Read De Bibel JHF Aposteljeschicht 2 Bible Online

Aposteljeschicht 2 - De Bibel JHF bible

Aposteljeschicht 2

¹Un aus de Pinjstdach erfelt wia, wieren see aula aun däm selwjen Uat toop.

²Un plazlich kaum vom Himmel een Bruzhen, aus een groota (jewaultja) Wint, un erfeld (feld) daut gaunze Hus, wua see sauten.

³Un doa kjeemen äwa an jedeelde Tungen aus von Fia, un dee saden sikj opp jiedrem von an.

⁴Un see wieren aula met Heiljen Jeist erfelt un fungen aun, to räden en aundre Sproaken (Tungen) soo aus de Jeist an daut jeef uttospräakjen.

⁵Oba en Jerusalem wonden Juden, gottesferchtje Mana, ut jiedrem Volkj unjrem Himmel.

⁶Oba aus daut Bruzhen passieet wia, kjeem de Menj (Volkj) toop un wieren vewundat, wiels see een jiedra en siene ieejne Sproak an räden hieed.

⁷Oba see staunden aula un wundaden sikj un säden: Kjikj, sent nich aul dise, dee doa räden, Galiläa?

⁸Un woo hia wie an, een jiedra en onse ieejne Sproak, en dee wie jebuaren sent,

⁹Parta un Meeda un Elamita, un dee en Mesopotamien wonen un von Judäa un Kapadozien, Pontus un Asien,

¹⁰un Friegien un Pamfielien, Ägipten un de Jäajent von Libien jäajenäwa Kiereen, un dee ut Room de sikj hia oppholen,

¹¹Juden un uk Proselieten (jleewende ute Velkja) Kreeta un Araba - wie hieren an en onse Tungen (Sproak) de groote Woakjen Gottes räden?

¹²Oba see wieren aule veduzt un wieren rotloos, un säden eena dän aundren: Waut saul (kaun) dit bedieden?

¹³Oba aundre spotten un säden: See sent voll seeta Wien.

¹⁴Oba Petrus met de Alw stunt opp, un räd bejeistat met ne lude Stemm un säd to an: Mana, Juden un jie aula dee en Jerusalem wonen, dit sell jie weeten, un nemt met de Uaren opp - miene Wieed!

¹⁵Dan nich soo aus jie denkjen, daut dise bedrunken sent, dan daut es ieescht de dredde Stund aum Dach;

¹⁶oba dit es daut, waut derch däm Profeet Joel jesajcht wort:

¹⁷«Un daut woat enne latste Doag sennen, sajcht Gott, ekj woa von mienen Jeist opp aulet Fleesch (Menschen) utjeeten, un june Säns un june Dajchta woaren profezeien, un june Bocha (junge Mana) woaren Jesechta (Visionen) seenen, un june Oole woaren Dreem haben;

¹⁸un uk opp miene Kjnajchts un opp miene Deenstmejales woa ekj aun jane Doag von mienem Jeist utjeeten, un see woaren profezeien.

¹⁹Un ekj woa Wunda aum Himmel bowen un Tieekjen unjen oppe Ieed jäwen: Bloot un Fia un Ruakdaump;

²⁰De Sonn woat vewaundelt en Diestanis un de Mon en Bloot, ea de groota un strolenda (harlicha) Harn sien Dach {Mat.1,20} kjemt.

²¹Un daut woat sennen, een jiedra, dee däm Harn Nomen aunroopen woat, woat jerat woaren». {Joel 2,28-32}

²²Mana von Israel, horcht dise Wieed: Jesus, dän Nazarena, eenen Maun, von Gott bestädicht ver junt, derch majchtje Machtwoakjen un Wunda un Tieekjen, dee Gott derch am en june Medd jedonen haft, soo aus jie selfst weeten, -

²³disem (Maun), nom bestemden Rotschluss un Väaseenen Gottes hanjejäft, ha jie derch de Haunt de Jesazloose aunjeschloagen (aunjenoagelt) [aum Kjriez] un omjebrocht.

²⁴Däm haft Gott oppjewakjt, nodäm hee de Doodesween jeleest haud, wiels daut nich mäajlich wia, daut hee von am (vom Doot) faust jehoolen wort.

