Read De Bibel JHF Johanes 2 Bible Online

Johanes 2 - De Bibel JHF bible

Johanes 2

¹Aum dredden Dach wia enne Kjast en Kana en Galiläa; un Jesus siene Mutta wia uk doa.

²Doa wieren oba uk Jesus met siene Jinja to Kjast enjeloden.

³Un aus doa de Wien aula wia, säd Jesus siene Mutta to am: Dee ha kjeenen Wien.

⁴Jesus säd to ar: Waut ha ekj met die to doonen, Fru? Miene Stund es noch nich jekomen.

⁵Siene Mutta sajcht to de Deena: Wautemma hee junt sajen woat, daut doot.

⁶Doa wieren oba 6 steenane Wotakrucken oppjestalt, no de judsche Reinjungsväaschreften, wuavon eene jiedre twee ooda dree Mot nenn kunnen.

⁷Jesus säd to an: Felt de Krucken met Wota. Un see felden dee bot bowen.

⁸Un hee säd to an: Nu schapt en brinjt daut däm Kjäakjenmeista. Un see brochten (deeden) daut.

⁹Aus oba de Kjäakjenmeista daut Wota jeschmakjt haud, daut Wien jeworden wia, (un hee wist nich, wuahäa dee wia (es), de Deena oba, dee daut Wota jeschapt hauden, wisten daut), roopt de Kjäakjenmeista dän Briegaum

¹⁰un säd to am: Jiedra Mensch sat ieescht däm gooden Wien väa, un wan see bedrunken jeworden sent, ieescht dan dän biljen; du hast dän gooden Wien bot nu oppbewoat.

¹¹Dit wia de Aunfank von Wundatieekjen dee Jesus muak en Kana en Galiläa un openboad siene Harlichkjeit, un siene Jinja jleewden aun am.

¹²No däm jinkj hee rauf no Kapernaum, hee un siene Mutta un siene Breeda un siene Jinja, un doa bleewen see een poa (weinje) Doag.

¹³Un de Juden äa Passafast wia dichtbie, un Jesus jinkj nopp no Jerusalem.

¹⁴Un hee funk em Tempel {Mat.4,5} dee Ossen un Schop un Duwen vekoften, uk de Jeltwakjsla doa setten.

¹⁵Un hee muak eene Pitsch von Strenj un juach dee aula utem Tempel rut, soo aus de Schop un uk de Ossen; un daut Jelt de Wakjsla schedd hee ut, un schmeet äare Descha om;

¹⁶un to de Duwenhendla säd hee: Nämt dise von hia wajch, moakt nich mien Voda sien Hus to eenem Haundelshus.

¹⁷Siene Jinja [oba] dochten doaraun, daut jeschräwen steit: «De Iewa om dien Hus haft mie vetäat». {Ps.69,10}

¹⁸De Juden auntwuaden un säden to am: Waut fa een Tieekjen wiest du ons, daut du dise Dinj deist?

¹⁹Jesus auntwuad un säd to an: Bräakjt disem Tempel dol (auf), un en dree Doag woa ekj däm opprechten (oppbuen).

²⁰Doa säden de Juden: 46 Joa wort aun disem Tempel jebut, un du west däm en dree Doag opprechten?

²¹Hee oba räd von sien Lief aus een Tempel.

²²Aus hee donn utem Doot oppjestonen wia, dochten siene Jinja doaraun, daut hee dit jesajcht haud, un see jleewden de Schreft un däm Wuat, daut Jesus jesajcht haud.

²³Oba aus hee en Jerusalem wia, oppem Passafast, jleewden väle aun sienen Nomen, aus see siene Tieekjen sagen, dee hee deed.

²⁴Oba Jesus selfst vetrud sikj an nich aun, wiels hee aula kjand

²⁵un nich needich haud, daut irjentwäa Zeichnis von däm Mensch jeef; dan hee wist selfst, waut em Mensch wia.