Read De Bibel JHF Johanes 14 Bible Online

Johanes 14 - De Bibel JHF bible

Johanes 14

¹Jun Hoat saul nich enjstlich woaren. Jleeft aun Gott, jleeft uk aun mie.

²En mienem Voda sien Hus sent väl Woninjen; wan et nich soo wia, haud ekj junt daut jesajcht; dan ekj go han, junt eene Städ reedtomoaken.

³Un wan ekj han go un junt eene Städ reed moak, soo kom ekj wada un wua junt no mie nämen, om daut woa ekj sie, uk jie sent.

⁴Un wuahan ekj go, weet jie, un dän Wajch kjan jie.

⁵Tomas säd to am: Har, wie weeten nich, wua du han jeist, un woo kjenn wie däm Wajch weeten?

⁶Jesus sajcht to am: Ekj sie de Wajch un de Woarheit un daut Läwen. Kjeena kjemt nom Voda, aus blooss derch mie.

⁷Wan jie mie jekjant hauden, soo wudd jie uk mienem Voda jekjant ha; un von nu aun kjan jie am un ha am jeseenen.

⁸Filippus sajcht to am: Har, wies ons däm Voda, un daut rieekjt ons too.

⁹Jesus säd to am: Soo lange Tiet sie ekj bie junt, un du hast mie nich erkjant, Filippus? Wäa mie jeseenen haft, haft däm Voda jeseenen, un woo sajchst du: Wies ons däm Voda?

¹⁰Jleefst du nich, daut ekj em Voda sie un de Voda en mie es? De Wieed, dee ekj to junt räd, räd ekj nich ut mie selfst; oba de Voda, dee en mie wont (blift), hee deit siene Woakjen.

¹¹Jleeft mie, daut ekj em Voda sie un de Voda en mie es, wan oba nich, soo jleeft om selfst de Woakjen haulwen.

¹²Woarhauft, woarhauft, saj ekj junt: Wäa aun mie jleeft, dee woat uk de Woakjen doonen, dee ekj doo, un woat jratre aus dise doonen, wiels ekj nom Voda go.

¹³Un wautemma jie bedden woaren en mienem Nomen, daut woa ekj doonen, om daut de Voda veharlicht woat en däm Sän.

¹⁴Wan jie irjentwaut bedden woaren en mienem Nomen, soo woa ekj daut doonen.

¹⁵Wan jie mie leef ha, dan hoolt miene Jebooten;

¹⁶un ekj woa däm Voda bedden, un hee woat junt eenen aundren Sachvewaulta (griechisch parákletos Treesta ooda Helpa) jäwen, daut hee en Eewichkjeit bie junt es,

¹⁷dän Jeist de Woarheit, dän de Welt nich kjrieen kaun, wiels dee am nich sitt uk nich kjant. [Oba] jie kjanen am, dan hee blift bie junt un woat en junt sennen.

¹⁸Ekj woa junt nich aus Weisen loten, ekj kom no junt.

¹⁹Noch eene korte Tiet, un de Welt sitt mie nich mea; oba jie seenen mie: Wiels ekj läw, woa uk jie läwen.

²⁰Aun janem Dach woa jie erkjanen, daut ekj en mienem Voda sie, un jie en mie un ekj en junt.

²¹Wäa miene Jebooten haft un dee helt, dee es daut, dee mie leef haft; oba wäa mie leef haft, woat von mienem Voda jeleeft woaren; un ekj woa am leef ha un mie selfst am openboa moaken.

²²Judas, nich de Iskariot, sajcht to am: Har, woo es daut, daut du die ons west openboa moaken, un nich de Welt?

²³Jesus auntwuad un säd to am: Wan irjentwäa mie leef haft, soo woat hee miene Wieed hoolen (bewoaren), un mien Voda woat am leef haben, un wie woaren no am komen un eene Wonunk bie am moaken.

²⁴Wäa mie nich leef haft, helt miene Wieed nich, un daut Wuat, daut jie hieren, es nich mient, oba däm Voda sient, dee mie jeschekjt haft.

²⁵Dit ha ekj to junt jesajcht, wiels ekj noch bie junt sie.

²⁶Oba de Sachvewaulta (Treesta ooda Helpa), de Heilja Jeist, däm de Voda schekjen woat en mienem Nomen, dee (jana) woat junt aules lieren un junt aun aules denkjen halpen, waut ekj junt jesajcht ha.

²⁷Fräd lot ekj junt, mienen Fräd jäw ekj junt; nich soo aus de Welt jeft, jäw ekj junt. Jun Hoat woat nich enjstlich (beorruicht ), un vezoagt (Angst ha) nich.

²⁸Jie ha jehieet, daut ekj to junt säd: Ekj go han, un ekj kom no junt. Wan jie mie leef hauden, soo wudd jie junt freien, daut ekj nom Voda go, dan de Voda es jrata aus ekj.

²⁹Un nu ha ekj junt daut jesajcht, ea daut passieet, om daut, wan et passieet, jie jleewen.

³⁰Ekj woa nich mea väl met junt räden, dan de Weltharscha kjemt un haft nuscht aun mie;

³¹oba om daut de Welt erkjant, daut ekj däm Voda leef hab un soo doo, aus mie de Voda jeboden haft. Stot opp, un lot ons von hia wajch gonen.