²⁵Dan David sajcht äwa am: «Ekj sach däm Har aulentiet ver mie; dan hee es aun miene Rajchte, doamet ekj nich wank (schwak woa).

²⁶Doarom freid sikj mien Hoat, un miene Tung jubelt; oba uk mien Fleesch woat en Hopninj ruen,

²⁷dan du woascht miene Seel nich em Doodenrikj (griechisch: Hades) loten, un woascht nich dienen Heiljen de Vewäsunk seenen loten.

²⁸Du hast mie dee Läweswäaj openboa jemoakt; un woascht mie met Freid fellen ver dienem Aunjesecht». {Ps.16,8-11}

²⁹Mana un Breeda, erlaubt mie, met frieem Moot (friemootich) to junt äwa däm Staumvoda David to räden, daut hee jestorwen aus uk begroft es un sien Grauf es unja ons bot opp disem Dach.

³⁰Doa hee een Profeet wia un wist, daut Gott am met eenem Eit jeschwuaren haud, vonne Frucht siene Lenden opp sienen Troon to setten,

³¹hee haft em verutseenen, von Christus sien Oppstonen jerät, un hee wudd nich em Doodenrikj (griechisch: Hades) jeloten, un sien Fleesch haft nich de Vewäsunk jeseenen.

³²Disen Jesus haft Gott oppstonen loten, doavon wie aula Zeijen sent.

³³Nu daut Gott am bie sikj to rajchte Haunt erhowen haft, un de Vespräakjunk - dän Heiljen Jeist vom Voda jekjräajen haft, hee haft däm utjegoten, waut jie nu seenen un hieren.

³⁴Dan nich David es en de Himmel noppjefoaren, oba hee selfst sajcht: «Jesajcht haft de Har to mienem Harn: Sat die to (aun) miene Rajchte,

³⁵bot ekj diene Fiend hanlaj aus Footbenkj fa diene Feet». {Ps.110,1}

³⁶Daut gaunze Hus Israel erkjan nu met Sechaheit, daut Gott am toom Harn aus uk toom Jesaulwden (Jesus) jemoakt haft, disen Jesus, dän jie jekjriezicht ha.

³⁷Oba aus see daut hieeden, jinkj daut an derch daut Hoat, un see säden to Petrus un de aundre Apostel: Waut sell wie doonen, [jie Mana] Breeda?

³⁸Oba Petrus säd to an: Denkjt om (doot Busse), un een jiedra von junt lot sikj deepen opp dän Nomen Jesu Christi to Vejäwunk de Sinden, un jie woaren de Gow dän Heiljen Jeist emfangen.

³⁹Dan junt es daut Vespräakjen un (uk fa) june Kjinja un aule, dee wiet auf sent, soo väl de Har, onsa Gott, tooroopen woat.

⁴⁰Un met väl aundre Wieed läd hee een Zeichnis auf un vemond an un säd: Lot junt raden von disem vedreiden Jeschlajcht.

⁴¹Dee doa sien Wuat oppneemen, leeten sikj deepen, un aun janem Dach worden onjefäa 3000 Seelen doatoo jedonen.

⁴²Oba see bleewen (bestendich) faust en de Lia de Apostel un enne Jemeenschoft, un em Brootbräakjen un em Jebäd.

⁴³Oba daut kjeem Angst äwa jiedre Seel, un väl Wunda un Tieekjens passieeden derch de Apostel.

⁴⁴Oba aul dee toom Gloowen jekomen wieren, wieren toop (aun däm selwjen Uat) un hauden aules jemeensom;

⁴⁵un see vekoften äa Hab un Goot un vedeelden de aun aule, doano aus een jiedra needich haud (brukt).

⁴⁶Un jieda Dach bleewen see faust (bestendich) en eenem Senn em Tempel, un bruaken enne Hiesa daut Broot, un neemen daut Äten met Jubel un Eenfeltich (opprechtich) em Hoaten to (no) sikj,

⁴⁷lowden Gott un hauden Gonst biem gaunzen Volkj. Oba de Har deed jieda Dach (soone) doatoo, dee jerat sullen woaren, [to de Jemeent].