Read De Bibel JHF Aposteljeschicht 1 Bible Online

Aposteljeschicht 1 - De Bibel JHF bible

Aposteljeschicht 1

¹Daut ieeschte Buak (Berecht) ha ekj vefot äwa aules, oo Teofilus, waut Jesus aunfunk, soo aus to doonen aus uk to lieren,

²bot däm Dach, aun däm hee [em Himmel] oppjenomen wort, nodäm hee de Apostel, dee hee utjewält haud, derch dän Heiljen Jeist Befäl jejäft haud;

³dise haud hee sikj uk aus läwendich doajestalt (jewäsen), no sienen Lieden, derch väl Tieekjen (Bewiesen), endäm hee 40 Doag an erschient (sikj seenen leet) un räd äwa daut Rikj Gottes.

⁴Un aus hee met an toop wia, befool hee an, nich von Jerusalem wajchtogonen, oba opp daut Vesproakne vom Voda to wachten, soo aus (daut) jie von mie jehieet ha;

⁵dan Johanes haft zwoa met Wota jedeept, oba jie woaren met dän Heiljen Jeist jedeept woaren, no disem - nich no väle Doag.

⁶See oba, aus see toop jekomen wieren, fruagen am un säden: Har, stalst du en dise Tiet wada daut Rikj fa Israel häa?

⁷Oba hee säd to an: Daut es nich june Sach, Tiet un Tieden to weeten, dee de Voda en siene ieejne Macht faustjesat haft.

⁸Oba jie woaren Krauft emfangen, wan de Heilja Jeist opp junt jekomen es; un jie woaren miene Zeijen sennen, soo aus en Jerusalem aus uk en gaunz Judäa un Samaria un bot aum Enj de Ieed.

⁹Aus hee dit jesajcht haud, aus see am sagen, wort hee (nohecht) oppjehowen, un eene Wolkj neem am opp, wajch von äare Uagen.

¹⁰Un aus see stiew (jeneiw) nom Himmel kjikjten, aus hee nohecht fua, un kjikj, 2 Mana stunden bie an en witte Kjleeda,

¹¹dee doa säden: Mana von Galiläa, waut sto jie, un kjikjen nohecht nom Himmel? Dis Jesus, dee von junt wajch jenomen es em Himmel, woat krakjt soo komen, aus jie am jeseenen ha hangonen em Himmel.

¹²Donn jinjen see vom Boajch trigj no Jerusalem, jenant Eeljboajch, dee doa dicht bie Jerusalem es, een Sabatwajch auf es.

¹³Un aus see nenn jekomen wieren, jinjen see nopp enne Bowastow, wua see sikj opphilden, soo aus Petrus un uk Johanes un Jakobus un Andreas, Filippus un Tomas, Bartolomäus un Matäus, Jakobus, Alfäus sien Sän, un Simon, de Zelot (Iewaja), un Judas, Jakobus sien Sän.

¹⁴Dise aule wieren faust en een Senn (eenich) em Jebäd met de Frues un Maria, de Mutta Jesus, un siene Breeda.

¹⁵Un en dise Doag stunt Petrus enne Medd de Breeda opp, un säd (oba doa wia aun däm Uat eene Menj von onjefäa 120 toopjekomen):

¹⁶Mana, Breeda, daut wia needich, daut de Schreft erfelt wort, dee de Heilja Jeist verhäa jesajcht haud derch David sien Mul äwa Judas, dee een Wajchwiesa wort fa dän de Jesus faustneemen.

¹⁷Wiels hee wia eena unja ons un hee haud daut Loss toom Deenst jekjräajen.

¹⁸(Disa kjrieech doafäa (jewonn) een Aka vom ojjerajchten Loon, un endäm hee äwakopp foll, enne Medd vebruak, un aul sien Bennaschtet (Doarm) rutjeschett wort.

¹⁹Un daut wort aule Enwona en Jerusalem bekaunt, soo daut jan Aka en äare [ieejne] Sproak Hakeldamach jenant wort, daut heet Blootaka.)

²⁰Dan daut steit em Psalmbuak jeschräwen: «Sien Hus saul vewust (eed) woaren, un kjeena saul doabennen wonen», {Ps.69,26} un: «Sien Aumt kjricht een aundra». {Ps.109,8}

²¹Aulsoo es daut needich, daut von dee Mana, dee met ons de gaunze Tiet jegonen sent, en (de Tiet) dee de Har Jesus bie ons nenn un utjegonen es,

²²aunjefongen von Johanes sien Deepen bot däm Dach, aun däm hee von ons oppjenomen wort, eena von dise mott een Zeij von siene Oppstoninj met ons woaren.

²³Un see stalden twee väa: Josef, jenant Barsabas, dee met Bienomen Justus jenant wort, un Matias.

²⁴Un see bäden un säden: Du, Har, dee du aule Hoaten kjanst, wies, eenen von dise twee däm du utjewält hast,

²⁵om daut Loss (däm Plauz) en disem Deenst un Apostelaumt to emfangen, von däm Judas aufjefollen es, om no sienem ieejnen Uat to gonen.

²⁶Un see jäwen an Lessa, un daut Loss foll opp Matias, un hee wort to de alw Apostel toojetalt.