Read De Bibel JHF Johanes 1 Bible Online

Johanes 1 - De Bibel JHF bible

Johanes 1

¹Aum (Em) Aunfank wia daut Wuat, un daut Wuat wia bie Gott, un daut Wuat wia Gott.

³Aules es derch daut selwje (derch am) jeworden un onen daut selwje (derch am) es nuscht jeworden, daut jeworden (jemoakt) es.

⁴En am wia Läwen, un daut Läwen wia daut Licht fa de Menschen.

⁵Un daut Licht schient enne Diestanis, un de Diestanis haft daut nich bejräpen.

⁶Doa wia een Mensch, von Gott jeschekjt, sien Nomen wia Johanes.

⁷Disa kjeem toom Zeichnis, om to zeijen vom Licht, doamet aule derch am jleewen.

⁸Hee wia nich daut Licht, oba daut hee zeijen sull von daut Licht.

⁹Daut wia daut woarhauftje Licht, daut enne Welt komen sull, om aule Menschen to schienen (ooda aule Menschen em Licht to stalen).

¹⁰Hee wia enne Welt, un de Welt wia derch am jeworden (jemoakt); un de Welt kjand am nich.

¹¹Hee kjeem en daut Sienje (Ieejne), un de Sienje (Ieejne) neemen am nich aun;

¹²oba aul dee am aunnämen, dän jeef hee daut Rajcht (dee Macht), Kjinja Gottes to woaren, dee aun sien Nomen jleewen,

¹³dee nich ut Bloot, uk nich utem fleeschlichen Velangen, uk nich utem Maun sienen Wellen, oba ut Gott jebuaren sent.

¹⁴Un daut Wuat wort Fleesch un wond unja ons, (un wie ha siene Harlichkjeit jeseenen, eene Harlichkjeit aus eenen Eenjebuarnen vom Voda), voll Jnod un Woarheit.

¹⁵(Johanes zeijd von am un roopt un säd: Disa wia daut, von däm ekj säd: Dee no mie kjemt es ver mie, dan hee wia ver mie) (ooda ea aus ekj),

¹⁶dan ut siene Volmot (volle Mot) ha wie aula jekjräajen, un zwoa Jnod om Jnod.

¹⁷Dan daut Jesaz wort derch Moses jejäft; de Jnod un de Woarheit es derch Jesus Christus jeworden.

¹⁸Kjeena haft niemols Gott jeseenen; oba de eenjebuarna Sän, dee em Voda siene Schoot es, dee haft am kuntboa jemoakt.

¹⁹Un dit es Johanes sien Zeichnis, aus de Juden ut Jerusalem Priesta un Leviten schekjten, doamet see am froagen sullen: Wäa best du?

²⁰Un hee bekjand un vestreet daut nich, un hee bekjand: Ekj sie nich de Christus.

²¹Un see fruagen am: Wäa dan? Best du Elia? Un hee säd: Ekj sie daut nich. Best du de Profeet? Un hee auntwuad: Nä.

²²See säden donn to am: Wäa best du? Om daut wie Auntwuat jäwen dän, dee ons jeschekjt ha; waut sajchst du von die selfst?

²³Hee säd: Ekj sie dee «Eenem Roopenda siene Stemm enne Wieste: Moakt däm Har sienen Wajch jlikj». {Mat.1,20} soo aus de Profeet Jesaja jesajcht haud. {Jes.40,3}

²⁴Un see wieren jeschekjt vonne Farisäa.

²⁵Un see fruagen am un säden to am: Wuarom deepst (taufst) du dan, wan du nich Christus best, uk nich Elia, uk nich de Profeet?

²⁶Johanes auntwuad an un säd: Ekj deep met (em) Wota; oba mank junt steit eena däm jie nich kjanen,

²⁷dee no mie Komenda, däm ekj nich wieet sie, am de Reemes aun siene Schoo to leesen.

²⁸Dit passieed en Betabara (Betanien), jantsied vom Jordan, wua Johanes deepen deed.

