Read De Bibel JHF Johanes 6 Bible Online

Johanes 6 - De Bibel JHF bible

Johanes 6

¹No däm jinkj Jesus wajch no de aundre Sied vom galiläischen Mäa, ooda von Tiberias;

²un daut kjeem am väl Volkj hinjaraun, wiels see de Wunda (Tieekjens) sagen, dee hee aun de Kranke deed.

³Oba Jesus jinkj enopp oppem Boajch un sad sikj doa met siene Jinja dol.

⁴Daut wia oba daut Passafast dicht bie, de Juden äa Fast.

⁵Aus Jesus de Uagen opphoof un sach, daut väl Menschen no am kjeemen, säd hee to Filippus: Wua kjennen wie Broot kjeepen, om daut dise äten kjennen?

⁶Dit säd hee oba, om am to vesieekjen; dan hee selfst wist, waut hee doonen wull.

⁷Filippus auntwuad am: Fa 200 Dinoa Broot rieekjen fa an nich too, om daut een jiedra een bät kjricht.

⁸Eena von siene Jinja, Andreas, Simon Petrus sien Brooda, säd to am:

⁹Hia es een kjliena Jung, dee haft fief Joaschtbrood un twee Fesch; oba waut es daut fa soo väl?

¹⁰[Oba] Jesus säd: Lot de Menschen sikj dolsaten. Oba doa wia väl Grauss opp de Städ. Doa saden sikj de Mana, onjefäa 5 000.

¹¹Oba Jesus naum de Brood, un aus hee jedankt haud, deeld hee daut an ut, dee doa sauten; soo uk de Fesch, sooväl aus see wullen.

¹²Aus see oba saut wieren, säd hee to siene Jinja: Saumelt dee äwajebläwne Brocken, daut nuscht vekjemt (schlajcht woat).

¹³Donn saumelden see 12 Hauntkjarw met Brocken von dee 5 Joaschtbrood, von dän, de doa jejäten hauden, äwableewen.

¹⁴Aus de Menschen daut Wunda sagen, daut Jesus deed, säden see: Disa es Woarhauft de Profeet, dee enne Welt komen sull.

¹⁵Doa Jesus erkjand, daut see komen un am jriepen wullen, om daut see am toom Kjennich muaken, veschwinjt hee wada, auleen oppem Boajch.

¹⁶Oba aus et Owent jeworden wia, jinjen siene Jinja rauf nom Mäa,

¹⁷un see stieejen en daut Schepp, un fuaren äwa daut Mäa no Kapernaum. Un daut wia aul diesta jeworden, un Jesus wia noch nich no an jekomen;

¹⁸un daut Mäa wort onruich, endäm een stoakja Wint blosd.

¹⁹Aus see onjefäa 25 ooda 30 Stadien (vea ooda fief Kilomeeta) jeroodelt hauden, sagen see Jesus oppem See gonen un noda nom Schepp komen, un see enjsten sikj.

²⁰Oba hee säd to an: Ekj sie daut, enjst junt nich!

²¹See wullen am em Schepp nämen, un plazlich wia daut Schepp aum Launt, wua see hanfuaren.

²²Aum näakjsten Dach, aus daut Volkj, daut aun de aundre Sied vom Mäa stunt, sagen daut doa kjeen aundret Schepp wia, aus blooss jant, en däm siene Jinja jestäajen wieren, un daut Jesus nich met siene Jinja em Schepp jestäajen wia, oba siene Jinja auleen wajch jefoaren wieren

²³(doa kjeemen oba aundre Schäp von Tiberias, dichtbie aun däm Plauz, wua see daut Broot jejäten hauden, nodäm de Har jedankt haud),

²⁴aus daut Volkj sach, daut Jesus nich doa es, siene Jinja uk nich, stieejen see enne Schäp un kjeemen no Kapernaum un sochten Jesus.

²⁵Un aus see am aune aundre Sied vom Mäa jefungen hauden, säden see to am: Rabi, wanea best du hiahäa jekomen?

²⁶Jesus auntwuad an un säd: Woarhauft, woarhauft, saj ekj junt: Jie sieekjen mie nich wiels jie Wunda (Tieekjens) sagen, oba wiels jie von de Brood jejäten haben un saut worden.

²⁷Oabeit nich fa daut Äten, daut vejenkjlich es, oba fa daut Äten, daut doa em eewje Läwen blift, daut de Menschensän junt jäwen woat; dan däm haft Gott de Voda bestädicht.

²⁸Donn säden see to am: Waut sell wie doonen, om de Woakjen Gottes to wirkjen?

²⁹Jesus auntwuad un säd to an: Dit es daut Woakj Gottes, daut jie aun däm jleewen, däm hee jeschekjt haft.

³⁰Donn säden see to am: Waut deist du fa een Wunda, om daut wie seenen kjennen un die jleewen? Waut wirkjst (deist) du?

³¹Onse Vodasch auten de Maunajrett enne Wieste, soo aus jeschräwen steit: Broot utem Himmel jeef hee an to äten. {Neh.9,15}

³²Donn säd Jesus to an: Woarhauft, woarhauft, saj ekj junt: Nich Moses jeef junt daut Broot vom Himmel, oba mien Voda jeft junt daut woarhauftje Broot utem Himmel.

³³Dan daut Broot Gottes es dee, dee utem Himmel erauf kjemt un de Welt daut Läwen jeft.

³⁴Donn säden see to am: Har, jeff ons aulentiet dit Broot.

³⁵Oba Jesus säd to an: Ekj sie daut Läwensbroot: Wäa no mie kjemt, woat nich hungren, un wäa aun mie jleeft, woat niemols mea darschten.

