Read De Bibel JHF Johanes 10 Bible Online

Johanes 10 - De Bibel JHF bible

Johanes 10

¹Woarhauft, woarhauft, saj ekj junt: Wäa nich derch de Däa em Schopstaul nenjeit, oba aundawäajes äwakjript, dee es een Deef un een Merda.

²Wäa oba derch de Däa nenjeit, es de Schopshoad.

³Disem moakt de Däarenwajchta op, un de Schop hieren siene Stemm, un hee roopt siene ieejne Schop biem Nomen un leit dee rut.

⁴Wan hee aul siene ieejne Schop ieescht rutjebrocht haft, jeit hee veropp, un de Schop foljen am, wiels see siene Stemm kjanen.

⁵Oba eenem Framden woaren see nich foljen, oba woaren fa am wajch ranen, wiels see de Framde äare Stemm nich kjanen.

⁶Dit Biespel säd Jesus to an; oba see vestunden nich, wautet wia, daut hee to an räd (säd).

⁷Jesus räd wada to an: Woarhauft, woarhauft saj ekj junt: Ekj sie de Däa fa de Schop.

⁸Aule, dee jekomen sent ver mie, sent Deew un Reibasch, oba de Schop horchten nich opp an.

⁹Ekj sie de Däa; wan eena derch mie nenjeit, soo woat hee jerat (seelich) woaren un woat nenn un rutgonen un Weid finjen.

¹⁰De Deef kjemt blooss, om to stälen un to schlachten un to venichten. Ekj sie jekomen, om daut see Läwen ha un daut en Äwafluss haben.

¹¹Ekj sie de goode Hoad; dee goode Hoad lat sien Läwen fa de Schop.

¹²Oba de Aunjenomna, dee nich Hoad es, däm de Schop nich ieejen sent, sitt däm Wulf komen un velat de Schop un rant wajch; un de Wulf raupt an un vestreit [dee Schop.

¹³De Aunjenomna oba rant wajch] wiels hee een aunjenomna es un kjemmat sikj nich om de Schop.

¹⁴Ekj sie dee gooda Hoad; un ekj kjan de Mienje un sie jekjant von de Mienje,

¹⁵soo aus de Voda mie kjant un ekj däm Voda kjan; un ekj lot mien Läwen fa de Schop.

¹⁶Un ekj ha aundre Schop, dee nich ut disem Hock sent; uk dise mott ekj brinjen, un dee woaren miene Stemm hieren, un daut woat eene Häad, een Hoad sennen (woaren).

¹⁷Doarom haft de Voda mie leef, wiels ekj mien Läwen lot, om daut ekj daut wada näm.

¹⁸Kjeena nemt daut von mie, oba ekj lot daut von mie selfst. Ekj ha Jewault, daut to loten, un ha Jewault, daut wada to nämen. Dit Jeboot ha ekj von mienem Voda emfange.

¹⁹Doa jeef daut wada eene Oneenichkjeit mank de Juden wäajen dise Wieed.

²⁰Oba väle von an säden: Hee haft eenen Dämon (beesen Jeist) un es von Sennen (nich bie kloaren Vestaunt); wuarom horch jie am?

²¹Aundre säden: Dise Wieed (Räd) sent nich von eenen Besätnen; kaun een Dämon eenen Blinjen de Uagen opmoaken?

²²Daut wia oba daut Fast von de Ensäajnunk vom Tempel en Jerusalem; [un] daut wia Winta.

²³Un Jesus jinkj em Tempel, en Salomo siene Haul.

²⁴Donn omrinjen am de Juden un säden to am: Woo lang helst du onse Seelen em Twiewel? Wan du de Christus best, soo saj ons daut frie rut.

²⁵Jesus auntwuad an: Ekj ha junt daut jesajcht, un jie jleewen nich. Dee Woakjen, dee ekj en mienem Voda sien Nomen doo, dise zeijen von mie;

²⁶oba jie jleewen nich, dan jie sent nich von miene Schop, aus ekj junt jesajcht ha.

²⁷Miene Schop hieren miene Stemm, un ekj kjan an; un see foljen mie;

²⁸un ekj jäw an eewjet Läwen, un see gonen nich veloaren en Eewichkjeit, un kjeena woat dee ut miene Haunt rieten (roowen).

²⁹Mien Voda, dee an mie jejäft haft, es jrata aus aules, un kjeena kaun dee ut mienem Voda siene Haunt rieten (roowen).

³⁰Ekj un de Voda sent eent.

³¹Donn hoowen de Juden wada Steena opp, om am to steenjen.

³²Jesus auntwuad an: Väl goode Woakjen ha ekj junt von mienem Voda jewäsen; fa woone Woakjen von dee steenjt jie mie?

³³De Juden auntwuaden am: Wäajen een goodet Woakj steenj wie die nich, oba wäajen eene Lastrunk, un wiels du, dee du een Mensch best, die selfst to Gott moakst.

³⁴Jesus auntwuad an: Steit daut nich en junem Jesaz jeschräwen: «Ekj ha jesajcht: Jie sent Jetta?» {Ps.82,6}

³⁵Wan hee jane Jetta nand, no dän daut Wuat Gottes kjeem (un de Schreft kaun nich oppjehowen woaren),

³⁶saj jie von däm, däm de Voda jeheilicht haft un enne Welt jeschekjt haft: Du lastascht, wiels ekj säd: Ekj sie Gottes Sän?

³⁷Wan ekj nich mienem Voda siene Woakjen doo, dan jleeft mie nich;

³⁸wan ekj dee oba doo, soo jleeft de Woakjen, wan jie uk mie nich jleewen, om daut jie erkjanen un jleewen, daut de Voda en mie es un ekj en am.

³⁹Doa sochten see wada am faust to nämen (jriepen), un hee kjeem an ut äare Henj.

⁴⁰Un hee jinkj wada wajch jantsied vom Jordan no däm Uat, wua Johanes ieescht deept, un hee bleef doa.

⁴¹Un väle kjeemen no am un säden: Johanes deed kjeen Tieekjen; oba aules, waut Johanes von disem jesajcht haft, es Woarheit.

⁴²Un väle jleewden doa selfst aun am.