Read De Bibel JHF Johanes 19 Bible Online

Johanes 19 - De Bibel JHF bible

Johanes 19

¹Donn neem Pilatus Jesus un leet am utpitschen.

²Un de Soldoten flochten eene Kroon von Dornen (Stachels) un saden am de opp sien Haupt (Kopp) un läden (nämen) am een purpur (bleiwroot) Kjleet om; {Mat.27,28}

³un see kjeemen no am un säden: Sie jejreest, Kjennich äwa de Juden! Un see schluagen am oppe Baken.

⁴Un Pilatus jinkj wada rut un sajcht to an: Kjikjt, ekj brinj am rut no junt, om daut jie weeten, daut ekj kjeene Schult aun am finj.

⁵Donn kjeem Jesus rut, druach de Dornenkroon (eene Kron von Stachels) un daut purpur (bleiwroode) Kjleet. Un hee (Pilatus) säd to an: Kjikjt, dee Mensch!

⁶Aus am de Huagapriesta un de Deena sagen, schrieejen see un säden: Kjriezicht, kjriezicht am! Pilatus säd to an: Nämt jie am han un kjriezicht jie am, dan ekj finj kjeene Schult aun am.

⁷De Juden auntwuaden am: Wie ha een Jesaz, un no [onsem] Jesaz mott hee stoawen, wiels hee sikj selfst to Gott sien Sän jemoakt haft.

⁸Aus Pilatus dise Wieed hieed, enjst hee sikj noch dolla (mea);

⁹un hee jinkj wada nenn em Aumthus un säd to Jesus: Wuahäa best du? Oba Jesus jeef am kjeene Auntwuat.

¹⁰Donn säd Pilatus to am: Rätst du nich met mie? Weetst du nich, daut ekj de Macht ha, die loostoloten, un Macht ha, die to kjriezjen?

¹¹Jesus auntwuad: Du haudst kjeene Macht jäajen (äwa) mie, wan die dee nich von bowen jejäft wia; doarom haft dee, dee mie aun die äwajäft haft, de jratre Sind.

¹²Von doa aun socht Pilatus am loostoloten. Oba de Juden schrieejen un säden: Wan du disem loos latst, best du nich däm Kjeisa sien Frint; jiedra, dee sikj selfst toom Kjennich moakt, es (rät) jäajen däm Kjeisa.

¹³Aus Pilatus dise Wieed hieed, brocht hee Jesus rut un sad sikj oppem Rechtastool aun eenem Plauz, dee doa Steenplosta heet, en Hebräisch oba Gabata.

¹⁴Daut wia oba de Dach ver Passa, daut wia om de saste Stund (om Klock 12 Meddach). Un hee säd to de Juden: Kjikjt, jun Kjennich!

¹⁵Oba see schrieejen: Wajch, wajch (met am)! Kjriezicht am! Pilatus sajcht to an: Saul ekj jun Kjennich kjriezjen? De Huagapriesta auntwuaden: Wie ha kjeenen Kjennich buta dän Kjeisa!

¹⁶Donn äwajeef Pilatus am [Jesus], om daut hee jekjriezicht wort. See neemen Jesus un leiden am wajch.

¹⁷Un hee druach sien Kjriez, un jinkj no de Städ, Schädelstäd jenant, de en Hebräisch Golgata heet,

¹⁸wua see am kjriezijden, un met am twee aundre, opp dise un jane Sied, oba Jesus enne Medd.

¹⁹Oba Pilatus schreef uk eene Äwaschreft un sad dee oppm Kjriez. Oba doa wia jeschräwen: Jesus, de Nazarena, de Kjennich äwa de Juden.

²⁰Dise Äwaschreft läsden väle von de Juden, dan de Städ, wua Jesus jekjriezicht wort, wia dicht bie de Staut; un daut wia en Hebräisch, Latiensch un Griechisch jeschräwen.

²¹De Juden äare Huagapriesta säden to Pilatus: Schriew nich: De Kjennich äwa de Juden, oba daut hee jesajcht haud: Ekj sie de Kjennich äwa de Juden.