³⁶Oba ekj ha junt daut jesajcht, daut jie mie uk jeseenen ha un doch nich jleewen.

³⁷Aules, waut mie de Voda jeft, woat no mie komen, un wäa no mie kjemt, däm woa ekj nich rut steeten;

³⁸dan ekj sie vom Himmel raufjekomen, nich om mienen Wellen to doonen, oba däm sien Wellen, dee mie jeschekjt haft.

³⁹Dit es oba däm sien Wellen, dee mie jeschekjt haft, daut ekj von aul däm, waut hee mie jejäft haft, nuscht velia, oba daut ekj dee aum latsten Dach oppwakj.

⁴⁰Dan dit es mien Voda sien Wellen, daut jiedra, dee däm Sän sitt un aun am jleeft, daut eewje Läwen haft; un ekj woa am aum latsten Dach oppwakjen.

⁴¹Donn grunsten de Juden äwa am, wiels hee säd: Ekj sie daut Broot, daut vom Himmel rauf jekomen es;

⁴²un see säden: Es disa nich Jesus, Josef sien Sän, däm sien Voda un Mutta wie kjanen? Woo sajcht dan disa: Ekj sie vom Himmel rauf jekomen?

⁴³Doa auntwuad Jesus un säd to an: Grunzt nich unjarenaunda.

⁴⁴Kjeena kaun no mie komen, buta, daut de Voda, dee mie jeschekjt haft, am trakjt; un ekj woa am aum latsten Dach oppwakjen.

⁴⁵Daut steit enne Profeeten jeschräwen: «Un see woaren aula von Gott jelieet sennen». {Jes.54,13} Een jiedra, dee von Voda jehieet un jelieet haft, kjemt no mie.

⁴⁶Nich daut irjentwäa däm Voda jeseenen haft, buta däm, dee von Gott es, dee haft däm Voda jeseenen.

⁴⁷Woarhauft, woarhauft, saj ekj junt: Wäa [aun mie] jleeft, haft eewjet Läwen.

⁴⁸Ekj sie daut Läwensbroot.

⁴⁹June Vodasch ha Maunajrett enne Wieste jejäten un sent jestorwen.

⁵⁰Dit es daut Broot, daut vom Himmel rauf kjemt, om daut maun doavon at un nich stoaft.

⁵¹Ekj sie daut läwendje Broot, daut utem Himmel rauf jekomen es; wan wäa von disem Broot at, soo woat hee en Eewichkjeit läwen. Oba daut Broot, daut ekj jäwen woa, es mien Fleesch, daut ekj jäwen woa fa daut Läwen de Welt (ooda om daut de Welt läwen kaun).

⁵²De Juden streeden sikj unjarenaunda un säden: Woo kaun disa ons sien Fleesch to äten jäwen?

⁵³Donn säd Jesus to an: Woarhauft, woarhauft, ekj saj junt: Wan jie nich dän Menschensän sien Fleesch äten un sien Bloot drinkjen, (jejäten, jedrunken ha) soo ha jie kjeen Läwen en junt selfst.

⁵⁴Wäa mien Fleesch at un mien Bloot drinkjt, haft eewjet Läwen, un ekj woa am aum latsten Dach oppwakjen;

⁵⁵dan mien Fleesch es daut rechtje (woarhauftje) Äten, un mien Bloot es woarhauftja Drunk.

⁵⁶Wäa mien Fleesch at un mien Bloot drinkjt, blift en mie un ekj en am.

⁵⁷Soo aus de läwendja Voda mie jeschekjt haft un ekj läw derch (wäajen) däm Voda, soo uk, wäa mie at, woat uk derch mie läwen.

⁵⁸Dit es daut Broot, daut utem Himmel rauf jekomen es. Nich soo aus de Vodasch auten un storwen; wäa dit Broot at, dee woat läwen en Eewichkjeit.

⁵⁹Dit säd hee enne Sienagog, aus hee lieren deed en Kapernaum.

⁶⁰Väle von siene Jinja, dee daut jehieet hauden, säden: Dise Räd es hoat; wäa kaun de hieren?

⁶¹Doa oba Jesus bie sikj wist, daut siene Jinja doaräwa grunzten, säd hee to an: Oajat junt dit?

⁶²Wan jie dan däm Menschensän seenen woaren doahan noppfoaren, wua hee verhäa wia?

⁶³De Jeist es daut, dee läwendich moakt; daut Fleesch nuzt nuscht. De Wieed, dee ekj to junt jerät ha, sent Jeist un sent Läwen;

⁶⁴oba doa sent atelje mank junt, dee nich jleewen. Dan Jesus wist von Aunfank aun, wäa daut sent, dee nich jleewen, un wäa daut es, dee am veroden wudd.

⁶⁵Un hee säd: Doarom ha ekj junt jesajcht, daut kjeena no mie komen kaun, daut es am blooss vom Voda jejäft.

⁶⁶Von doa aun jinjen väle siene Jinja trigj un jinjen nich mea met am.

⁶⁷Donn säd Jesus to de 12: Veleicht well jie uk wajch gonen?

⁶⁸Simon Petrus auntwuad am: Har, no wäm sell wie gonen? Du hast eewje Läwenswieed;

⁶⁹un wie ha jejleeft un erkjant (jleewen un weeten), daut du [de Christus] de [Sän vom läwendjen Gott] Heilja Gottes best.

⁷⁰Jesus auntwuad an: Ha ekj nich junt, de 12, utjewält? Un von junt es eena een Diewel?

⁷¹Hee räd oba vom Judas, Simon sien Sän, dän Iskariot, dan disa sull am veroden, hee, dee eena von de 12 wia.