Read De Bibel JHF Johanes 18 Bible Online

Johanes 18 - De Bibel JHF bible

Johanes 18

¹Aus Jesus dit jesajcht haud, jinkj hee met siene Jinja rut äwa däm Bach (Riefa) Kidron, wua een Goaden wia, en däm hee un siene Jinja nenn jinjen.

²Oba uk Judas, dee am verod, wist de Städ, wiels Jesus sikj doa foaken met siene Jinja vesaumeld.

³Aus Judas daut Schoowa (Soldoten un Tempelwajchta) un vonne Huagapriesta un Farisäa Deena jekjräajen haud, kjemt hee doa han met Latoarns un Fachlen un Jewäaren.

⁴Oba Jesus, dee aules wist, waut äwa am komen wudd (sull), jinkj rut (an entjäajen) un säd to an: Wäm sieekj jie?

⁵See auntwuaden am: Jesus, dän Nazarena. Jesus säd to an: Ekj sie et! Oba uk Judas, dee am verod, stunt bie an.

⁶Aus hee to an säd: Ekj sie et, trocken see sikj trigj un follen oppe Ieed.

⁷Donn fruach hee an noch emol: Wäm sieekj jie? Oba see säden: Jesus, dän Nazarena.

⁸Jesus auntwuad: Ekj ha junt jesajcht, daut ekj daut sie; wan jie mie sieekjen, soo lot dise gonen;

⁹om dautet Wuat erfelt wort, daut hee säd: Von dee, dee du mie jejäft hast, ha ekj kjeenem veloaren.

¹⁰Simon Petrus oba, dee een Schwieet haud, trock daut rut un schluach dän Huagapriesta sien Kjnajcht un heiwd am daut rajchte Ua auf. Däm Kjnajcht sien Nomen wia Malchus.

¹¹Donn säd Jesus to Petrus: Stäakj daut Schwieet enne Schajcht. Dän Drunk, däm mie mien Voda jejäft haft, sull ekj dän nich drinkjen?

¹²Daut Schoowa (eene groote Schoa Mana / Soldoten un Tempelwajchta) un de Bowaschta un de Juden äare Deena naumen Jesus un bungen am;

¹³un leiden am ieescht no Anas, dan hee wia Kaifas sien Schwiavoda, dee daut Joa Huagapriesta wia.

¹⁴Daut wia Kaifas, dee, de Juden däm Rot jeef, dautet bäta wia, daut een Mensch fa daut Volkj stoawen sull.

¹⁵Oba Simon Petrus foljd Jesus un de aundra Jinja. Dis Jinja wia däm Huagenpriesta bekaunt un jinkj met Jesus nenn em Huagenpriesta sien Hoff.

¹⁶Oba Petrus stunt buten aune Däa. Donn jinkj de aundra Jinja, dee däm Huagenpriesta bekaunt wia, rut un räd met de Däarenwajchtarin un brocht Petrus nenn.

¹⁷Donn säd de Deenarin, de Däarenwajchtarin, to Petrus: Best du nich uk eena von disem Mensch siene Jinja? Hee säd: Ekj sie et nich.

¹⁸Oba doa stunden de Kjnajchts un de Deena, dee een Kolenfia jemoakt hauden, wiels et kolt wia, un woamden sikj; oba Petrus stunt uk bie an un woamd sikj.

¹⁹De Huagapriesta fruach Jesus no (äwa) siene Jinja, un no (äwa) siene Lia.

²⁰Jesus auntwuad am: Ekj ha openboa to de Welt jerät; ekj ha emma enne Sienagogen un em Tempel jelieet, wua aule Juden toopkomen, un em Jeheemen ha ekj nuscht jerät;

²¹waut frajchst du mie? Froag dee, dee doa jehieet, waut ekj to an jerät ha; kjikj, dise weeten, waut ekj jesajcht ha.

²²Oba aus hee dit säd, jeef eena von de Deena, dee doabie stunt, Jesus eent oppe Bak un säd: Soo auntwuatst du däm Huagenpriesta?

²³Jesus auntwuad am: Wan ekj orrajcht jerät ha, soo jeff Zeichnis von däm Iebel (Orrajcht doonen); oba wan rajcht, wuarom schleist du mie?

²⁴Anas haud am jebungen no Kaifas, dän Huagenpriesta, jeschekjt.

²⁵Oba Simon Petrus stunt un woamd sikj. Doa säden see to am: Best du nich uk eena von siene Jinja? Hee luach un säd: Ekj sie et nich.

²⁶Eena von däm Huagapriesta siene Kjnajchts säd, dee een Vewaunta aun däm wia, däm Petrus daut Ua aufjeheift haud: Sach ekj die nich bie am em Goaden?

²⁷Doa luach Petrus wada; un plazlich kjreid de Hon.

²⁸See leiden Jesus von Kaifas nom Aumthus (Rechthus); oba daut wia tiedich zemorjes. See jinjen nich nenn em Aumthus, om daut see sikj nich veonreinjen, oba daut Passamol äten kunnen.

²⁹Donn kaum Pilatus rut no an un säd: waut fa eene Aunkloag brinj (ha) jie jäajen disem Mensch?

³⁰See auntwuaden un säden to am: Wan disa nich een Vebräakja wia, wudd wie am die nich jebrocht haben.

³¹Doa säd Pilatus to an: Nämt jie am un recht am no junem Jesaz. De Juden säden to am: Daut es ons nich erlaubt, wäm doot to moaken;

³²om dautet Wuat Jesus erfelt wudd, daut hee säd, handiedent, waut fa eenen Doot hee stoawen sull.

³³Pilatus jinkj donn wada em Aumthus nenn un roopt Jesus un säd to am: Best du de Kjennich äwa de Juden?

³⁴Jesus auntwuad [am]: Sajchst du dit ut die selfst, ooda ha die aundre von mie jesajcht?

³⁵Pilatus auntwuad: Sie ekj dan een Jud? Diene Nazion un de Huagapriesta ha die mie äwajäft; waut hast du jedonen?

³⁶Jesus auntwuad: Mien Rikj es nich von dise Welt; wan mien Rikj von dise Welt wia, dan hauden miene Deena jekjamft, om daut ekj nich aune Juden utjeleewat wort; nu oba es mien Rikj nich von hia (dise Welt).

³⁷Donn säd Pilatus to am: Aulsoo du best een Kjennich? Jesus auntwuad: Du sajchst et, daut ekj een Kjennich sie. Ekj sie doatoo jebuaren un doatoo enne Welt jekomen, om daut ekj de Woarheit Zeichnis jäw. Jiedra dee ute Woarheit es, hieet miene Stemm.

³⁸Pilatus säd to am: Waut es Woarheit? Aus hee daut jesajcht haud, jinkj hee wada rut no de Juden un säd to an: Ekj finj kjeene Schult aun am;

³⁹oba jie ha eene Jewanheit, daut ekj junt aum Passa eenen loos jäw. Well jie nu, daut ekj junt dän Kjennich äwa de Juden loos jäw?

⁴⁰Donn schrieejen see wada un säden: Nich disem, oba Barabas! Barabas oba wia een Reiba.