Read De Bibel JHF Aposteljeschicht 22 Bible Online

Aposteljeschicht 22 - De Bibel JHF bible

Aposteljeschicht 22

¹Mana, Breeda un Vodasch, hieet nu miene Veteidjunk ver junt!

²Oba aus see hieeden, daut hee en hebräische Sproak to an räd, worden see noch ruja. Un hee säd:

³Ekj sie een judischa Maun, jebuaren en Tarsus en Zilizien, oba groot jeworden en dise Staut to Gamaliel siene Feet, unjarecht (belieet) jeneiw nom vodalichen Jesaz, un een Iewaja fa Gott, aus jie aula vondoag sent;

⁴dee ekj disen Wajch (Lia) bat toom Doot vefolcht ha, bunk un äwajeef en Jefenkjnisen Mana aus uk Frues,

⁵aus uk de Huagapriesta un dee gaunze Eltesta Rot mie bezeicht, von dän ekj uk Breew aune Breeda kjrieech un jinkj no Damaskus, om uk deejanje, dee dort wieren, jebungen no Jerusalem to fieren (leiden), doamet see bestroft worden.

⁶Oba daut passieed mie, aus ekj reisd un dicht bie Damaskus wia, daut jäajen Meddach plazlich vom Himmel een dachet Licht strold.

⁷Un ekj foll oppe Ieed un hieed eene Stemm, dee to mie säd: Saul, Saul, waut vefolchst du mie?

⁸Oba ekj auntwuad: Wäa best du, Har? Un hee säd to mie: Ekj sie Jesus, de Nazarena, däm du vefolchst.

⁹Oba dee met mie wieren, sagen zwoa daut Licht [un worden enjstlich], oba hieeden de Stemm nich, dee to mie räd.

¹⁰Un ekj säd: Waut saul ekj doonen, Har? Un de Har säd to mie: Sto opp un go no Damaskus, un doa woat die aules jesajcht woaren, waut die to doonen veordnet es.

¹¹Oba doa ekj von janem Licht Glauns nich seenen kunn, wort ekj von dän, dee met mie wieren, aune Haunt jefieet un kjeem no Damaskus.

¹²Oba een jewessa Ananias, een Gottesferchtja Maun nom Jesaz, dee een goodet Zeichnis haud von aule doa wonende Juden,

¹³kjeem no mie, kjeem noda un säd to mie: Saul, Brooda, woa wada seenent! Un dee selwje Stund kunn ekj am seenen.

¹⁴Un hee säd: De Gott onse Vodasch haft die verhäa bestemt, sienen Wellen to erkjanen un däm Jerajchten to seenen un eenen Roop ut sienem Mul to hieren.

¹⁵Dan du woascht een Zeij fa am ver aule Menschen sennen von däm, waut du jeseenen un jehieet hast.

¹⁶Un nu, no waut luascht du? Sto opp, un lot die deepen un lot die diene Sinden aufwauschen, endäm du sienen Nomen aunroopst.

¹⁷Oba daut passieed mie, aus ekj no Jerusalem trigjjekomen wia un em Tempel bäd, daut ekj en (eenem Jesecht sach) Entrekjunk kjeem

¹⁸un sach, dee to mie säd: Spood die un go schwind ut Jerusalem rut, doawäajen, wiels see woaren dien Zeichnis äwa mie nich aunnämen.

¹⁹Un ekj säd: Har, see selfst weeten, daut ekj dee aun die Jleewende em Jefenkjnis schmeet un enne Sienagogen schlonen leet;

²⁰un aus daut Bloot von dienem Zeij Stefanus vegoten wort, soogoa ekj selfst, stunt doabie un haud Wooljefaulen un bewoakt äare Kjleeda, dee am ombrochten.

²¹Un hee säd to mie: Go, wiels ekj well die wiet wajch no de Velkja schekjen.

²²Oba see horchten am to bot disem Wuat un donn hoowen see äare Stemm un säden: Brinjt soonen äwatsied vonne Ieed, dan hee doaf nich aum Läwen bliewen!

²³Oba aus see schrieejen un de Kjleeda wajch schliesaden un Stoff enne Loft schmeeten,

²⁴befool de Bowaschta, daut hee enne Kaserne (Loaga/Baraken/daut Soldotenloaga) jebrocht woat un befool, daut hee unja (met) Schläaj sull vehieet (utjefroacht) woaren, doamet hee (dee Bowaschta) erkjant, wäajen waut fa eene Uasoak see soo jäajen am schrieejen.

²⁵Oba aus see am met de Reemes utjestrakjt hauden (om am to vepitschen), säd Paulus toom Hauptmaun, dee doabie stunt: Eset junt erlaubt, eenen Maun, dee een Reema es, uk onen veuadeelt, to vepitschen?

²⁶Oba aus et de Hauptmaun hieed, jinkj hee nom Bowaschten un berecht am un säd: Waut hast du väa to doonen? Dan dis Maun es een Reema.

²⁷Oba de Bowaschta kjeem un säd to am: Saj mie, best du een Reema? Oba hee säd: Jo.

²⁸De Bowaschta oba auntwuad: Ekj ha mie dit Birjarajcht fa eene groote Somm Jelt jekoft (betolt). Oba Paulus säd: Oba ekj sie soogoa doarenn jebuaren.

²⁹Nu fuaz jinjen von am wajch, dee am vehieren sullen; un uk de Bowaschta enjst sikj, aus hee erfua, daut hee een Reema es, un wiels hee am jefasselt (jebungen) haud.

³⁰Un aum näakjsten Dach, doa hee met Sechaheit erfoaren wull, wuarom hee vonne Juden aunjekloacht woat, leet hee am loos un befool, daut de Huagapriesta un daut gaunze Huaga Rot toopkomen sull; un hee fieed Paulus rauf un stald am ver an.