Read De Bibel JHF 5. Mose 6 Bible Online

5. Mose 6 - De Bibel JHF bible

5. Mose 6

¹Un dit sent de Jebooten, de Sazungen un de Rajchte, dee de Har, jun Gott, befoolen haft, junt to lieren, doamet jie dee en däm Launt doonen, wuahan jie äwagonen, om daut aus Ieejentum too nämen;

²om daut du däm Harn, dienem Gott, ferchst aule Doag en dienem Läwen, om to hoolen aul siene Sazungen un siene Jebooten, dee ekj die befäl, du un dien Sän un de Säns von dienem Sän, un om daut diene Doag sikj velenjren.

³Soo hia nu, Israel, un acht doaropp, dee to doonen, doamet daut die gootjeit, un jie junt sea vemieren - soo aus de Har, de Gott diene Vodasch, to die jerät haft - en eenem Launt, daut von Malkj un Honnich rand!

⁴Hea Israel: De Har, ons Gott, es een eensja Gott!

⁵Un du saust däm Harn, dienen Gott, leewen met dienem gaunzen Hoaten un met diene gaunze Seel un met diene gaunze Krauft.

⁶Un dise Wieed, dee ekj die vondoag befäl, sellen opp dienem Hoaten sennen.

⁷Un du saust dee diene Kjinja ennschoapen un doavon räden, wan du en dienem Hus setst, un wan du oppem Wajch jeist, un wan du die dollajst, un wan du oppsteist.

⁸Un du saust dee toom Tieekjen opp diene Haunt binjen, un dee sellen toom Stearnbaund sennen, tweschen diene Uagen;

⁹un du saust dee aune Huspast un aun diene Dooasch schriewen.

¹⁰Un daut saul passieren, wan de Har, dien Gott, die en daut Launt brinjt, daut hee diene Vodasch, Abraham, Isaak un Jakob, jeschwuaren haft, die to jäwen; groote un goode Städa, dee du nich jebut hast,

¹¹un Hiesa, voll von aulem Hab un Goot, dee du nich jefelt, un utjehakte Borms, dee du nich jehakt, Wienboaj un Eeljgoades, dee du nich jeplaunt hast, un du äten un saut woaren woascht;

¹²soo heed die, daut du däm Harn nich vejatst, dee die rutjefieet haft ut däm Ägiptenlaunt, ut däm Hus de Kjnajchtschoft.

¹³De Har, dien Gott, saust du ferchten un am deenen, un bie sienem Nomen saust du schwieren.

¹⁴Jie sellen nich aundre Jetta nogonen, von de Jetta de Velkja, dee runtom junt sent;

¹⁵dan een iewaja Gott es de Har, dien Gott, en diene Medd; doamet nich de Oaja Gottes, von dienem Gott, jäajen die oppflaumt, un hee die vom Ieedboddem vetilcht.

¹⁶Jie sellen däm Harn, junem Gott, nich utproowen, aus jie am bie Massa utjeproowt ha.

¹⁷Jie sellen de Jebooten Gottes jeneiw hoolen, von junem Gott, un siene Zeijnise un siene Sazungen, dee hee die befoolen haft.

¹⁸Un du saust doonen, waut rajcht un goot es enne Uagen Gottes, om dautet die gootjeit un du nennkjemst un daut goode Launt ennemst, daut de Har diene Vodasch jeschwuaren haft too jäwen,

¹⁹endäm hee aul diene Fiend ver die vejajcht, soo aus de Har jerät haft.

²⁰Wan dien Sän die enne Tookunft frajcht un sajcht: Waut bedieden de Zeijnise un de Sazungen un de Rajchte, dee de Har, ons Gott, junt befoolen haft?

²¹Soo saust du dienem Sän sajen: Wie wieren Kjnajchts vom Farao un Ägipten, un de Har haft ons met ne stoakje Haunt ut Ägipten rutjefieet;

²²un de Har deed ver onse Uagen groote un vedoawen brinjende Tieekjen un Wunda aun Ägipten, aun däm Farao un aun sienem gaunzen Hus;

²³un ons fieed hee von doa rut, om ons häatobrinjen, ons daut Launt to jäwen, daut hee onse Vodasch jeschwuaren haud.

²⁴Un de Har haft ons befoolen, aul dise Sazungen to doonen, däm Harn, onsem Gott, too ferchten, ons toom Gooden aule Doag, daut hee ons aum Läwen helt, aus daut aun disem Dach es.

²⁵Un daut woat onse Jerajchtichkjeit sennen, wan wie doaropp achten, dit gaunze Jeboot ver däm Harn, onsem Gott, to doonen, soo aus hee ons befoolen haft.