²²Pilatus auntwuad: Waut ekj jeschräwen ha, ha ekj jeschräwen.

²³De Soldoten, aus see Jesus jekjriezicht hauden, neemen siene Kjleeda (un moaken 4 Deel, een Deel fa jieda Soldot), uk dän Rock (Unjahamd, Kjleet). Oba de Rock wia onen Not, von bowen bat unjen en eent jewäft.

²⁴Donn säden see eena toom aundren: Wie wellen dän nich tweirieten, oba om am lossen, wäms dee sennen saul; om daut de Schreft erfelt woat, dee doa sajcht: «See ha miene Kjleeda unja sikj vedeelt, un äwa mien Rock ha see daut Loss jeschmäten». {Ps.22,19} De Soldoten ha daut jedonen.

²⁵Oba bie Jesus sien Kjriez stunden siene Mutta un siene Mutta äare Sesta, Maria, Klopas siene Fru, un Maria Magdalena.

²⁶Aus Jesus siene Mutta sach un dän Jinja, dän hee leef haud, doabie stonen, säd hee to siene Mutta: Fru, kjikj, dien Sän.

²⁷Donn säd hee to däm Jinja: Kjikj! Diene Mutta! Un von de Stund aun neem de Jinja ar no sikj (en sien Hus).

²⁸No däm, doa Jesus wist, daut aules vollbrocht wia, säd hee, om daut de Schreft erfelt woat: Mie darscht!

²⁹Doa stunt oba een Jefäss voll Ädikj. Oba see felden eenem Schwam met Ädikj un stuaken dän opp een Rua (Ruastock) un hilden am daut aun sien Mul.

³⁰Aus Jesus dän Ädikj jenomen haud, säd hee: Daut es vollbrocht! Un neijd daut Haupt (Kopp) un äwajeef däm Jeist.

³¹De Juden bedden dän Pilatus, doamet de Doodes nich aum Sabat aum Kjriez bliewen, wiels dit de Dach verem Fast wia, (un de Sabatdach wia groot), soo daut äare Been jebroaken un see raufjenomen worden.

³²Donn kjeemen de Soldoten un bruaken däm ieeschten de Been un däm aundren, dee met am jekjriezicht wieren.

³³Oba aus see no Jesus kjeemen un sagen, daut hee aul jestorwen wia, bruaken see am de Been nich,

³⁴oba eena von de Soldoten stuak met eenem Spies siene Sied derch, un fuaz kjeem (rand) Bloot un Wota rut.

³⁵Un dee daut jeseenen haft, haft bezeicht, un sien Zeichnis es woarhauft; un hee weet, daut hee sajcht, waut woarhauft es, om daut uk jie jleewen.

³⁶Dit passieed, om daut de Schreft erfelt woat: «Kjeen Been (Knoaken) aun am woat jebroaken woaren». {2Mo.12,46; Ps.34,21}

³⁷Noch eene aundre Schreft sajcht: «See woaren däm seenen, däm see derchstuaken ha». {Sach.12,10}

³⁸Oba nodäm bedd Josef von Arimatäa, dee Jesus sien Jinja wia, oba een jeheema ut Angst vere Juden, däm Pilatus, daut hee Jesus sien Lief raufnämen durf. Un Pilatus erlaubt am. Hee kjeem un neem Jesus sien Lief erauf.

³⁹Doa kjeem uk Nikodemus, dee verhäa enne Nacht no Jesus jekomen wia, un brocht eene Saulw, Mirren un Zippelfie (Aloe), bie 100 Punt.

⁴⁰See neemen Jesus sien Lief un wekjelden dän en Liendieekja met de Kjriedarie (eene scheen rikjende Saulw) en, soo aus et bie de Juden Sitt (Mood) es, toom begrowen reedtomoaken.

⁴¹Oba doa aun däm Plauz, wua hee jekjriezicht wort, wia een Goaden, un en däm Goaden een nieet Grauf (Heel), en däm noch niemols kjeena jelajcht wia.

⁴²Doa nenn läden see Jesus, wäajen de Juden äa Dach, wiels daut Grauf dichtbie wia.