Read De Bibel JHF Aposteljeschicht 14 Bible Online

Aposteljeschicht 14 - De Bibel JHF bible

Aposteljeschicht 14

¹Oba daut passieed en Ikonion, daut see metenaunda enne Sienagog (Judenschool) de Juden jinjen un soo räden (prädijden), soo daut eene groote Menj, vonne Juden aus uk Griechen jleewent worden.

²Oba de Juden dee dän Gloowen aufjewäsen hauden hizten un räajden de Jemieda de Heiden, jäajen de Breeda.

³See bleewen doa nu ne lenjre Tiet, un räden frie un mootich em Harn, dee däm Wuat siena Jnod Zeichnis jeewen, endäm hee Tieekjen un Wunda passieren leet derch äare Henj.

⁴Oba de Menj (daut Volkj) enne Staut wia jetrant, de eene wieren met de Juden, de aundre met de Apostel.

⁵Aus oba een groota Opprua de Heiden aus uk de Juden met äare Bowaschte oppkjeem, om an to meshaundlen un to steenjen,

⁶aus see daut enworden, jinjen (randen) see wajch, en de Städa; Liekaonien, Liestra un Derbe, un de Omjäajent,

⁷un dort vekjindijden see de frooe Bootschoft.

⁸Un een Maun en Liestra saut doa, krauftloos aune Feet, lom vom Muttalief aun, dee niemols jegonen haud.

⁹Disa hieed Paulus räden, dee sien Uag faust opp am jerecht haud un jeseenen haud, daut dee Gloowen haft, daut hee jerat (jeheelt) woaren kunn,

¹⁰säd hee met ne lude Stemm: Sto opp, opp diene Feet! Un hee sprunk opp un jinkj.

¹¹Un aus daut Volkj sach, waut Paulus jedonen haud, erhowen see äare Stemm un säden opp Liekaonisch: De Jetta sent aus Menschen jeworden un sent no ons rauf jekomen.

¹²Un see nanden Barnabas Zeus un Paulus oba Hermes, wiels hee daut Wuat fieed.

¹³De Priesta von Zeus, dee vere Staut wia, brocht Ossen un Kjrens aun de Puaten un wull met däm Volkj opfren.

¹⁴Oba aus de Apostel, Paulus un Barnabas, dit hieeden, vereeten see äare Kjleeda, sprungen rut manke Volkjsmenj (mank daut Volkj) un schrieejen

¹⁵un säden, Mana, waut doo jie doa? Wie sent uk krakjt soone Menschen aus jie un vekjindjen junt de frooe Bootschoft, daut jie junt von dise nutzloose Jetta bekjieren toom läwendjen Gott, dee däm Himmel un de Ieed un daut Mäa un aules, waut doabennen es, jemoakt haft;

¹⁶dee enne oole Tieden haft aule Jeschlajchta un Velkja äare ieejne Wäaj gonen loten,

¹⁷un doch haft hee sikj nich onen Zeichnis jeloten, em Goodet doonen un haft vom Himmel Räajen jejäft un fruchtboare Tieden un met Noarinj un Freid june Hoaten jefelt.

¹⁸Un aus see dit säden, kunnen see meist nich de Volkjsmenj (daut Volkj) berujen, daut see an nich opfaden.

¹⁹Oba doatoo kjeemen ut Antiochia un Ikonion Juden un aus see daut Volkj äwaräd un Paulus jesteenicht hauden, schlapten see am ute Staut rut, un dochten, daut hee Doot es.

²⁰Oba aus de Jinja sikj om am omrinjt hauden, stunt hee opp un jinkj enne Staut nenn; un aum aundren Dach jinkj hee un Barnabas no Derbe.

²¹Un aus see en jane Staut de frooe Bootschoft vekjindicht un väle to Jinja jemoakt hauden, jinjen see trigj no Liestra un no Ikonion un no Antiochia,

²²stoakjten de Seelen de Jinja un vemonden an em Gloowen to bliewen, un [säden], daut wie derch väl Bedrenkjnis (Triebsaul) en daut Rikj Gottes nengonen motten.

²³Oba aus see en jiedre Jemeent Eltestasch enjesat (aunjestalt) hauden, see bäden met Fausten un äwajeewen an däm Har, aun däm see jleewent jeworden wieren.

²⁴Un aus see derch Pisidien jegonen wieren, kjeemen see no Pamfielien;

²⁵un aus see en Perge daut Wuat jerät (jeprädicht) hauden, jinjen see rauf no Atalia,

²⁶un von doa säajelden see auf no Antiochia, von wua ut see wieren de Jnod Gottes äwajeft worden toom Woakj, daut see erfelt hauden.

²⁷Oba aus see aunjekomen wieren un de Jemeent vesaumeld hauden, un see berechten aules, waut Gott aun (met) an jedonen un daut hee de Heiden de Däa toom Gloowen opjemoakt haft.

²⁸Oba see bleewen nich jerinje (ne lange) Tiet bie de Jinja.