Read De Bibel JHF Aposteljeschicht 20 Bible Online

Aposteljeschicht 20 - De Bibel JHF bible

Aposteljeschicht 20

¹Oba nodäm de Opprua oppjehieet haud, leet Paulus de Jinja no sikj komen [un an Moot toojesproaken haud], un aus hee Aufscheet jenomen haud, jinkj hee wajch, om no Mazedonien to reisen.

²Oba aus hee de Omjäajent derch jereist un dän met väl Wieed Moot toojesproaken haud, kjeem hee no Griechenlaunt.

³Un hee bleef doa 3 Moonat; aus hee no Sierien auffoaren wull, [wort vonne Juden een Aunschlach jäajen am jemoakt,] wia hee de Meeninj, trigj derch Mazedonien to gonen (reisen).

⁴Oba Sopater, de Sän Pierus, ut Beria, foljd (jinkj met) am bat Asien, oba vonne Tessalonicha Aristarchus un Sekundus un Gajus von Derbe un Timotäus un Tiechikus un Trofimus ut Asien.

⁵Oba dise jinjen veropp un luaden opp ons en Troas;

⁶oba wie fuaren no daut Fast von de onjesuade Brood von Filippi auf un kjeemen en fief Doag no an en (no) Troas, wua wie säwen Doag bleewen.

⁷Oba aum ieeschten Dach enne Wäakj, aus wie vesaumeld wieren, daut Broot to bräakjen, räd Paulus met an, endäm hee aum näakjsten Dach aufreisen wull; un hee vetrock de Räd bot Meddel enne Nacht.

⁸Doa wieren oba väl Laumpen enne Bowastow, wua wie vesaumeld wieren.

⁹Een junga Maun, met Nomen Eutiechus, saut em Fensta un wort von eenem deepen Schlop äwafollen, aus Paulus äwa lenjre Tiet räd, un äwafollen vom Schlop, foll hee vom dredden Stock rauf un wort Doot oppjehowen.

¹⁰Oba Paulus jinkj rauf un foll opp am, un fot am om, un säd: Siet nich beorruicht , dan siene Seel es en am.

¹¹Oba hee jinkj nopp un aus hee daut Broot jebroaken un jejäten haud un eene lenjre Tiet bat Zemorjes jerät haud, jinkj hee wajch.

¹²See brochten oba däm jungen Maun läwendich un worden sea jetreest.

¹³Oba wie jinjen veropp oppem Schepp, un fuaren auf no Asos, om Paulus doa opp (met) to nämen; soo haud hee daut aunjeordnet, dan hee selfst wull tofoot gonen.

¹⁴Oba aus hee met ons en Asos toopkjeem, neem wie am opp un kjeemen no Mitilene.

¹⁵Un aus wie von doa wajch säajelden,, kjeem wie aum näakjsten Dach Chios jäajenäwa aun; un aum aundren Dach fua wie äwa no Samos, un nodäm wie en Trogielium jebläwen wieren, kjeem wie aum näakjsten Dach no Milet;

¹⁶dan Paulus haud beschlooten (woat sikj eenich), bie Efesus vebie to foaren, doamet et am nich passieet, en Asien de Tiet to vebrinjen; dan hee spood sikj, wan et am mäajlich sennen sull, aum Pinjstdach en Jerusalem to sennen.

¹⁷Oba von Milet schekjt hee no Efesus un leet de Eltestasch de Jemeent no sikj komen.

¹⁸Oba aus see bie am aunjekomen wieren, säd hee to an: Jie weeten, vom ieeschten Dach aun, aus ekj no Asien kjeem, woo ekj bie junt de gaunze Tiet jewast sie,

¹⁹däm Harn en aula Deemoot deenent un met Tronen un Vesieekjungen, dee mie derch de Aunschläaj de Juden jeworden (passieet) sent;

²⁰woo ekj nuscht trigj jehoolen ha vonne nutzboare Dinj, soo daut ekj et junt nich vekjindicht un junt openboa jelieet ha, un enne Hiesa,

²¹endäm ekj bezeijd de Juden aus uk de Griechen no Gott han omtodenkjen (Busse doonen) un däm Gloowen aun onsem Harn Jesus Christus.

²²Un nu seet, ekj go jebungen derch däm Jeist no Jerusalem, nich weetent, waut mie doa bejäajnen woat,

²³buta daut de Heilja Jeist mie en jiedre Staut bezeicht un sajcht, daut Faslen un Bedrenkjnis opp mie luat.

²⁴Oba ekj laj selfst kjeen Wieet opp mien Läwen, om mien Gank un dän Deenst to vollbrinjen, däm ekj vom Harn Jesus emfangen ha, to bezeijen de frooe Bootschoft vonne Jnod Gottes.

²⁵Un nu kjikjt, ekj weet, daut jie aula, mien Jesecht nich mea seenen woaren, unja dän ekj omhäa jereist sie, un daut Rikj [Gottes] vekjindijd.

²⁶Doawäajen bezeij ekj junt aun disem Dach, daut ekj rein sie vom däm Bloot aula;

²⁷dan ekj sie nich stell jewast, soo daut ekj junt dän gaunzen Rotschluss Gottes vekjindicht ha.

²⁸Jeft acht opp junt selfst un dee gaunze Häad, en dee de Heilja Jeist junt enjesat haft aus Oppsechta, de Jemeent Gottes to weiden, dee hee sikj derch daut Bloot von sienem ieejnen Sän toojeieejent (jekoft) haft.

²⁹Ekj weet, [daut] no miene Aufreis bie junt endrinjen woaren jefäadelje Wilw, dee de Häad nich schoonen.

³⁰Un von junt selfst woaren Mana oppstonen, dee vedreide Dinj räden, om de Jinja hinja sikj wajch to schlapen.

³¹Doawäajen siet waka un jedenkjt, daut ekj dree Joa lank Nacht un Dach nich oppjehieet ha, eenen jiedren unja Tronen to ermonen.

³²Un nu [em Blekj oppe Dinj] befäl ekj junt Gott un däm Wuat siena Jnod, daut oppbuen kaun un [junt] daut Oawgoot to jäwen mank aul de Jeheilichte.

³³Ekj wull kjeenem sien Selwa ooda Golt ooda Kjleeda haben.

³⁴Jie selfst weeten, daut fa miene Bederfnisen un dee met mie wieren, dise Henj jedeent ha.

³⁵En aulem ha ekj junt jewäsen, daut maun soo oabeiden un sikj de Schwake aunnämen mott un jedenkjen däm Harn Jesus siene Wieed, daut hee selfst jesajcht haft: Jäwen es seelja aus nämen.

³⁶Un aus hee dit jesajcht haud, kjneed hee sikj dol un bäd met an aula.

³⁷Oba aula hielden sea; un see follen Paulus om däm Hauls un kusten am,

³⁸aum mieeschten betriept äwa daut Wuat, daut hee jesajcht haud, daut see sien Jesecht nich mea seenen wudden. Un see bejleiten am nom Schepp.