Read De Bibel JHF Johanes 15 Bible Online

Johanes 15 - De Bibel JHF bible

Johanes 15

¹Ekj sie de rechtja (woara) Wienstock, un mien Voda es de Wiengoadna.

²Jiedre Rank aun (en) mie, dee nich Frucht brinjt, dee nemt hee wajch; un jiedre, de Frucht brinjt, dee reinicht hee, om daut dee mea Frucht brinjt.

³Jie sent aul rein wäajen (derch) daut Wuat, daut ekj to junt jerät ha.

⁴Blieft en mie, un ekj en junt. Soo aus ne Rank nich ut sikj selfst Frucht brinjen kaun, wan dee nich aum Wienstock blift, aulsoo uk jie nich, wan jie nich en mie bliewen.

⁵Ekj sie de Wienstock, jie sent de Ranken. Wäa en mie blift un ekj en am, disa brinjt väl Frucht, dan onen mie kjenn jie nuscht doonen.

⁶Wan wäa nich en mie blift, soo woat hee rutjeschmäten aus ne Rank un vedrieecht; un dee saumelt maun toop un schmitt dee em Fia, un see vebrennen.

⁷Wan jie en mie bliewen un miene Wieed en junt bliewen, soo woa jie bedden, waut jie wellen, un daut woat junt jejäft woaren.

⁸Doaderch woat mien Voda veharlicht, daut jie väl Frucht brinjen, un jie woaren miene Jinja woaren.

⁹Soo aus de Voda mie jeleeft haft, ha uk ekj junt jeleeft; blieft en miene Leew.

¹⁰Wan jie miene Jebooten hoolen, soo woa jie en miene Leew bliewen, krakjt soo aus ekj mienem Voda siene Jebooten jehoolen ha un en siene Leew bliew.

¹¹Dit ha ekj to junt jesajcht, om daut miene Freid en junt es un june Freid vollkomen woat.

¹²Dit es mien Jeboot, daut jie eenaunda leef haben, soo aus ekj junt jeleeft ha.

¹³Jratre Leew haft kjeena, aus dise, daut hee (wäa) sien Läwen hanjeft (lat) fa siene Frind.

¹⁴Jie sent miene Frind, wan jie doonen, wautemma ekj junt befäl.

¹⁵Ekj nan junt nich mea Kjnajchts, wiels de Kjnajcht weet nich, waut sien Har deit; oba ekj ha junt Frind jenant, wiels ekj aules, waut ekj von mienem Voda jehieet, ha ekj junt weeten loten.

¹⁶Jie ha mie nich utjewält, oba ekj ha junt utjewält un junt bestemt (jesat), om daut jie hangonen un Frucht brinjen, un june Frucht blift, om daut, wautemma jie däm Voda bedden woaren en mienem Nomen, woat hee junt jäwen.

¹⁷Dit befäl ekj junt; daut jie junt unjarenaunda leef haben.

¹⁸Wan de Welt junt haust, soo weet, daut see mie ver junt (ea) jehaust haft.

¹⁹Wan jie vonne Welt wieren, wudd de Welt daut ieejne leef ha; oba wiels jie nich vonne Welt sent, oba ekj junt ute Welt utjewält ha, doarom haust junt de Welt.

²⁰Denkjt aun daut Wuat, daut ekj junt jesajcht ha: Een Kjnajcht es nich jrata aus sien Har. Wan see mie vefolcht ha, woaren see uk junt vefoljen; wan see mien Wuat jehoolen ha, woaren see uk junt hoolen.

²¹Oba dit aules woaren see junt doonen (aundoonen) wäajen mienen Nomen, wiels see däm nich kjanen, dee mie jeschekjt haft.

²²Wan ekj nich jekomen wia un to an jerät haud, soo hauden see kjeene Sind; oba nu ha see kjeene Uträd fa äare Sind.

²³Wäa mie haust, haust uk mien Voda.

²⁴Wan ekj unja an nich de Woakjen jedonen haud, dee kjeen aundra jedonen haft, dan hauden see kjeene Sinden; nu oba ha see jeseenen un haussen mie aus uk mien Voda.

²⁵Oba om dautet Wuat erfelt woat, daut en äarem Jesaz jeschräwen steit: «See hausten mie onen Uasoak». {Ps.69,5}

²⁶Wan oba de Sachvewaulta (Treesta) jekomen es, däm ekj junt vom Voda schekjen woa, däm Jeist de Woarheit, dee vom Voda kjemt, soo woat hee von mie zeijen.

²⁷Oba uk jie woaren zeijen, wiels jie von Aunfank aun bie mie sent.