Read De Bibel JHF Aposteljeschicht 26 Bible Online

Aposteljeschicht 26 - De Bibel JHF bible

Aposteljeschicht 26

¹Oba Agrippa säd to Paulus: Daut es die erlaubt fa die selfst to räden. Doa strakjt Paulus de Haunt ut, un veteidijd sikj.

²Wäajen aul däm, ekj vonne Juden aunjekloacht woa, sie ekj jlekjlich mie vondoag, ver die Kjennich Agrippa, to veteidjen;

³ver aulem, wiels du soo aus aule Judische Sitten aus uk Strietfroagen kjanst, doawäajen bedd ekj die, mie jeduldich auntohieren.

⁴Mien Läwenswaundel von Jugent aun, von Aunfank aun, mank mien Volkj en Jerusalem jewast es, kjanen aule Juden,

⁵un kjanen mie von frieejoa, (wan see daut bezeijen wellen), daut ekj no dee strenjste Rechtunk onsa Relijion, aus Farisäa jeläft ha.

⁶Un nu wäajen de Hopninj, dee von Gott aun onse Vodasch utjegone Vespräakjunk, sto ekj hia verem Jerecht,

⁷to däm ons 12 stamjet Volkj, aunhoolent Nacht un Dach Gott deenent, hopt hantokomen; wäajen dise Hopninj, woa ekj vonne Juden aunjekloacht, oo Kjennich.

⁸Wuarom woat daut bie junt fa onjleeflich jeuadeelt, daut Gott Doodes oppwakjt?

⁹Ekj jleewd auladinjs en mie selfst, daut jäajen däm Nomen Jesu, dän Nazarena, väl Fientseeljet (schlajchtet) to doonen,

¹⁰waut ekj uk en Jerusalem jedonen ha; un väl de Heilje ha ekj en Jefenkjnisen enjeschloten, endäm ekj de Vollmacht vonne Huagapriesta jekjräajen haud; un wan see omjebrocht worden, gauf ekj veuadeelent miene Stemm doatoo.

¹¹Un en aule Sienagogen stroft ekj an, ekj bedwunk an to lastren; un äwa aule Moten wuttich äwa an, vefoljd an soogoa bot enne butaschten Städa (Utlaunt).

¹²Un aus ekj, doamet beschafticht wia, met Vollmacht un Erlaubnis vonne Huagapriesta no Damaskus reisd,

¹³sach ekj medden aum Dach oppem Wajch, oo Kjennich, vom Himmel häa een Licht, daut däm Sonnenglaunz äwatroff, daut mie un dee met mie Reisende omscheen.

¹⁴Un aus wie aula oppe Ieed jefollen wieren, hieed ekj eene Stemm en hebräische Sproak to mie sajen: Saul, Saul, waut vefolchst du mie? Hoat es daut fa die, jäajen dän Stachel uttoschlonen.

¹⁵Oba ekj säd: Wäa best du, Har? Un de Har säd: Ekj sie Jesus, däm du vefolchst;

¹⁶Doch sto opp un stal die opp diene Feet; dan doatoo sie ekj die erschänen, die to eenem Deena un eenem Zeij to veordnen (moaken), doavon, waut du jeseenen hast, un waut ekj die noch wiesen woa,

¹⁷die rutnäm ut däm Volkj un ut de Velkja (Nazionen), no dän ekj die schekjen woa,

¹⁸äare Uagen optomoaken, doamet see sikj wajchdreien (bekjieren) vonne Diestanis nom Licht un von Soton siene Macht no Gottt, doamet see Vejäwunk de Sinden un een Aundeel mank de Jeheilichte derch dän Gloowen aun mie emfangen (kjrieen).

¹⁹Doahäa, Kjennich Agrippa, wia ekj nich ojjehuarsom däm himlischen Jesecht,

²⁰oba ekj vekjindijd ieeschtens dän en Damaskus aus uk un en Jerusalem un enne gaunze Launtschoft von Judäa un de Heiden, omtodenkjen (Busse to doonen) un sikj no Gott hantodreien (bekjieren), endäm see Busse derch wieetvolle Woakjen doonen.

²¹Doawäajen ha mie de Juden em Tempel faustjenomen un vesochten mie omtobrinjen.

²²Doa mie de Help von Gott, bot nu - disem Dach, erlangt (jeholpen) haft, sto ekj hia un jäw Zeichnis ver Kjliene un Groote, un saj nuscht buta däm, waut de Profeeten un Moses jesajcht ha, daut passieren wudd,

²³daut de Jesaulwda (Christus) lieden sull, daut hee aus Ieeschta ute vom Doot opptostonen Licht vekjindjen sull, soo aus däm Volkj soo uk de Heiden.

²⁴Oba aus hee dit to Veteidjunk säd (väabrocht), säd Festus met ne lude Stemm: Du best von Sennen, Paulus! Daut väle Studieren drift die en dän Wonsenn.

²⁵Oba Paulus säd: Ekj sie nich von Sennen, huachjeachta Festus, oba ekj Denkj veninftich un räd Wieed de Woarheit.

²⁶Dan de Kjennich haft Kjantnis äwa (von) dise Dinj, to däm ekj uk met frieem Moot räd; dan ekj jleew nämlich nich, daut am von dise Dinj waut veborjen (onbekaunt) es, dan dit es nich en eenem Winkjel passieet.

²⁷Jleefst du, Kjennich Agrippa, de Profeeten? Ekj weet, daut du jleefst.

²⁸Oba Agrippa [säd] to Paulus: Em korten errieekjst du, mie derch Äwaräden een Christ to woaren.

²⁹Oba Paulus [säd]: Ekj mucht to Gott bäden, daut äwa kort ooda lank nich blooss du, oba uk aule, dee mie vondoag hieren, soone woaren, aus uk ekj sie, buta dise Faslen.

³⁰Un de Kjennich stunt opp un de Laundesvewaulta (Gowernia) un Bernies un dee met an sauten.

³¹Un aus see sikj trigj jetrocken hauden, räden see to eenaunda un säden: Dis Maun deit nuscht, waut däm Doot ooda de Faslen wieet wia.

³²Oba Agrippa säd to Festus: Dis Maun kunn friejeloten woaren, wan hee sikj nich oppem Kjeisa beroopen haud.