Read De Bibel JHF Aposteljeschicht 11 Bible Online

Aposteljeschicht 11 - De Bibel JHF bible

Aposteljeschicht 11

¹Oba aus de Apostel un de Breeda dee en Judäa wieren, hieeden, daut uk de Heiden daut Wuat Gottes aunjenomen hauden;

²oba aus Petrus no Jerusalem enopp kjeem, streeden dee ut de Beschniedunk met am,

³un säden: Du best nenn jegonen no dee onbeschnädne Mana un hast met an jejäten.

⁴Petrus oba funk aun un vetald an aules no de Rieej un säd:

⁵Ekj wia enne Staut Joppe un bäd, un sach en eene Entrekjunk een Jesecht, een Jefäss rauf komen, aus een grootet Lienduak, aun vea Akjen rauf jeloten wort vom Himmel; un daut kjeem bat (no) mie.

⁶Un aus ekj met fausten Blekj doa nenn kjikjt, moakjt ekj un sach veabeenje Tieren von oppe Ieed un wille Tieren un Krupende un de Väajel von unjrem Himmel.

⁷Oba ekj hieed uk eene Stemm, dee to mie säd: Sto opp, Petrus, schlacht un at!

⁸Oba ekj säd: En kjeenem Faul, Har! Wiels Jemeenet ooda Orreinet es niemols en mienem Mul nenn jekomen.

⁹Oba eene Stemm auntwuad mie vom Himmel toom tweeden Mol: Waut Gott rein jemoakt haft, daut hool du nich fa jemeen!

¹⁰Dit passieed oba dree Mol ; un aules wort wada nohecht jehowen em Himmel.

¹¹Un kjikj, sooboolt kjeemen 3 Mana no daut Hus, en daut wie (ekj) wieren, dee von Cäsarea no mie jeschekjt wieren.

¹²Oba de Jeist befool mie met an to gonen, un kjeen bedenkjen haben. Oba met mie jinjen uk dise 6 Breeda, un wie jinjen en dis Maun sien Hus nenn.

¹³Un hee berecht ons, woo hee däm Enjel en sien Hus stonen sach, un sajen hieed: Schekj no Joppe un lot Simon komen, met Bienomen Petrus jenant;

¹⁴dee woat Wieed to die räden, derch dee du jerat woaren woascht, du un dien gaunzet Hus.

¹⁵No däm oba aus ekj aunfunk to räden, foll de Heilja Jeist opp an, soo aus uk opp ons aum Aunfank.

¹⁶Oba ekj docht aun daut Harn Wuat, woo hee säd: Johanes deept zwoa met Wota, oba jie woaren met dän Heiljen Jeist jedeept woaren.

¹⁷Wan nu Gott de selwje Gow an jeft aus uk ons, jleewent Jewordne aun däm Har Jesus Christus, wäa wia ekj, daut ekj haud Gott wäaren kjennen?

¹⁸Oba aus see dit jehieet hauden, beruijden see sikj, un veharlichten Gott un säden: Aulsoo haft Gott uk de Heiden daut Omdenkjen (Busse) toom Läwen jejäft.

¹⁹Dee nu Vestreide wäajen de Bedrenkjnis (Vefoljunk), dee wäajen Stefanus jekomen wia, jinjen omhäa bot Feenizia un Ziepern un Antiochia un säden daut Wuat to kjeenem, buta to de Juden.

²⁰Oba doa wieren eenje unja an, Mana von Ziepern un Kiereen, dee doa, aus see no Antiochia kjeemen, uk räden to de Hellenisten (Griechen), endäm see de frooe Bootschoft vom Har Jesus vekjindijden.

²¹Un däm Har siene Haunt wia met an, un eene groote Zol wort jleewent un bekjieeden sikj toom Har.

²²Oba daut kjeem de Norecht to Uaren de Jemeent en Jerusalem, äwa an, un see schekjten Barnabas ut, daut hee hanjinkj bat no Antiochia;

²³disa, aus hee hankjeem un de Jnod Gottes sach, freid sikj un muntad an aula opp met fausten Hoaten biem Harn to bliewen.

²⁴Dan hee wia een gooda Maun un voll heiljen Jeist un Gloowen; un eene groote Zol aun Menschen wort däm Har doatoo jedonen.

²⁵Oba hee jinkj wajch no Tarsus, om Saul opptosieekjen.

²⁶Un aus hee am jefungen haud, brocht hee am no Antiochia. Oba daut passieed an, daut see een gaunzet Joa en de Jemeent toopkjeemen, un eene groote Menj lieeden, un daut de Jinja toom ieeschten Mol en Antiochia Christen jenant worden.

²⁷Oba en dee Doag kjeemen Profeeten von Jerusalem rauf no Antiochia.

²⁸Oba eena von an, met Nomen Agabus, stunt opp un zeijd an derch däm Jeist eene groote Hungaschnoot aun, dee äwa de gaunze bewonde Ieed komen sull; de unja Klaudius kjeem.

²⁹Oba de Jinja neemen sikj väa, doano aus een jiedra Rikjtum haud, daut een jiedra von an, toom unjastetten de Breeda schekjen sull, dee en Judäa wonden;

³⁰daut deeden see uk, un schekjten daut no de Eltestasch derch de Haunt von Barnabas un Saul.