Read De Bibel JHF Aposteljeschicht 21 Bible Online

Aposteljeschicht 21 - De Bibel JHF bible

Aposteljeschicht 21

¹Oba aus et passieet wia, ons von an loosjeräten hauden un daut wie loosjefoaren wieren, kjeem wie jlikjtoo no Kos, un aum näakjsten Dach no Rodos un von doa no Patara.

²Un aus wie een Schepp jefungen hauden daut no Feenizien äwa fua, stieej wie en un fuaren auf.

³Oba aus wie Ziepern sagen un wie daut linkjsch ligjen leeten, fua wie no Sierien, un wie kjeemen no Tierus, dan doa sull daut Schepp de Lodinj (Frachtlod) aufloden.

⁴Un aus wie de Jinja jefungen hauden, bleew wie doa säwen Doag; dise säden däm Paulus derch däm Jeist, hee sull nich no Jerusalem enopp gonen.

⁵Oba aus et passieed, daut wie de Doag vebrocht hauden, jinj wie wajch un reisden wieda; doabie bejleiten see ons met Frues un Kjinja bot buta de Staut; un wie kjneeden aum Eewa dol un bäden.

⁶Un aus wie von eenaunda Aufscheet jenomen hauden, stieej wie em Schepp, oba jane jinjen trigj no Hus.

⁷Oba aus wie de Foat toenj wia von Tierus, kjeem wie no Ptolemäus; un wie bejreesten de Breeda un bleewen eenen Dach bie an.

⁸Un aum näakjsten Dach jinkj wie wajch un kjeemen no Cäsarea; un wie jinjen en Filippus sien Hus nenn, däm Evangelist, dee eena von de 7 wia, un bleewen bie am.

⁹Oba disa haud 4 Dajchta, Junkfrues (Onbefriede), dee profeetisch räden.

¹⁰Aus wie doa miere Doag bleewen, kjeem een jewessa Profeet rauf, von Judäa, met Nomen Agabus.

¹¹Un hee kjeem no ons un neem Paulus sien Gort un bunk sikj siene ieejne Feet un Henj un säd: Daut sajcht de Heilja Jeist: Däm Maun, däm dis Gort jehieet, soo woaren de Juden am en Jerusalem binjen, un woaren am enne Heiden äare Henj äwajäwen.

¹²Oba aus wie daut hieeden, bedd wie drinjent un dee doa aum Uat wonende, daut hee nich no Jerusalem noppgonen mucht (sull).

¹³Donn auntwuad Paulus: Waut doo jie, hielen un bräakjen mien Hoat? Dan ekj sie reed, nich blooss mie binjen to loten, oba uk en Jerusalem fa däm Har Jesus sienen Nomen to stoawen.

¹⁴Aus hee sikj oba nich äwaräden leet, beruijd wie ons un säden: Däm Harn sien Wellen passieet!

¹⁵Un no dise Doag aus wie ons reed jemoakt hauden, jinj wie enopp no Jerusalem.

¹⁶Oba eenje de Jinja, von Cäsarea, jinjen met ons, un brochten ons no eenem jewessen Mnason ut Ziepern, eenen oolen Jinja, bie däm wie gaustfrie (frintlich) oppjenomen worden.

¹⁷Oba aus wie en Jerusalem aunjekomen wieren, neemen de Breeda ons wellich opp.

¹⁸Un aum näakjsten Dach jinkj Paulus met ons no Jakobus, un aule Eltestasch kjeemen doahan.

¹⁹Un aus hee an bejreest haud, vetald hee eenseln aules von däm waut Gott derch sienen Deenst unja de Heiden jedonen haud.

²⁰Oba see, aus see daut jehieet hauden, priesden (veharlichten) Gott, un säden to am: Du sitst, Brooda, wooväl dusende mank de Juden dee doa toom Gloowen jekomen sent, un dee aula sent iewrich fa daut Jesaz.

²¹Daut es an oba äwa die berecht worden, daut du aule Juden, dee mank de Heiden sent, däm Auffaul von Moses lieescht un befälst, daut see de Kjinja nich beschnieden, un nich no de Jewanheit waundlen.

