Read De Bibel JHF Aposteljeschicht 25 Bible Online

Aposteljeschicht 25 - De Bibel JHF bible

Aposteljeschicht 25

¹Aus nu Festus en de Prowins jekomen wia, jinkj hee no dree Doag von Cäsarea enopp no Jerusalem.

²Un de Huagapriesta un de Ieeschte vonne Juden muaken eene Aunkloag bie am jäajen Paulus un bedden am,

³fa sikj om een Jefaulen, jäajen am, daut hee am sull no Jerusalem komen loten; endäm see eenen Aunschlach moaken wullen, am oppem Wajch omtobrinjen.

⁴Festus auntwuad, daut Paulus woat en Cäsarea jehoolen, hee selfst wull em korten aufreisen.

⁵Dee de Macht unja junt haben, säd hee, lot met rauf gonen, un wan irjent waut orrajchtet aun däm Maun es, sell jie am aunkloagen.

⁶Oba aus hee nich mea aus 8 ooda 10 Doag unja an vebrocht haud, jinkj hee rauf no Cäsarea; un aum näakjsten Dach sad hee sikj oppem Rechtastool un befool, daut Paulus väajefieet wort.

⁷Oba aus hee aunjekomen wia, stalden sikj de Juden dee von Jerusalem aunjekomen wieren om am un brochten väl schwoare Beschuldjungen väa, dee see nich bewiesen kunnen.

⁸Wäarent Paulus sikj veteidijd: Noch jäajne Juden äa Jesaz, noch jäajen dän Tempel noch jäajen däm Kjeisa ha ekj jesindicht.

⁹Oba Festus, dee de Juden een Jefaulen doonen wull, auntwuad däm Paulus un säd: West du no Jerusalem nopp gonen un doa äwa dise Dinj von mie jerecht woaren?

¹⁰Oba Paulus säd: Ekj sto ver däm Kjeisa sien Rechtastool, wua ekj mott jerecht woaren; de Juden ha ekj en kjeenem Faul Orrajcht jedonen, soo uk du sea goot weetst.

¹¹Wan ekj nu Orrajcht jedonen un irjent waut däm Doot vedeent begonen ha, ekj wäa mie nich to stoawen; oba wan aun däm (doaraun) nuscht es, fa waut see mie aunkloagen, kaun mie kjeena an äwajäwen (utleewren). Ekj beroop mie opp dän Kjeisa.

¹²Dan beräd Festus sikj met de Rotsvesaumlunk un auntwuad: Oppem Kjeisa hast du die beroopen, nom Kjeisa saust du gonen.

¹³Oba aus eenje Doag vegonen wieren, kaumen de Kjennich Agrippa un Bernies no Cäsarea, Festus to bejreessen.

¹⁴Aus see oba doa eenje Doag vebrocht hauden, läd Festus däm Kjennich Paulus siene Sach väa un säd: Een Maun es von Felix trigj jeloten, een Jefangna,

¹⁵äwa däm, aus ekj un Jerusalem wia, de Huagapriesta un de Eltestasch de Juden muaken eene Aunkloag, foddaden jäajen am eene Veuadeelunk;

¹⁶ekj auntwuad an: Daut es bie de Reema nich Mood, irjent eenen Mensch uttoleewren, bat de Aunjekloagda nich ver sikj de Vekjläaja haft un Jeläajenheit jekjräajen haft sikj to veteidjen.

¹⁷Aus see nu hiahäa toop jekomen wieren, sad ekj mie, onen opptoschuwen, aum näakjsten Dach oppem Rechtastool un befool, daut de Maun väajefieet wort;

¹⁸äwa disem, aus de Vekjläaja oppstunden, un see kjeene Beschuldjunk von däm väabrochten, met waut ekj aun Beeset jeräakjent haud.

¹⁹Oba see hauden eenje Strietfroagen [jäajen am] äwa äare ieejne Relijion, un äwa eenen [jewessen] jestorwnen Jesus, von däm Paulus sajcht, hee läft.

²⁰Ekj oba sie rotloos, betrafs de Unjasieekjunk äwa dise Dinj, ekj säd (fruach), auf hee no Jerusalem gonen wull, om doa wäajen (äwa) dise Dinj jerecht to woaren.

²¹Oba aus Paulus Beroopunk enjelajcht haud, daut hee bewoakt woat, bat dee kjeisaliche Majestät sienen Beschluss, befool ekj, am to bewoaken, bot ekj am nom Kjeisa schekjen woa.

²²Oba Agrippa säd to Festus: Ekj wull uk selfst däm Maun hieren. Morjen, [säd] hee, saust du am hieren.

²³Aum näakjsten Dach kjeemen Agrippa un Bernies met groote Pracht un de Bowaschte un aunjeseene Mana de Staut en däm Toohiera Sol, un Festus een Befäl jejäft haud, wort Paulus väajefieet.

²⁴Un Festus säd: Kjennich Agrippa un jie aule Mana, dee hia met ons doabie sent, jie seenen disem, wäajen däm mie daut gaunze Volkj de Juden bedrenjt (aunjegonen) haft, soo aus en Jerusalem aus uk hia, un schrieejen, daut hee nich mea aum Läwen bliewen doaf.

²⁵Oba, ekj ha faustjestalt, daut hee nuscht waut däm Doot vedeent jedonen haft, oba disa, sikj selfst oppem Kjeisa beroopen haft, ekj ha beschlooten, am to schekjen;

²⁶äwa däm ekj nuscht Jewesset däm Har to schriewen ha. Doawäajen ha ekj am junt väajefieet un aum mieeschten ver die, Kjennich Agrippa, doamet, wan de Unjasieekjunk passieet es, ekj weet, waut ekj schriewen saul.

²⁷Dan mie kjemt daut onveninftich väa, eenen Jefangnen to schekjen un nich uk de Beschuldjunk jäajen am auntojäwen.