Read De Bibel JHF Johanes 3 Bible Online

Johanes 3 - De Bibel JHF bible

Johanes 3

¹Doa wia oba een Mensch ut de Farisäa, sien Nomen wia Nikodemus, een Bowaschta vonne Juden.

²Disa kjeem no am (Jesus) enne Nacht un säd to am: Rabi, wie weeten, daut du een Liera best, von Gott jekomen, dan kjeena kaun dise Tieekjens doonen, dee du deist, buta Gott es met am.

³Jesus auntwuad un säd to am: Woarhauft, woarhauft, saj ekj die: Daut es dan, wäa nich vom nieen jebuaren (von Bowen - wadajebuaren) woat, soo kaun hee daut Rikj Gottes nich seenen.

⁴Nikodemus säd to am: Woo kaun een Mensch jebuaren woaren, wan hee oolt es? Kaun hee toom tweede mol em Muttalief nengonen un jebuaren woaren?

⁵Jesus auntwuad: Woarhauft, woarhauft, saj ekj die: Daut es dan, wäa nich ut Wota un Jeist jebuaren woat, soo kaun hee nich en daut Rikj Gottes nenn komen.

⁶Waut utem Fleesch jebuaren es, es Fleesch, un waut utem Jeist jebuaren es, es Jeist.

⁷Wunda die nich, daut ekj die saj: Jie motten vom nieen (bowen) jebuaren woaren.

⁸De Wint blost, wua hee well, un du hieescht sien ruzhen, oba du weetst nich, wuahäa hee kjemt, un wuahan hee jeit, soo es jiedra, dee utem Jeist jebuaren es.

⁹Nikodemus auntwuad un säd to am: Woo kaun soowaut passieren?

¹⁰Jesus auntwuad un säd to am: Du best de Liera en Israel un weetst dit nich?

¹¹Woarhauft, woarhauft, saj ekj die: Wie räden, waut wie weeten, un zeijen, waut wie jeseenen ha, un ons Zeichnis näm jie nich aun.

¹²Wan ekj junt daut Irdische jesajcht ha, un jie jleewen nich, woo woa jie jleewen, wan ekj junt von daut Himlische sajen woa?

¹³Un kjeena es nopp jestäajen en dän Himmel, aus blooss dee utem Himmel raufjestäajen es, de Menschensän, dee em Himmel es.

¹⁴Un soo aus Moses enne Wieste de Schlang nohecht hoof, soo mott de Menschensän nohecht jehowen woaren,

¹⁵om daut jiedra, dee aun am jleeft, [nich veloaren gonen, oba] eewjet Läwen ha.

¹⁶Dan soo haft Gott de Welt jeleeft, daut hee sienen eenjebuarnen Sän jeef, om daut jiedra (aula), dee aun am jleeft, nich veloaren jeit, oba eewjet Läwen haft.

¹⁷Dan Gott haft sienen Sän nich enne Welt jeschekjt, om daut hee de Welt rechten saul, oba daut de Welt derch am jerat woat.

¹⁸Wäa aun am jleeft, woat nich jerecht, wäa oba nich jleeft, es aul jerecht, wiels hee nich jejleeft haft aun dän Nomen vom enjebuarnen Sän Gottes.

¹⁹Dit oba es daut Jerecht, daut daut Licht enne Welt jekomen es, un de Menschen haben de Diestanis mea jeleeft aus daut Licht, dan äare Woakjen wieren bees.

²⁰Dan jiedra, de Beeset deit, haust daut Licht un kjemt nich nom Licht, om daut siene Woakjen nich bloosjestalt (opjedakjt, verendach) woaren.

²¹Oba wäa de Woarheit deit, kjemt nom Licht, om daut siene Woakjen openboa woaren, daut dee en Gott jedonen sent.

²²No däm kjeem Jesus un siene Jinja em judischen Launt, un doa bleef hee met an un deept.

²³Oba uk Johanes deept en Änon, bie Salim, wiels doa väl Wota wia, un de (Menschen) kjeemen doahan un see worden jedeept.

²⁴Dan Johanes wia noch nich em Jefenkjnis jeschmäten.

²⁵Doa gaufet eene Strietfroag unja Johanes siene Jinja met eenem Jud äwa de Reinjunk.

²⁶Un see kjeemen no Johanes un säden to am: Rabi, dee aun jantsied Jordan bie die wia, däm du Zeichnis jeefst, kjikj, dee deept, un aula komen no am.

²⁷Johanes auntwuad un säd: Een Mensch kaun nuscht kjrieen,buta daut woat am vom Himmel jejäft.

²⁸Jie selfst jäwen mie Zeichnis, daut ekj säd: Ekj sie nich de Christus, oba daut ekj ver am jeschekjt sie.

²⁹Dee de Brut haft, es de Briegaum; oba däm Briegaum sien Frint, dee doa steit un am hieet, es sea froo äwa däm Briegaum siene Stemm; dise miene Freid es erfelt.

³⁰Hee mott waussen (toonämen), ekj oba mott aufnämen.

³¹Dee von bowen kjemt, es äwa aulem; dee vonne Ieed es, es vonne Ieed un rät vonne Ieed. Dee vom (utem) Himmel kjemt, es äwa aule(m),

³²[un] waut hee jeseenen un jehieet haft, daut bezeicht hee, un sien Zeichnis nemt kjeena aun.

³³Wäa sien Zeichnis aunnemt (aunjenomen haft), haft bestädicht, daut Gott woarhauftich es.

³⁴Dan dee, däm Gott jeschekjt haft, rät de Wieed Gottes, dan Gott jeft dän Jeist nich nom Mot.

³⁵De Voda es däm Sän goot un haft aules en siene Haunt jejäft.

³⁶Wäa aun dän Sän jleeft, haft eewjet Läwen; wäa oba dän Sän nich jleeft (nich horcht), woat daut Läwen nich seenen, de Oaja (Wutt) Gottes blieft opp am.