²²Aulsoo waut es to doonen? Emmahan woaren see hieren daut du jekomen best.

²³Daut doo nu, waut wie die sajen: Wie ha 4 Mana, dee een Vespräakjen opp sikj ha.

²⁴Dise nemm no die un lot die met an reinjen un betol fa an, doamet see sikj däm Kopp schäaren loten; un dan woaren aula erkjanen, daut aun däm, en däm see äwa die unjarecht sent, nuscht es, oba du waundelst uk selfst hoolent daut Jesaz.

²⁵Oba waut dee jleewent jewordne Heiden betraft, ha wie schreftlich Aunwiesunk utgonen loten un beschlooten, daut see sikj heeden (wajchhoolen) fa däm Jetzenopfa aus uk Bloot un jestekjtet (aufjewarjdet) un Onzucht.

²⁶Donn neem Paulus de Mana no sikj, un aum näakjsten Dach leet hee sikj met an reinjen, un jinkj em Tempel nenn, un kjindijd de Erfellunk de Reinjungsdoag aun, bot fa eenem jiedrem von an daut Opfa jebrocht wia.

²⁷Oba aus de säwen Doag meist toenj wieren, sagen de Juden von Asien am em Tempel, un brochten daut gaunze Volkj en Oppräajunk un läden de Henj aun am,

²⁸un schrieejen: Jie Mana, Israeliten, halpt! Dit es de Maun, dee daut Volkj aula äwaaul lieet jäajen daut Jesaz un dise Städ; un doatoo haft hee uk Griechen en däm Tempel nenn jefieet un haft disen heiljen Uat veonreinicht.

²⁹Dan see hauden verhäa Trofimus, dän Efeesa, met am enne Staut jeseenen un meenden daut Paulus am en däm Tempel nenn jefieet haud.

³⁰Un de gaunze Staut kjeem en Bewäajunk, un daut Volkj rand toop; un jreepen Paulus un schlapten am utem Tempel rut, un de Däaren worden fuaz toojeschloten.

³¹Un aus see am sochten Doot to moaken, kjeem de Norecht nom Bowaschten de Schoa, daut gaunz Jerusalem en Opprua jebrocht wia (es);

³²disa neem fuaz Soldoten un Hauptmanna met un rand no an rauf. Aus see dän Bowaschten un de Soldoten sagen, hieeden see opp, Paulus to schlonen.

³³Donn kjeem de Bowaschta noda, un leet am faustnämen un befool, daut hee jebungen wort met twee Kjäden, un fruach, wäa hee es un waut hee jedonen haft.

³⁴Dee eene schrieejen dit, de aundre daut, enne Menj (em Volkj); oba doa hee wäajen dän Loarm nuscht jeneiwet erfoaren kunn, befool hee, daut hee enne Kaserne (Loaga/Baraken/Soldotenloaga) jebrocht wort.

³⁵Oba aus hee bot oppe Trap kjeem, passieed daut, daut hee vonne Soldoten jedroacht wort wäajen de Jewault de Volkjsmenj;

³⁶dan de Volkjsmenj foljd un schrieech: Riemt am wajch!

³⁷Un aus Paulus sull enne Kaserne (Loaga/Baraken/Soldotenloaga) nenn jebrocht woaren, säd hee toom Bowaschten: Eset mie erlaubt, die waut to froagen? Hee oba säd: Vesteist du griechisch to räden?

³⁸Best du dan nich de Ägipta, dee ver dise Doag een Opprua jemoakt un dee 4000 Mana Doljchdroagasch enne Wieste rutjefieet haud?

³⁹Oba Paulus säd: Ekj sie een judischa Maun ut Tarsus en Zilizien, een Birja ut eene nich onbediedende Staut; oba ekj bedd die, erlaub mie, toom Volkj to räden.

⁴⁰Oba aus hee daut erlaubt haud, stunt Paulus oppe Stoopen, un wonk däm Volkj met de Haunt; oba aus et gaunz Stell jeworden wia, räd hee an enne hebräische Sproak aun un säd: