekjen un an nich deenen; dan ekj, de Har, dien Gott, sie een iewaja Gott, dee de Ojjerajchtichkjeit de Vodasch stroft aun de Kjinja, jo, aum dredden un aum vieeden Jlett von dän, dee mie haussen;

¹⁰un dee Goodet deit aun väle 1000-de, aun dän, dee mie leewen un miene Jebooten hoolen.

¹¹Du saust däm Nomen Gottes, dienem Gott, nich mesbrucken; dan de Har woat däm nich fa schultloos hoolen, dee sienen Nomen mesbrukt.

¹²Hool däm Sabatdach, am to heilje, soo aus de Har, dien Gott, die befoolen haft.

¹³Sas Doag saust du oabeiden un aul dien Woakj doonen;

¹⁴oba de säwenda Dach es Sabat däm Harn, dienem Gott: Du saust kjeen Woakj doonen, du un dien Sän un diene Dochta un dien Kjnajcht un diene Deenstmejal, un dien Rind un dien Äsel un aul dien Vee, un dien Framda, dee en dienem Dooa es; om daut dien Kjnajcht un diene Deenstmejal ruen aus du.

¹⁵Un du saust doaraun denkjen, daut du een Kjnajcht em Ägiptenlaunt jewast best, un daut de Har, dien Gott, die met eene stoakje Haunt un met utjestrakjtem Oarm von doa rutjefieet haft; doarom haft de Har, dien Gott, die befoolen, däm Sabatdach too hoolen.

¹⁶Iea dienen Voda un diene Mutta, soo aus de Har, dien Gott, die befoolen haft, om daut diene Doag velenjat woaren, un om daut et die gootjeit en däm Launt, daut Gott, dien Gott, die jeft.

¹⁷Du saust kjeenem ombrinjen.

¹⁸Un du saust nich ehebräakjen.

¹⁹Un du saust nich stälen.

²⁰Un du saust kjeen faulschet Zeichnis auflajen jäajen dienen Näakjsten.

²¹Un du saust die nich jankren loten de Fru von dienem Näakjsten; un du saust die nich jankren loten daut Hus von dienem Näakjsten, noch sien Flekj, noch sienen Kjnajcht, noch siene Deenstmejal, noch sien Rind, noch sien Äsel, noch aul daut waut dien Näakjsta haft.

²²Dise Wieed haft de Har oppem Boajch to june gaunze Vesaumlunk jerät, medden ut däm Fia, de Wolkj un däm Dunkel, met ne stoakje Stemm, un hee deed nuscht doatoo. Un hee schreef dee opp 2 steenane Toflenn un jeef dee mie.

²³Un daut passieed, aus jie de Stemm medden ut de Diestanis hieeden, aus de Boajch em Fia brend, doa kaum jie no mie, aule Heipta von june Stam un june Eltestasch,

²⁴un säden: Kjikj, de Har, ons Gott, haft ons siene Harlichkjeit un siene Majestät seenen loten, un wie ha siene Stemm medden ut däm Fia jehieet; aun disem Dach ha wie jeseenen, daut de Har met de Menschen räd, un hee aum Läwen blift.

²⁵Un nu, wuarom sell wie stoawen? Dan dit groote Fia woat ons vebrennen. Wan wie de Stemm Gottes, onsem Gott, noch wieda hieren, soo woa wie stoawen.

²⁶Dan wäa es von aulem Fleesch, dee de Stemm vom läwendjen Gott ut de Medd vom Fia haud räden hieren, aus wie, un wia aum Läwen jebläwen?

²⁷Komm du noda un hia aules, waut de Har, ons Gott, sajen woat; un du, du saust aules too ons sajen, waut de Har, ons Gott, to die räden woat, un wie wellen hieren un daut doonen.

²⁸Un de Har hieed de Stemm von june Wieed, aus jie to mie räden; un de Har räd to mie: Ekj ha de Stemm un de Wieed von disem Volkj jehieet, dee see to die jerät ha; daut es aules goot, waut see jerät ha.

²⁹Mucht doch dit - äa Hoat an bliewen, mie aulentiet too ferchten un aul miene Jebooten too hoolen, om daut et an un äare Kjinja eewich gootjeit!

³⁰Go han, räd to an: Got trigj en june Zelten!

³¹Oba du bliew hia bie mie, un ekj well to die räden aul de Jebooten un Sazungen un Rajchte, dee du an lieren saust, daut see doano doonen en däm Launt, daut ekj an jäw, daut to oawen.

³²Soo acht doaropp, to doonen, aus de Har, jun Gott, junt befoolen haft; got nich auf noch no Rajchsch noch no linkjsch.

³³Oppem gaunzen Wajch, däm de Har, jun Gott, junt befoolen haft, sell jie waundlen, om daut jie läwen un junt daut gootjeit, un jie june Doag en däm Launt velenjren, daut jie oawen woaren.