²⁹Aum näakjsten Dach sach hee (Johanes) Jesus no sikj komen un säd: Kjikjt, daut Laum Gottes, daut de Sinden de Welt wajch nemt.

³⁰Disa es daut, von däm ekj säd: No mie kjemt een Maun, dee ver mie es, dan hee wia ver mie. (ooda ea aus ekj)

³¹Un ekj kjand am nich, oba om daut hee en Israel mucht openboa woaren, doarom sie ekj jekomen, met Wota to deepen.

³²Un Johanes zeijd un säd: Ekj sach dän Jeist aus ne Duw utem Himmel rauf komen, un hee bleef opp am.

³³Un ekj kjand am nich, oba dee mie jeschekjt haft, met (em) Wota to deepen, dee säd to mie: Opp wäm du seenen woascht dän Jeist erauf komen un opp am bliewen, dee es daut, dee met Heiljen Jeist deepen woat.

³⁴Un ekj ha jeseenen un ha bezeicht, daut disa de Sän Gottes es.

³⁵Aum näakjsten Dach stunt wada Johanes un twee von siene Jinja,

³⁶un aus hee hankjikjt no Jesus, dee doa vebie jinkj, säd hee: Kjikjt, daut Laum Gottes!

³⁷Un daut hieeden dee twee Jinja am räden, un jinjen Jesus hinjaraun.

³⁸Oba Jesus dreid sikj om un sach dee hinjaraun komen un säd to an: Waut sieekj jie? See oba säden to am: Rabi (daut vedolmetscht es Meista, Liera) wua wonst du?

³⁹Hee säd to an: Komt un kjikjt (seet)! See kjeemen un sagen, wua hee sikj opphelt, un bleewen janem Dach bie am. Daut wia om de tieende Stund.

⁴⁰Andreas, Simon Petrus sien Brooda, wia eena von dee twee, dee daut von Johanes jehieet hauden un am hinjaraun jegonen wieren.

⁴¹Disa funk ieescht sienen ieejnen Brooda Simon un säd to am: Wie ha däm Messias jefungen (daut vedolmetscht es: Christus ooda Jesaulwda).

⁴²Un hee brocht am no Jesus. Jesus kjikjt am aun un säd: Du best Simon, Jona sien Sän; du woascht Kefas heeten (daut vedolmetscht woat: Steen).

⁴³Aum näakjsten Dach wull hee (Jesus) no Galiläa gonen, un hee finjt Filippus; un Jesus säd to am: Folj mie no.

⁴⁴Filippus oba wia von Betsaida, ut de Staut von wua Andreas un Petrus wieren.

⁴⁵Filippus finjt Natanael un säd to am: Wie ha dän jefungen, von däm Moses en däm Jesaz un de Profeeten jeschräwen ha, Jesus, däm Josef sien Sän, däm von Nazaret.

⁴⁶Un Natanael säd to am: Kaun ut Nazaret irjent waut Goodet komen (sennen)? Filippus säd to am: Komm un see.

⁴⁷Jesus sach Natanael no sikj komen un säd von am: Kjikj, woarhauftich een Israelit, en däm nuscht faulschet es.

⁴⁸Natanael säd to am: Wuahäa kjanst du mie? Jesus auntwuad un säd to am: Ea Filippus die roopt, aus du unja dän Fiejenboom wieescht sach ekj die.

⁴⁹Natanael auntwuad un säd [to am]: Rabi, du best de Sän Gottes, du best de Kjennich Israels.

⁵⁰Jesus auntwuad un säd to am: Wiels ekj to die säd: Ekj sach die unjrem Fiejenboom, jleefst du? Du woascht Jratret aus dit seenen.

⁵¹Un hee säd to am: Woarhauft, woarhauft, saj ekj junt, [von nu aun] woa jie däm Himmel op seenen un de Enjel Gottes enopp un erauf stieen (foaren) opp däm Menschensän.