Read De Bibel JHF Johanes 9 Bible Online

Johanes 9 - De Bibel JHF bible

Johanes 9

¹Aus hee vebie jinkj, sach hee eenen Mensch, blint von Jeburt.

²Un siene Jinja fruagen am un säden: Rabi, wäa haft jesindicht, disa ooda siene Elren, daut hee blint jebuaren wort?

³Jesus auntwuad: Nich disa haft jesindicht, noch siene Elren, oba om daut Gott siene Woakjen aun am jeopenboat woaren.

⁴Ekj mott däm siene Woakjen wirkjen (verechten), dee mie jeschekjt haft, soo lang daut Dach es; doa kjemt de Nacht, doa kjeena wirkjen kaun.

⁵Soo lang ekj enne Welt sie, sie ekj daut Licht de Welt.

⁶Aus hee dit jesajcht haud, spieech hee oppe Ieed un muak een Brie utem Kjwiel un schmäad däm Brie opp siene Uagen;

⁷un hee säd to am: Go, wausch die enne Läacht (Puddel) von Siloa: [ooda vedolmetscht Jeschekjta]. Un hee jinkj han un wosch sikj, un kjeem seenent trigj.

⁸De Nobasch un dee am verhäa jeseenen hauden, daut hee een Pracha wia, säden: Es dit nich dee, dee doa saut un prachad?

⁹Eenje säden: Dee es daut; aundre säden: Nä, disa likjent am; hee säd: Ekj sie et.

¹⁰Donn säden see to am: Woo worden diene Uagen opjemoakt?

¹¹Hee auntwuad [un säd]: Een Mensch, de Jesus heet, muak een Brie un schmäad däm opp miene Uagen un säd to mie: Go han no Siloa un wausch die. Oba aus ekj han jinkj un mie jewoschen haud, kunn ekj seenen.

¹²Donn säden see to am: Wua es dee? Hee säd: Ekj weet daut nich.

¹³See brochten am, däm jewäsnen Blinjen, no de Farisäa.

¹⁴Oba daut wia Sabat, aus Jesus dän Brie jemoakt haud un siene Uagen opmuak.

¹⁵Donn fruagen uk de Farisäa am wada, woo hee es seenent jeworden. Oba hee säd to an: Hee läd Brie opp miene Uagen, un ekj wosch mie, un ekj kunn seenen.

¹⁶Doa säden eenje von de Farisäa: Disa Mensch es nich von Gott, dan hee helt dän Sabat nich. Aundre säden: Woo kaun een sindja Mensch soone Tieekjen doonen? Un daut wia ne Spoolunk (veschiedne Meeninj) unja an.

¹⁷See säden wada toom Blinjen: Waut sajchst du von am, wiels hee diene Uagen opjemoakt haft? Oba hee säd: Hee es een Profeet.

¹⁸De Juden jleewden daut nich von am, daut hee blint wia un nu seenen kaun, bat see siene Elren roopten, von däm, dee doa seenent jeworden wia.

¹⁹Un see fruagen an un säden: Es dit jun Sän, von däm jie sajen, daut hee blint jebuaren wort (wia)? Woo sitt hee dan nu?

²⁰Siene Elren auntwuaden [an] un säden: Wie weeten, daut dit ons Sän es, un daut hee blint jebuaren wort;

²¹oba woo hee nu seenen kaun, weet wie nich, ooda wäa siene Uagen opjemoakt haft, weet wie nich. Hee es oolt jenuach; froacht am, hee woat fa sikj selfst räden.

²²Dit säden siene Elren, wiels see fa de Juden Angst hauden; dan de Juden wieren aul äwareen jekomen, daut, wan irjentwäa am aus däm Christus bekjanen wudd, hee sull ute Sienagog utjeschloten woaren.

²³Doawäajen säden siene Elren: Hee es oolt jenuach, froacht am.

²⁴See roopten toom tweeden Mol däm Mensch, dee doa Blint wia, un säden to am: Jeff Gott de Iea! Wie weeten daut dis Mensch een Sinda es.

²⁵Doa auntwuad hee: Auf hee een Sinda es, weet ekj nich; eent weet ekj; daut ekj blint wia, un nu seenen kaun.

²⁶Donn säden see wada to am: Waut haft hee die jedonen? Woo muak hee diene Uagen op?

²⁷Hee auntwuad an: Ekj ha junt daut aul jesajcht, un jie ha nich jehieet; wuarom well jie daut noch mol hieren? Well jie veleicht uk siene Jinja woaren?

²⁸See spotten äwa am un säden: Du best sien Jinja; oba wie sent Moses siene Jinja.

²⁹Wie weeten, daut Gott to Moses jerät haft; von disem oba weet wie nich, wuahäa hee es.

³⁰De Maun auntwuad un säd to an: Daut es doch wundaboa, daut jie nich weeten, wuahäa hee es, un hee haft doch miene Uagen opjemoakt.

³¹[Oba] wie weeten, daut Gott Sinda nich hieet, oba wäa emma gottesferchtich es un sienen Wellen deit, däm hieet hee.

³²Vonne Eewichkjeit häa es nich jehieet, daut wäa eenem Blintjebuarnen de Uagen opjemoakt haft.

³³Wan disa nich von Gott wia, soo kunn hee nuscht doonen.

³⁴See auntwuaden un säden to am: Du best gaunz en Sinden jebuaren, un du lieescht ons? Un see schmeeten am rut.

³⁵Jesus hieed daut see am rutjeschmäten hauden; un aus hee am funk, säd hee to am: Jleefst du aun däm Sän Gottes?

³⁶Hee auntwuad un säd: Har, un wäa es daut, om daut ekj aun am jleewen kaun?

³⁷Jesus säd to am: Du hast am jeseenen, un dee met die räd, dee es daut.

³⁸Oba hee säd: Ekj jleew, Har; un hee foll ver am dol.

³⁹Un Jesus säd: Toom Jerecht sie ekj en dise Welt jekomen, om daut dee doa Nichseenende seenen un dee doa seenende blint woaren.

⁴⁰[Un] atelje von de Farisäa, dee bie am wieren, hieeden dit un säden to am: Sent wie dan uk Blint?

⁴¹Jesus säd to an: Wan jie blint wieren, dan wudd jie kjeene Sinden ha, oba wiels jie sajen: Wie seenen, soo blift june Sind opp junt.