Read De Bibel JHF Johanes 7 Bible Online

Johanes 7 - De Bibel JHF bible

Johanes 7

¹Un nodäm jinkj Jesus en Galiläa erom; dan hee wull nich en Judäa erom gonen, wiels de Juden sochten am omtobrinjen.

²Oba daut wia boolt de Juden äa Fast, daut Loofboodenfast, dicht bie.

³Doa säden siene Breeda to am: Go von hia un go no Judäa, om daut uk diene Jinja diene Woakjen seenen, dee du deist;

⁴dan kjeena deit waut em Jeheemen un well doaderch effentlich bekaunt sennen. Wan du dise Dinj deist, soo wies die de (enne) Welt;

⁵dan siene Breeda jleewden uk nich aun am.

⁶Donn säd Jesus to an: Miene Tiet es noch nich jekomen, june Tiet es oba emma reed.

⁷De Welt kaun junt nich haussen; oba mie haust see, wiels ekj von de Welt zeij, daut äare Woakjen bees sent.

⁸Got jie nopp to disem Fast; ekj go nich nopp to disem Fast; dan miene Tiet es noch nich erfelt.

⁹Oba aus hee dit to an jesajcht haud, bleef hee en Galiläa.

¹⁰Oba aus siene Breeda nopp jegonen wieren, dan jinkj uk hee nopp toom Fast, nich openboa, oba heemlich.

¹¹De Juden sochten am oppem Fast un säden: Wua es hee (dee)?

¹²Un väl Jemurr wia unja däm Volkj wäajen (äwa) am; eenje säden: Hee es goot; de aundre säden: Nä, hee veleit daut Volkj.

¹³Kjeena räd frie von am ut Angst fa de Juden.

¹⁴Oba aus et medden (haulf) em Fast wia, jinkj Jesus nopp em Tempel un lieed.

¹⁵Doa vewundaden sikj de Juden un säden: Woo kjant disa de Schreft, doa hee dee nich jelieet haft?

¹⁶Doa auntwuad an Jesus un säd: Miene Lia es nich miene, oba däm siene, dee mie jeschekjt haft.

¹⁷Wan wäa sienen Wellen doonen well, soo woat hee von de Lia weeten, auf dee ut Gott es, ooda auf ekj ut (von) mie selfst räd.

¹⁸Wäa ut (von) sikj selfst räd, sieekjt siene ieejne Iea; wäa oba däm siene Iea sieekjt, dee am jeschekjt haft, dee es woarhauftich, un Ojjerajchtichkjeit es nich en am.

¹⁹Haft nich Moses junt daut Jesaz jejäft? Un kjeena von junt deit daut Jesaz. Wuarom sieekj jie mie omtobrinjen (doottomoaken)?

²⁰Daut Volkj auntwuad [un säd]: Du hast een Diewel; wäa sieekjt die omtobrinjen?

²¹Jesus auntwuad un säd to an: Een eensjet Woakj ha ekj jedonen, un jie wundren junt aula.

²²Doawäajen jeef Moses junt de Beschniedunk, (nich daut dee von Moses wia, oba vonne Vodasch), un jie beschnieden een Mensch aum Sabat.

²³Wan een Mensch aum Sabat de Beschniedunk kjricht, om dautet Jesaz nich jebroaken woat, sent jie äwa mie oajalich, daut ekj eenen Mensch ha gaunz jesunt jemoakt aum Sabat?

²⁴Recht nich nom Uagenschien, oba recht een jerajchtet Jerecht.

²⁵Doa säden eenje von de Bewona en Jerusalem: Es dit nich dee, däm see sochten omtobrinjen?

²⁶Un kjikjt, hee räd frie, un see sajen am nuscht. Haben dan de Bowaschte en Woarheit erkjant, daut dit de Christus es?

²⁷Oba disem kjan wie, wuahäa hee es; oba wan de Christus kjemt, kjeena weet, von wua hee es.

²⁸Jesus roopt lud em Tempel, lieed un säd: Jie kjanen mie un weeten uk, von wua ekj sie; un ekj sie nich von mie selfst jekomen, oba dee mie jeschekjt haft, es woarhauftich, däm jie nich kjanen.

²⁹Ekj kjan am, wiels ekj von am sie, un hee mie jeschekjt haft.

³⁰Doa sochten see am fausttonämen; un kjeena läd ne Haunt aun am, wiels siene Stund noch nich jekomen wia.

³¹Oba väle vom Volkj jleewden aun am un säden: Wan de Christus kjemt, woat hee mea Tieekjens doonen aus dee, dee disa jedonen haft?

³²De Farisäa hieeden daut heemliche Jeräd em Volkj äwa am; un de Farisäa un de Huagapriesta schekjten Deena, daut see am faustnämen sullen.

³³Donn säd Jesus: Noch eene kjliene Tiet sie ekj bie junt, un ekj go no däm, dee mie jeschekjt haft.

³⁴Jie woaren mie sieekjen un nich finjen; un wua ekj sie, kjenn jie nich hankomen.

³⁵Donn säden de Juden unjarenaunda: Wuahan well disa gonen, daut wie am nich finjen sellen? Veleicht well hee no de Vestreide mank de Griechen gonen, un de Griechen lieren?

³⁶Waut es daut fa een Wuat, daut hee säd: Jie woaren mie sieekjen un nich finjen, un: Wua ekj sie, kjenn jie nich hankomen?

³⁷Aum latsten, däm groote Fastdach oba stunt Jesus un roopt un säd: Wan wäm darscht, komm no mie un drinkj.

³⁸Wäa aun mie jleeft, soo aus de Schreft jesajcht haft, ut däm sien Lief woaren läwendje Wotastreem ranen.

³⁹Dit säd hee oba vom Jeist, däm dee aun am Jleewende kjrieen sullen; dan de Jeist wia noch nich doa, wiels Jesus noch nich veharlicht wia.

⁴⁰Atelje ute Menj säden, aus see dise Wieed hieeden: Disa es woarhauft de Profeet.

⁴¹Aundre säden: Disa es de Christus. Aundre säden: De Christus kjemt doch nich ut Galiläa?

⁴²Haft de Schreft nich jesajcht: Ut däm David sien Somen un ut Betlehem, däm Darp, wua David wia, kjemt de Christus?

⁴³Daut jeef wäajen am eene Tranunk (Deelunk) em Volkj.

⁴⁴Oba atelje von an wullen am faustnämen, oba kjeena läd de Henj aun am.

⁴⁵Donn kjeemen de Deena no de Huagapriesta un Farisäa, un dise säden to an: Wuarom ha jie am nich jebrocht?

⁴⁶De Deena auntwuaden: Niemols haft een Mensch soo jerät aus dis Mensch.

⁴⁷Donn auntwuaden an de Farisäa: Sent jie dan uk veleit?

⁴⁸Haft doa irjent een Bowaschta aun am jejleeft, ooda von de Farisäa?

⁴⁹Dit Volkj oba, dee daut Jesaz nich kjanen, see sent veflucht!

⁵⁰Doa säd Nikodemus, [dee de Nacht no am jekomen wia,] dee eena von an wia:

⁵¹Recht (veuadeelt) dan ons Jesaz däm Mensch, onen daut von am selfst jehieet un erkjant haft, waut hee deit?

⁵²See auntwuaden un säden to am: Best du uk ut Galiläa? Forsch un see, daut ut Galiläa kjeen Profeet oppsteit.

⁵³[Un jieda eena jinkj no sien Hus.