Read De Bibel JHF 5. Mose 8 Bible Online

5. Mose 8 - De Bibel JHF bible

5. Mose 8

¹Daut gaunze Jeboot, daut ekj die vondoag befäl, sell jie hoolen, daut to doonen; om daut jie läwen un junt vemieren un nenkomen un daut Launt ennämen, daut de Har june Vodasch jeschwuaren haft.

²Un du saust jedenkjen däm gaunzen Wajch, däm de Har, dien Gott, die haft enne Wieste gonen loten dise 40 Joa, om die too deemutje, om die uttoproowen, om to erkjanen, waut en dienem Hoaten es, auf du siene Jebooten hoolen woascht ooda nich.

³Un hee deemutijd die un leet die hungren; un hee foodad die met Maunajrett, daut du nich kjansd un daut diene Vodasch nich kjanen, om die weeten to loten, daut de Mensch nich von Broot auleen läft, sonda daut de Mensch von aulem läft, waut ut däm Mul Gottes jeit.

⁴Dien Kjleet es aun die nich vefollen, un dien Foot es nich jeschwolle dise 40 Joa.

⁵Soo erkjan en dienem Hoaten, daut, aus een Maun sienen Sän stroft, de Har, dien Gott, die stroft; 8,

⁶un hool de Jebooten Gottes, von dienem Gott, om opp sienem Wajch too waundlen un am to ferchten.

⁷Dan de Har, dien Gott, brinjt die en een goodet Launt doa Rieen, Kjwalen un väl Wota es, dee enne Läachten ranen;

⁸een Launt von Weit un Joascht un Wienstakj un Fiejebeem un Granatbeem; een Launt von Eelj rikjen Eeljbeem un Honnich;

⁹een Launt, en däm du nich kjemmalich Broot äten woascht, en däm daut die aun nuscht manglen woat; een Launt, en däm de Steena Iesa sent, un du ut de Boaj Koppa haken woascht.

¹⁰Un du hast jejäten un best saut jeworden, soo saust du däm Harn, dienen Gott, fa daut goode Launt loowe, daut hee die jejäft haft.

¹¹Heed die, daut du däm Harn, dienem Gott, nich vejatst, soo daut du siene Jebooten un siene Rajchte un siene Sazungen, nich helst, dee ekj die vondoag befäl!

¹²Doamet nich, wan du atst un saut woascht, un scheene Hiesa bust un bewonst,

¹³un dien Rind- un dien Kjlienvee sikj vemieet, un Selwa un Golt sikj bie die vemieren, un aules, waut du hast, sikj vemieet,

¹⁴dien Hoat sikj dan erhäft, un du däm Harn, dienen Gott, vejatst, dee die ut däm Ägiptenlaunt, ut däm Hus de Kjnajchtschoft, rutjefieet haft;

¹⁵dee die gonen leet en de groote un schrakjelje Wieste, woa Fiaschlange un Skorpionen sent, drieeje Tieden, woa kjeen Wota es; dee die Wota ut däm hoaden Steen ranen leet;

¹⁶dee die enne Wieste toom äten Maunajrett jeef, daut diene Vodasch nich kjanen, om die too deemutje un om die uttoproowen, doamet hee die en diene Tookunft gootdeit,

¹⁷un du en dienem Hoaten sajchst: Miene Krauft un miene stoakje Henj ha mie dit Vemäajen jeschauft!

¹⁸Sonda du saust däm Harn, dienem Gott, jedenkjen, daut hee daut es, dee de Krauft jeft, Vemäajen tomoaken; om daut hee sienen Bunt helt, däm hee diene Vodasch jeschwuaren haft, aus daut aun disem Dach es.

¹⁹Un daut woat passieren, wan du däm Harn, dienem Gott, vejatst un aundre Jetta nojeist un an deenst un die ver an bekjst - ekj zeij vondoag jäajen junt, daut jie jewess omkomen woaren;

²⁰aus de Nazionen, dee de Har ver junt venicht haft, aulsoo woa jie omkomen, doaväa daut jie oppe Stemm Gottes, von junem Gott, nich jehieet ha.