Read De Bibel JHF Aposteljeschicht 23 Bible Online

Aposteljeschicht 23 - De Bibel JHF bible

Aposteljeschicht 23

¹Oba Paulus kjikjt dän Huagen Rot met eenen fausten Blekj (iernstlich) aun, un säd: Mana, Breeda, ekj ha met volkomnet goodet Jewessen ver Gott bot disem Dach mien Läwen jefieet.

²De Huagapriesta Ananias befool dän, dee bie am stunden, am oppet Mul to schlonen.

³Donn säd Paulus to am: Gott woat die schlonen, du aunjewitte Waunt! Du setst doa, un rechst mie nom Jesaz, un haundelst jäajen daut Jesaz, du befälst mie to schlonen?

⁴Oba dee doabie stunden, säden: Veachst du dän Huagapriesta Gottes?

⁵Un Paulus säd: Ekj wist nich, Breeda, daut hee de Huagapriesta es, dan daut steit jeschräwen: «Du saust nich lastalich räden von eenem Bowaschten ut dienem Volkj».

⁶Oba aus Paulus erkjant haud, dautet eene Grupp vonne Saduzäa es (wia), oba de aundre vonne Farisäa wieren, schrieech hee em Huagen Rot: Mana, Breeda, ekj sie een Farisäa, een Farisäa Sän; wäajen de Hopninj opp daut Oppstonen vom Doot woa ekj verem Jerecht jestalt.

⁷Oba nodäm hee dit jesajcht haud, jeef et eene Spoolinj unja de Farisäa un Saduzäa, un daut Volkj deeld sikj.

⁸De Saduzäa opp eene Sied säden, daut jeft kjeen Oppstonen vom Doot, noch Enjel, noch Jeist; de Farisäa oppe aundre Sied bekjanen beides.

⁹Oba daut jeef een grootet Jeschrecht, un eenje Schreftjelieede vonne Farisäa Grupp stunden opp un streeden un säden: Wie finjen aun disem Maun nuscht Beeset; oba wan een Jeist ooda een Enjel to am jerät haft ...

¹⁰Un aus et een grootet Opprua jeef, enjst de Bowaschta sikj, daut Paulus von an veräten wudd, un leet, de Soldoten raufkomen un reeten am ut äare Medd un enne Kaserne (en daut Loaga/enne Baraken/en daut Soldotenloaga) brinjen.

¹¹Un enne näakjste Nacht kjeem de Har no am un säd: Sie mootich (jetroost)! Dan soo aus du von mie en Jerusalem jezeicht hast, soo motst du uk en Room Zeichnis auflajen.

¹²Oba aus et Dach jeworden wia, vebungen de Juden sikj met een Schwua, un vespruaken, nich to äten noch to drinkjen, bot see Paulus omjebrocht hauden.

¹³Doa wieren oba mea aus 40, dee dise Veschwierunk von sikj ut jemoakt hauden,

¹⁴dee no de Huagapriesta un Eltestasch jinjen un säden: Wie ha ons met eenem Fluch veschwuaren, nich to jeneeten, bot wie Paulus omjebrocht ha.

¹⁵Nu, moak jie toop met däm Huagen Rot däm Bowaschten daut bekaunt, daut hee am no junt rauffieet, aus wull jie jeneiw daut äwa am erfoaren; oba wie sent reed, ea hee noda kjemt, am omtobrinjen.

¹⁶Oba aus Paulus siene Sesta äa Sän von däm Aunschlach jehieet haud, kjeem hee han un jinkj enne Kaserne (Baraken de Soldoten / Loaga/en daut Soldotenloaga) un berecht daut Paulus.

¹⁷Oba Paulus roopt no sikj eenem vonne Bowaschten un säd: Brinj disem jungen Maun nom Bowaschte, dan hee haft am waut to berechten.

¹⁸Dee neem am met sikj un brocht am nom Bowaschten un säd: De Jefangne Paulus roopt mie no sikj un bedd, disem jungen Maun no die to fieren, dee haft die waut to sajen.

¹⁹De Bowaschta oba neem am aune Haunt un jinkj met am fa sikj auleen un fruach: Waut es daut, waut du mie to berechten hast?

²⁰Hee oba säd: De Juden sent äwareen jekomen, die to bedden, daut du morjen Paulus nom Huagen Rot rauf fieren latst, aus wullen see jeneiwa äwa am erfoaren.

²¹Du oba, lot die nich beräden, dan doa luaren opp am mea aus 40 Mana, dee sikj veschwuaren ha, nich to äten noch to drinkjen, bot see an omjebrocht ha; un nu sent see reed un luaren daut du toosajchst.

²²De Bowaschta (Kommandaunt) leet däm jungen Maun gonen un befool am: Kjeenem to sajen, daut du mie dit weeten leetst.

²³Un aus hee 2 vonne Hauptmanna no sikj jeroopt haud, säd hee: Moakt 200 Soldoten reed, doamet see bat Cäsarea trakjen, un 70 Rittasch un 200 Spiesmana, vonne dredde Nacht Stund aun.

²⁴Un daut see Riedtieren reed stalen sullen, doamet see däm Paulus nopp saten un am secha no Felix, Laundesvewaulta (Gowernia) , to brinjen.

²⁵Un hee schreef eenen Breef, met disem Enhault:

²⁶Klaudius Liesias däm huachberiemda Laundesvewaulta (Gowernia) Felix, eenen Gruss!

²⁷Disem Maun, vonne Juden jefangen jenomen un dee wullen am ombrinjen, ekj kjeem han met de Häad (Soldoten) un hold am doa rut, un erfua daut hee een Reema es.

²⁸Un wull de Uasoak erfoaren, wäajen waut see am aunkloagen, ekj leet am rauf brinjen ver äarem Huagen Rot.

²⁹Dan ekj funk, daut hee wäajen Strietfroagen en äarem Jesaz aunjekloacht wort, oba kjeene Aunkloag de metem Doot ooda de Faslen wieet wia.

³⁰Doa mie oba een Aunschlach jäajen disem Maun aunjemalt wort, ha ekj am fuaz no die jeschekjt un befool uk de Aunkjläaja, die to sajen, waut see jäajen am väabrinjen [Läw wool].

³¹De Soldoten naumen, soo aus an befoolen wia, dän Paulus un fieeden am enne Nacht no Antipatris;

³²aum näakjsten Dach leet hee de Ritta met am aufreisen un see kjeemen trigj enne Baraken de Soldoten.

³³Aus dise no Cäsarea jekomen wieren, un däm Breef däm Laundesvewaulta (Gowernia) äwajeft hauden, fieeden see am uk Paulus väa.

³⁴Oba aus hee däm Breef jeläst un jefroacht haud, ut woone Prowins hee es, un erfoaren haud, daut hee ut Zilizien es,

³⁵säd hee: Ekj woa die vehieren, wan uk diene Aunkjläaja aunjekomen sent. Un hee befool, daut hee em Herodes sien Rechthus bewoakt woat.