Read De Bibel JHF Aposteljeschicht 18 Bible Online

Aposteljeschicht 18 - De Bibel JHF bible

Aposteljeschicht 18

¹Doano veleet hee Ateen, un kjeem no Korint.

²Un aus hee eenen Jud funk, met Nomen Aquilla, jebuaren en Pontus, dee ver kortem ut Italien jekomen wia, un Priszilla siene Fru, (wiels Klaudius befoolen haud, daut aule Juden Room veloten sullen), hee jinkj no an,

³un doawäajen, wiels hee daut selwje Hauntwoakj dreef, bleef hee bie an un oabeid; see wieren Zeltmoaka vom Hauntwoakj.

⁴Oba hee räd jieda Sabat enne Sienagog un socht Juden un Griechen to äwazeijen.

⁵Oba aus Silas un Timotäus von Mazedonien rauf jekomen wieren, wort Paulus gaunz äwafoddat vom Wuat (daut hee prädijd) un bezeijd de Juden daut Jesus de Jesaulwda es.

⁶Oba aus see sikj doajäajen stalden un lastaden, scheddad hee siene Kjleeda ut un säd to an: Jun Bloot kjemt äwa jun Kopp! Ekj sie rein; von nu aun woa ekj no de Heiden gonen.

⁷Un hee jinkj von doa wajch un kjeem em Hus von eenen met Nomen Titus Justus, dee Gott veieed (aunbäd), däm sien Hus wia aunjrensent aune Sienagog.

⁸Oba Krispus, de Sienagog Väastona, kjeem toom Gloowen aum Harn un dee en sienem Hus; un väle vonne Korinta, hieeden un jleewden, un leeten sikj deepen.

⁹Oba de Har räd to Paulus enne Nacht derch een Jesecht: Enjst die nich, oba räd un sie nich stell!

¹⁰Dan ekj sie met die, un kjeena saul die toosaten, om die to meshaundlen, dan ekj ha en dise Staut een grootet Volkj.

¹¹Hee hilt sikj een Joa un sas Moonat opp, un lieed mank an daut Wuat Gottes.

¹²Oba aus Galio Laundesvewaulta (Gowernia) von Achaja wia, hoowen de Juden sikj met een Senn (äwareen) jäajen Paulus opp, un fieeden am ver däm Rechtastool

¹³un säden: Disa berät de Menschen jäajen daut Jesaz, Gott auntobäden.

¹⁴Oba aus Paulus daut Mul opmoaken wull, säd Galio to de Juden: Wanet een Orrajcht ooda eene beese Haundlunk wia, oo Juden, met eenem veninftjen Grunt wudd ekj june Kloag aunhorchen;

¹⁵oba wan daut Strietfroagen sent äwa de Lia un Nomes en junem Jesaz, daut jie ha, sell jie selfst toseenen, [dan] ekj well nich äwa dise Dinj Rechta sennen.

¹⁶Un hee juach an vom Rechtastool wajch.

¹⁷Oba aula jreepen Sostenes aun, däm Sienagog Väastona, un schluagen am verem Rechtastool; un nuscht von disem lach Galio aum Hoat.

¹⁸Oba Paulus bleef doa noch väle Doag, hee neem vonne Breeda Aufscheet, un reisd auf no Sierien; un met am Priszilla un Aquilla, hee leet sikj däm Kopp en Kenchreä schäaren, dan hee haud een Vespräakjen.

¹⁹See kjeemen no Efesus un jane leet hee doa; oba hee selfst jinkj enne Sienagog nenn un räd to (met) de Juden.

²⁰Oba aus see am bedden, äwa lenjre Tiet [bie an] to bliewen, hee wellijd nich en,

²¹oba neem Aufscheet (von an) un säd: [Ekj mott daut näakjste Fast en Jerusalem hoolen,] ekj kom wada trigj no junt, wan Gott well. Un hee fua von Efesus auf.

²²Un raufjekomen no Cäsarea, jinkj hee enopp (no Jerusalem) un bejreest de Jemeent un jinkj rauf no Antiochia.

²³Un hee bleef doa eene Tiet, hee jinkj wajch un derchreisd de Rieej no daut galatische Launt un Friegien, un stoakjt aule Jinja.

²⁴Oba een Jud, met Nomen Apollos, en Alexandria jebuaren, een gooda Rädna, dee kjraftich enne Schreft wia, kjeem no Efesus.

²⁵Disa wia em Harn Wajch unjarecht, un brennent em Jeist, hee räd un lieed jeneiw daut (aules) äwa Jesus, oba hee kjand blooss Johanes sien Deepen.

²⁶Un disa funk aun frie un mootich enne Sienagog to räden. Oba aus Priszilla un Aquilla am hieeden, neemen see am no sikj un läden am däm Wajch Gottes brennent ut.

²⁷Oba aus hee no Achaja reisen wull, de Breeda schreewen aune Jinja un muntaden an opp, am frintlich opptonämen. Un aus hee hankjeem, hee holp väl (sea) dän, dee derch de Jnod toom Gloowen jekomen wieren;

²⁸dan kjraftich un jrintlich wadaspruak hee de Juden, openboa bewees hee an derch de Schreften, daut Jesus de Jesaulwda (Christus) es.