Read De Bibel JHF Johanes 20 Bible Online

Johanes 20 - De Bibel JHF bible

Johanes 20

¹Oba aum ieeschten Dach enne Wäakj (Sindach) kjeem Maria Magdalena tiedich, aus et noch Diesta wia, nom Grauf un sach daut de Steen vom Grauf wajchjenomen wia.

²Donn rand see un kjemt no Simon Petrus un no däm aundren Jinja, däm Jesus leef haud, un säd to an: See haben däm Har utem Grauf wajchjenomen, un wie weeten nich, wua see am hanjelajcht ha.

³Donn jinjen Petrus un de aundra Jinja rut, un see jinjen nom Grauf.

⁴Oba dee beid randen toop, un de aundra Jinja rand veropp, schwinda aus Petrus, un kjeem de ieeschta nom Grauf;

⁵un bekjt sikj, en sach de Liendieekja ligjen; doch jinkj hee nich nenn.

⁶Donn kjeem Simon Petrus, am hinjaraun, un jinkj em Grauf nenn un sach de Liendieekja ligjen,

⁷un daut Schweetduak, daut om sien Kopp wia, lach nich bie de Liendieekja, oba toopjelajcht opp eene aundre Städ.

⁸Donn jinkj uk de aundre Jinja nenn, dee de ieeschta nom Grauf kaum, un sach un jleewd.

⁹Dan see kjanen (wisten) de Schreft noch nich, daut hee utem Doot oppstonen must.

¹⁰Nu jinjen de Jinja wada no Hus.

¹¹Oba Maria stunt biem Grauf, buten, un hield. Aus see doa hield, bekjt see sikj em Grauf nenn,

¹²un sitt 2 Enjel en witte Kjleeda setten, eenen aum Koppen-enj un eenen biem Feetenenj, wua Jesus sien Lief jeläajen haud.

¹³Un dee säden to ar: Fru, wuarom hielst du? See säd to an: See ha mienen Har wajch jenomen, un ekj weet nich, wua see am hanjelajcht haben.

¹⁴Aus see daut jesajcht haud, dreid see sikj om un sitt Jesus stonen; un see wist nich, dautet Jesus es.

¹⁵Jesus säd to ar: Fru, wuarom hielst du? Wäm sieekjst du? See, docht, daut et de Goadna es, un säd to am: Har, wan du am wajch jedroacht hast, dan saj mie, wua du am hanjelajcht hast, un ekj woa am wajch holen.

¹⁶Jesus säd to ar: Maria! See dreid sikj om un sajcht to am, en hebräisch: Rabunie! Daut heet Liera.

¹⁷Jesus säd to ar: Fot mie nich aun, dan ekj sie noch nich noppjefoaren no [mienem] Voda. Oba go no miene Breeda un saj an: Ekj foa enopp no [mienem] Voda un junem Voda, un no mienem Gott un junem Gott.

¹⁸Maria Magdalena kjemt un sajcht daut de Jinja, daut see däm Har jeseenen un hee dit to ar jesajcht haft.

¹⁹Aus et aum ieeschten Dach enne Wäakj, Owent wia, un de Däaren, wua de Jinja wieren, ut Angst fa de Juden veschloten wieren, kjeem Jesus un stunt en äare Medd un sajcht to an: Fräd met junt!

²⁰Un aus hee dit jesajcht haud, wees hee an siene Henj un siene Sied. Doa freiden sikj de Jinja, aus see däm Har sagen.

²¹Donn säd [Jesus] wada to an: Fräd met junt! Soo aus de Voda mie jeschekjt haft, schekj uk ekj junt.

²²Un aus hee daut jesajcht haud, pust hee an aun un sajcht to an: Emfangt dän Heiljen Jeist!

²³Wämemma jie de Sinden vejäwen, dän sent dee vejäft, wämemma jie dee behoolen (nich vejäft), däm sent see behoolen (faustjehoolen, nich vejäft).

²⁴Oba Tomas, eena von de Twalw, Zwillinkj jenant, wia nich bie an, aus Jesus kjeem.

²⁵Donn säden de aundre Jinja to am: Wie ha däm Har jeseenen! Oba hee säd to an: Wan ekj nich de Näajelmolen en siene Henj seenen woa un miene Finja enne Näajelmolen laj, un laj miene Haunt en siene Sied, soo woa ekj nich jleewen.

²⁶Un om acht Doag wieren siene Jinja wada doabennen (em Hus) un Tomas wia bie (met) an. Doa kjemt Jesus, aus de Däaren veschloten wieren, un stunt en äare Medd un säd: Fräd met junt!

²⁷Donn säd hee to Tomas: Rieekj diene Finjasch häa un kjikj miene Henj, un rieekj diene Haunt häa un laj dee en miene Sied, un sie nich onjleewent, oba jleew!

²⁸Tomas auntwuad un säd to am: Mien Har un mien Gott!

²⁹Jesus säd to am: Wiels du mie jeseenen hast, hast du jejleeft. Seelich sent, dee nich jeseenen, un doch jleewen.

³⁰Uk väl aundre Tieekjens haud Jesus ver siene Jinja jedonen, dee nich en disem Buak jeschräwen sent.

³¹Oba dise sent jeschräwen, om daut jie jleewen, daut Jesus de Christus es, de Sän Gottes, un doamet, jie derch dän Gloowen Läwen haben en sienem Nomen.