Read De Bibel JHF Aposteljeschicht 24 Bible Online

Aposteljeschicht 24 - De Bibel JHF bible

Aposteljeschicht 24

¹Un no fief Doag jinkj de Huagapriesta Ananias met eenje Eltestasch un eenem Aunwault (Rädna) Tertullus rauf, see muaken biem Laundesvewaulta (Gowernia) äare Aunkloag jäajen Paulus.

²Oba aus hee jeroopt wort, funk Tertullus aun met de Aunkloag, un säd: Doa wie väl (groote) Fräd derch diene Väasorj un derch Vebätrungen fa disem Volkj erlangt jeworden es,

³un wie erkjanen daut aulewäajes un aulentiet, huach jeachta Felix, met aula Dankboakjeit.

⁴Oba doamet ekj die nich lenja opphol, bedd ekj, daut du ons kort en diene Nosecht (Heeflichkjeit) aunhieescht.

⁵Wie ha disem Maun nämlich aus eene Past jefungen un aus eenen, dee Opprua aunsteft unja aule Juden oppe bewonde (gaunze) Ieed, un aus Aunfiera de Sakjt de Nazarena;

⁶dee uk vesocht haft dän Tempel to entheiljen (veonreinjen), däm wie uk faustjenomen ha [un no onsem Jesaz rechten wellen.

⁷Oba Liesias, de Bowaschta, kjeem doatoo un fieed am met groote Jewault ut onse Henj wajch,

⁸un befool siene Aunkjläaja, no die to komen;] von däm du selfst, äwa daut aules nojeforscht hast, aules erfoaren (Vestentnis ha), wuarom wie am aunkloagen.

⁹Oba uk de Juden jreepen [Paulus] aun un säden, daut dit sikj soo vehilt.

¹⁰Un Paulus auntwuad, aus de Laundesvewaulta (Gowernia) am toojewongen haud to räden: Doa ekj weet, daut du aul väle Joaren Rechta äwa dit Volkj best, soo veteidj ekj miene Sach met gooden Moot,

¹¹wiels du erkjanen kaust, dautet nich mea aus 12 Doag sent, aus ekj nopp kjeem, om en Jerusalem auntobäden.

¹²Un see fungen mie nich em Tempel, met eenem strieden, ooda een Opprua em Volkj, nich enne Sienagog ooda sestwoo, enne Staut;

¹³äwahaupt kjennen see die nich bewiesen, met waut see mie nu aunkloagen.

¹⁴Oba dit bekjan ekj die, daut opp däm Wajch, däm see eene Sakjt nanen, deen ekj däm Gott von miene Vodasch, endäm ekj aules jleew, waut em Jesaz un enne Profeeten jeschräwen steit,

¹⁵un de Hopninj en Gott ha, dee uk dise selfst aunnämen, daut et een Opstonen de Doodes jäwen woat, soo aus fa Jerajchte aus uk Ojjerajchte.

¹⁶Doawäajen jäw ekj mie Mieej, een onvelaztet (reinet) Jewessen aule Tiet ver Gott un Menschen to haben.

¹⁷Oba no väl Joaren sie ekj jekomen, Aulmoosen un Opfa fa mien Volkj to brinjen,

¹⁸bie waut see mie jereinicht em Tempel fungen, nich met väl Menschen un nich met Opprua;

¹⁹oba eenje Juden ut Asien, dee hia ver die sent un mie aunkloagen, wan see irjentwaut sullen jäajen mie haben.

²⁰Ooda dise sellen selfst sajen, waut fa Orrajcht see aun mie jefungen ha, aus ekj verem Huagen Rot stunt,

²¹daut wia wäajen daut eensje Wuat, daut ekj utroopt, aus ekj unja an stunt: Wäajen daut Opstonen de Doodes woa ekj vondoag von junt jerecht.

²²Oba Felix, veschoof de Tiet opp wiedahans, doa hee rajcht jeneiw dän Wajch (Lia) kjand, un säd: Wan Liesias, de Bowaschta, raufkjemt, woa ekj junen Faul entscheiden.

²³Un hee befool dän Hauptmaun, daut hee bewoakt woat un am jewesse Frieheit to jäwen un kjeenem vonne Sienje to hindren am to deenen.

²⁴Un no eenje Doag kjeem Felix met siene Fru Drusilla, dee eene judische Fru wia, un leet Paulus komen un horcht am äwa däm Gloowen aun Christus Jesus.

²⁵Oba aus hee äwa Jerajchtichkjeit un Enthoolen un daut komenden Jerecht räd, wort Felix voll Angst un auntwuad: Fa nu go han; oba wan ekj eene jenstje Tiet ha, woa ekj die no mie roopen loten.

²⁶Butadäm hopt hee, daut Paulus am Jelt jäwen wudd; doawäajen leet hee am foaken komen, un räd met am.

²⁷Oba aus twee Joa vegonen wieren, kjrieech Felix dän Porzius Festus aus Nofolja; un doa Felix sikj bie de Juden en Gonst saten wull, leet hee Paulus jebunjen trigj.