Read De Bibel JHF Johanes 16 Bible Online

Johanes 16 - De Bibel JHF bible

Johanes 16

¹Dit ha ekj to junt jesajcht, om daut jie junt nich oajren (steeten) sellen.

²Dee woaren junt ute Sienagog utschluten; oba doa kjemt de Stund, wua jiedra, dee junt ombrinjt, woat denkjen (meenen), Gott eenen Deenst (Opfadeenst, Gottesdeenst) to brinjen.

³Un daut woaren see doonen, wiels see däm Voda uk mie nich erkjant ha.

⁴Oba dit ha ekj to junt jesajcht, om daut, wan de Stund jekomen es, jie doaraun jedenkjen, daut ekj junt daut jesajcht ha. Oba dit ha ekj junt aum Aunfank nich jesajcht, wiels ekj bie junt wia.

⁵Nu oba go ekj han nodäm, dee mie jeschekjt haft, un kjeena von junt frajcht mie: Wua jeist du han?

⁶Oba wiels ekj dit to junt jesajcht ha, es jun Hoat truarich.

⁷Oba ekj saj junt de Woarheit: Daut es goot fa junt, daut ekj wajchgo, dan wan ekj nich wajchgo, woat de Sachvewaulta (Treesta) nich no junt komen; oba wan ekj hango, woa ekj am no junt schekjen.

⁸Un wan hee jekomen es, woat hee de Welt äwafieren vonne Sind un von Jerajchtichkjeit un vom Jerecht.

⁹Vonne Sind, wiels see nich aun mie jleewen;

¹⁰von Jerajchtichkjeit oba, wiels ekj no [mien] Voda go, un jie mie nich mea seenen;

¹¹vom Jerecht oba, wiels de Welt-Harscha jerecht es.

¹²Noch väl ha ekj junt to sajen, oba jie kjennen daut nu nich vedroagen.

¹³Oba wan jana, de Jeist de Woarheit, jekomen es, woat hee junt enne gaunze Woarheit leiden (fieren); dan hee woat nich ut sikj selfst räden, oba aules waut hee hieren woat, woat hee räden, un daut Komende woat hee junt bekaunt moaken.

¹⁴Hee woat mie veharlichen, dan vom Mienjen woat hee nämen un junt bekaunt moaken.

¹⁵Aules, waut de Voda haft, es mient; doarom säd ekj, daut hee vom Mienjen nemt un junt daut bekaunt moaken woat.

¹⁶Noch eene korte Tiet, un jie seenen mie nich, un wada äwa eene korte Tiet, un jie woaren mie seenen [wiels ekj nom Voda go].

¹⁷Donn säden eenje von siene Jinja to eenaunda: Waut es dit, daut hee to ons sajcht: Noch ne korte Tiet, un jie seenen mie nich, un wada äwa ne korte Tiet, un jie woaren mie seenen, un: Wiels ekj nom Voda hango?

¹⁸Doa säden see: Waut es dit fa eene korte Tiet, von de hee räd? Wie weeten nich, waut hee sajcht.

¹⁹[Doa] moakjt Jesus, daut see am froagen wullen, un säd to an: Räd jie unjarenaunda doaräwa, daut ekj säd: Noch ne korte Tiet, un jie seenen mie nich, un wada äwa ne korte Tiet, un jie woaren mie seenen?

²⁰Woarhauft, woarhauft, ekj saj junt, jie woaren hielen un jaumarieren, oba de Welt woat sikj freien; jie woaren truarich sennen, oba june Truarichkjeit woat to Freid woaren.

²¹Ne Fru wan see een Kjint to Welt brinjt, haft Truarichkjeit (Jeburtsweeen), wiels äare Stund jekomen es; oba wan see daut Kjint jebuaren haft, denkjt see nich mea aun de Weedoag, wäajen de Freid, daut een Mensch enne Welt jebuaren es.

²²Uk jie ha nu Truarichkjeit; oba ekj woa junt wada seenen, un jun Hoat woat sikj freien, un june Freid nemt junt kjeena wajch.

²³Un aun janem Dach woa jie mie nuscht froagen. Woarhauft, woarhauft, ekj saj junt: Wautemma jie däm Voda bedden woaren en mienem Nomen, woat hee junt jäwen.

²⁴Bat nu ha jie nuscht en mienem Nomen jebedd. Bedd, un jie woaren kjrieen, om daut june Freid vollkomen es.

²⁵Dit hab ekj en Jlikjnisen to junt jerät, doa kjemt de Stund, doa ekj nich mea en Jlikjnisen to junt räden woa, oba junt frie rut, vom Voda, vekjindjen woa.

²⁶Aun janem Dach woa jie en mienen Nomen bedden, un ekj saj junt nich, daut ekj däm Voda fa junt bedden woa;

²⁷dan de Voda selfst haft junt leef, wiels jie mie jeleeft un jejleeft ha, daut ekj von Gott utjegonen sie.

²⁸Ekj sie vom (utem) Voda utjegonen un sie enne Welt jekomen; ekj velot wada de Welt un go nom Voda.

²⁹Siene Jinja säden to am: Kjikj, nu rätst du frie rut, un nich en Jlikjnisen;

³⁰nu weet wie, daut du aules weetst un hastet nich needich, daut die wäa frajcht; doawäajen jleew wie, daut du von Gott utjegonen best.

³¹Jesus auntwuad an: Jleew jie nu?

³²Kjikjt, doa kjemt de (eene) Stund, un es jekomen (aul hia), daut jie vestreit woaren, un jiedra en daut Sienje, un mie auleen loten woaren; un ekj sie nich auleen, dan de Voda es bie mie.

³³Dit ha ekj to junt jerät, doamet jie en mie Fräd ha. Enne Welt ha jie Bedrenkjnis (Noot): oba siet jetroost, ekj ha dise Welt jewonnen (besiecht, äwawunden).